ԼԻԲԱՆԱՆԻ ԶԱՒԱԿՆԵՐԸ ԻՆ՞ Չ ԿԸ ՄՏԱԾԵՆ ԻՐԵՆՑ ՀԱՅՐԵՆԻՔԻՆ ՄԱՍԻՆ…

0
225

Սկզբունքով, այսօր՝  Չորեքշաբթի ՄԱԿ-ի  նիւ եորքեան  ընդհանուր  նիստերու ծիրին մէջ,  Լիբանանի    Օժանդակութեան   Միջազգային  Խումբին նախաձեռնութեամբ, կարեւոր  խորհրդաժողով  մը   նախատեսուած է, հանրապետութեան նախագահ Միշէլ Սըլէյմանի մասնակցութեամբ:

Խորհրդաժողովին  հիմնական առաքելութիւնը  պիտի  ըլլայ,  միջոցներ  փնտռել մեղմացնելու,  մօտաւորապէս երկու  միլիոն սուրիացի  գաղթականներու  առաջնային օժանդակութիւն հայթայթելու լիբանանեան իշխանութիւններուն բեռը: Իրազեկ դառնալով   տեղաբաշխական,  ընկերային,  տնտեսական եւ ազգային անվտանգութեան մարզերուն մէջ  Լիբանանի  համեստ  պայմաններուն, վճռական եւ  գործնապաշտ նախաձեռնութիւններ կ’ակնկալուին Լիբանանի Բարեկամներէն, յանուն Սուրիոյ կարիքաւորներուն եւ  զանոնք հիւրընկալող  Մայրիներու  երկրին:  Այստեղ յիշեցման կարգով անհրաժեշտ է  արձանագրել, որ անցեալին նոյնպէս,  միեւնոյն  նպատակով  առաջադրուած են  արաբական ու միջազգային  սնտուկներ: Տրուած  խոստումներուն  մեծամասնութիւնը  առ  այսօր կը սպասեն  իրենց գործադրութեան….:  Անցեալի փորձառութիւնը լիբանանցիներուն կը  թելադրէ  սպասել անսպասելին..:  Միւս կողմէ եւ  յանուն  պատմական  ճշմարտութեան, Սուրիոյ  պատերազմին առաջին իսկ  օրէն, հակառակ դիմագրաւած ներքին վերիվայրումներուն,  Լիբանան առ այսօր,  կը  շարունակէ  գրկաբաց  ընդունիլ արհաւիրքին   ճիրաններէն  փախուստ տուող սուրիացիները:  Սակայն  երկարաժամկէտ հարթութեան վրայ եւ առանց արտաքին  օժանդակութեան, Լիբանան անզօր պիտի  մնայ  հեզասահօրէն  հոգալու  գաղթականներուն  անհրաժեշտութիւնները:

Անցնող Մայիսին, Ժընեւի մէջ  համախմբուած,  ՄԱԿ-ի  կից  գործող  Գաղթականներու Բարձր Խորհուրդը, Սուրիոյ  սահմանակից  պետութիւններու իրավիճակը ուսումնասիրելէ  ետք,  ահազանգեց, թէ  մարդասիրական օժանդակութիւն  հայթայթելու տեսակէտով,  Լիբանանը կը մնայ կարեկցութեան  կարօտ  երկիր:  Խորհուրդը միաժամանակ զգուշացուց թէ  սուրիացի  գաղթականներու ներկայութիւնը իր  վճռորոշ   անդրադարձը պիտի  ունենայ Լիբանանի ապահովական ջերմաչափին վրայ: Վերոյիշեալ մտահոգութիւններէն  թելադրուած,  այսօրուան խորհրդաժողովը  պիտի  որոնէ   Լիբանանի կայունութիւնը  ամրապնդող  յենակէտներ: Հիմնական  սեւեռումը   անկասկած ուղղուած  պիտի  ըլլայ   տնտեսութեան եւ ապահութեան  մարզերուն վրայ:  Խորհրդաժողովի  նախօրէին, կարգ մը  պետութիւններ    յստակօրէն  կը շեշտէին  սահմանադրական կառոյցները զօրացնելու անհրաժեշտութիւնը,  յատկապէս՝  բանակը:   

Մեր  սրտագին  մաղթանքն է, որ սուրիացի  ժողովուրդին մօտ   վերազարթնի ազգային  գիտակցութեան  ոգին, թօթափէ արտաքին միջամտութիւնները եւ  սեփական  միջոցներով  վերականգնէ ազգային միասնականութիւնը, որպէսզի  երկիրը վերադառնայ իր պատմական  առաքելութեան :  Ի վերջոյ, պէտք չէ մոռնալ այն  ճշմարտութիւնը, որ ՝  Սուրիա  կը մնայ  տրոփող  սիրտը  արաբական աշխարհին:

