ՀՀ Սփիւռքի Նախարար Հրանոյշ Յակոբեան Ընդունեց ՄԱԿ-ի Փախստականներու Հարցերով Գերագոյն Յանձնակատարի Հայաստանեան Գրասենեակի Ղեկավար Քրիստոֆ Ֆրիետերիկ Օտտօ Պիերուիրթը

0
134

 

 Երեքշաբթի,  24 Սեպտեմբերին ՀՀ սփիւռքի նախարար Հրանոյշ Յակոբեան ընդունեց ՄԱԿ-ի Փախստականներու հարցերով գերագոյն յանձնակատարի հայաստանեան գրասենեակի ղեկավար Քրիստոֆ Ֆրիետերիկ Օտտօ Պիերուիրթը: Հանդիպման ներկայ էր նաեւ «Սուրիահայերու հիմնախնդիրները համակարգող կեդրոն» հասարակական կազմակերպութեան նախագահ Լենա Հալաճեան:

ՀՀ Սփիւռքի նախարարը գերագոյն յանձնակատարին ներկայացուց սուրիահայերու հիմնախնդիրները, ՀՀ իշանութիւններու դիրքորոշումն ու իրականացուած ծրագիրները: Հրանոյշ Յակոբեան հիւրին ներկայացուց նաեւ Աշտարակ քաղաքին մէջ Նոր Հալէպ թաղամասի հիմնադրման ծրագիրը, որ ՀՀ Նախագահ Սերժ Սարգսեանի յանձնարարականին համաձայն` արդէն մեկնարկած է, եւ անոր վերաբերեալ ընդունուած է ՀՀ կառավարութեան որոշումը:

Քրիստոֆ Ֆրիետերիկ Օտտօ Պիերուիրթը շնորհակալութիւն յայտնեց ՀՀ սփիւռքի նախարարին սուրիահայերու հիմնախնդիրները մանրամասն ներկայացնելու եւ ցուցաբերած աջակցութեան համար` նշելով, որ խորապէս կը գիտակցի Հայաստան ժամանած սուրիահայերու խնդիրներու հետ կապուած Հայաստանի առջեւ ծառացած մարտահրաւէրները: Ան բարձր գնահատեց ՀՀ ղեկավարութեան օժանդակութիւնը սուրիահայերուն օգնելու հարցին:

Հանդիպման ընթացքին երկու կողմերը համաձայնութեան եկան աւելի սերտ աշխատելու, համագործակցութեան համատեղ յուշագիր նախապատրաստելու եւ 2014-ի ընթացքին համատեղ ծրագիրներ իրականացնելու հարցով:

 

LEAVE A REPLY

Please enter your comment!
Please enter your name here