Լիբանանի Բարեկամներուն  նախաձեռնութեամբ,  օժանդակութեան  կարելիութիւններու  խորհրդաժողովը  մետաղին մէկ երեսն է:  Պահ մը  մոռնանք արտաքին միջամտութիւնները: Ինչ  խօսք, որ մեծ ակնկալութիւններ ոնինք  միջազգային  ընտանիքէն: Հապա ին՞չ ակնկալել  Լիբանանի  Զաւակներէն,  որոնք կը ներկայացնեն  մետաղին  միւս  երեսը: Վերջիններս  ինչպէ՞ս պիտի   սատարեն իրենց հայրենիքին…:  Ինքնագիտակցութեան կանչ մըն  ալ ուղղուած է լիբանանեան բեմի  դերակատարներուն:

Աղիողորմ  պատկեր մը կը  պարզէ   երկրին  տնտեսական, ընկերային  առօրեան:  Միջազգային  վիճակագրական  ուսումնասիրութիւններն են վկայողը՝ խարխուլ  տնտեսական եւ քաղաքական կացութեան հետեւանքով «փոթորիկ»ի սպառնալիքին տակ գտնուող 159 պետութիններու մէջ, Լիբանան  կը գրաւէ 112-րդ դիրքը:  Վիճակագրական այս  մտահոգիչ   ցուցանիշին զուգահեռ, ուսումնասիրութիւնները կ’ընդգծեն, թէ  ներքին  գործօններու հետեւանքով  պետութիւնը   անզօր  կը մնայ  իրագործելու  իր  պարտականութիւնները:   Սոյն մատնանշումները  առաւել հաստատուեցան, երբ  ելեւմտական նախարարութիւնը  հրապարակեց  նոր տնտեսական  տարուան, առաջին վեց ամիսներու  տեղեկագիրը: Նախորդ տարուան հետ  համեմատելով,   պետական  պիւտճէն արձանագրած է 67  առ հարիւրի բաց մը, շօշափելի թիւերով խօսելու համար՝  1.89  միլիառ տոլարի գումար  մը:  Պետութեան  եկամուտի  աղբիւրները  արձանագրած են աննախընթաց կծկում:  Ին՞չ  կը մտածեն Լիբանանի  Զաւակները  այս  ողորմելի թուանշաններուն  առջեւ, որոնք   պերճախօս  ապացոյց  են, թէ մեր երկրի  տնտեսութիւնը  կը տառապի   քաղաքական ներքին  քաշքշուքներէն եւ ապա՝  Սուրիոյ պատերազմին  հետեւանքներէն:

Արմատական  յեղաշրջում մը  միայն կրնայ  փրկել Լիբանանի  փլուզած  տնտեսութիւնը, որուն   նախապայմանը  անկասկած պիտի  ըլլայ  անհասանելի  քաղաքական կայանութիւնը:

Սուրիոյ   քիմիական զէնքերուն   վերաբերեալ   Մոսկուա – Ուաշինկթըն համաձայնութիւնը, ինչպէս  նաեւ  «Ժընեւ -2» խորհրդաժողովը աւելի  շօշափելի իրականութիւն դարձած են  այսօր:  Թուրքիա եւ Յորդանան կը  նախազգան  ծայրայեղական  կազմակերպութիւններուն   ներկայացուցած սպառնալիքը  իրենց ազգային անվտանգութեան: Մտահոգիչ այս զարգացումներուն մէջ,  լիբանանեան  քաղաքական հոսանքներուն համար աններելի է  տակաւին  գրաւ   դնել Սուրիոյ  փոփոխութիւններուն վրայ եւ  պատանդի  վերածել երկիրը, մերժելով  միջին եզր  գտնելու  ամէն  ձեւի    նախաձեռնութիւններ:

 Շուտափոյթ  եւ անմիջական   դարմանումի կը կարօտի  Լիբանանի  ընկերային,  տնտեսական, քաղաքական առօրեան:  Այսօրուան   խորհրդաժողովը  համախմբուելու  նոր  մեկնակէտ պարտի դառնալ   բոլորին, որուն նախաքայլը  անկասկած պիտի  ըլլայ  հրաժարեալ կառավարութեան մեկնումը եւ ազգային  միասնականութեան կառավարութեան մը  կազմութիւնը:

ԱՀԱՐՈՆ  ՇԽՐՏԸՄԵԱՆ

 

 

 

 

LEAVE A REPLY

Please enter your comment!
Please enter your name here