ԼԱՒՐՈՎ՝ ՄԻԱՅՆ ՍԿԶԲՈՒՆՔԱՅԻՆ ՀԱՄԱՁԱՅՆՈՒԹԻՒՆ ԳՈՅԱՑԱԾ Է ՍՈՒՐԻՈՅ ԲԱՆԱՁԵՒԻՆ ՎԵՐԱԲԵՐԵԱԼ

0
108

Քարոզչական    պայքար մը  սկսած է  ՄԱԿ-ի Ապահովութեան Խորհուրդի  մնայուն անդամներուն միջեւ: Ոմանք կը  յայտարարեն, թէ  Սուրիոյ վերաբերեալ   բանաձեւին  սեւագրութիւնը պատրաստ է արդէն, կը մնայ անոր  վաւերացումը:  Ռուսիա կը լուսաբանէ, սկզբունքային  համաձայնութիւն միայն գոյացած է  բանաձեւին  շուրջ, սակայն քննարկումները չեն աւարտած տակաւին:

 ՄԱԿ-ի ընդհանուր քարտուղար Պան Քի Մուն  յայտարարեց, թէ  մնայուն անդամներուն միջեւ  համաձայնութիւն  գոյացած  է  բանաձեւին  կէտերուն շուրջ: Ըստ Քի Մունի, բանաձեւը  շատ   հաւանաբար  այսօր ներկայացուի քուէարկութեան:

ՄԱԿ-ի մօտ Ռուսիոյ  դեսպան Վիթալի  Չուրքին յայտարարեց, թէ համաձայնութեան մասին  լուրը   չի համապատասխաներ  իրականութեան: Նախագիծին վերաբերեալ   քննարկումները պիտի շարունակուին այսօր՝ Ուրբաթ: Միւս կողմէ,  Ռուսիոյ արտաքին գործոց նախարար Սերկէյ Լաւրով   տուեալներ փոխանցեց  Միացեալ Նահանգներու իր պաշտօնակիցին՝ Ճոն Քերրիի, որոնք կը   հաստատեն Սուրիոյ ընդդիմութեան  մասնակցութիւնը 21  Օգոստոսին պատահած   քիմիական   յարձակումին:  Ռուսիոյ   փոխարտաքին գործոց նախարար  Սերկէյ Ռիպաքով   ցաւ յայտնեց, որ  ՆԱԹՕ կը փորձէ  Լիպիոյ  սենարիօն կրկնել Սուրիոյ  մէջ:  Ան ըսաւ, թէ  Ռուսիա պատրաստ է  մասնակցելու  քիմիական կեդրոններու անվտանգութեան,  մինչեւ  անոնց  ամբողջական  չէզոքացումը:

  Լատին ամերիկեան  «Թելէսոր»    հեռատեսիլի կայանէն  սփռուած  հարցազրոցի մը   ընթացքին, նախագահ Պաշշար Ասատ  դիտել տուաւ, թէ ՄԱԿ-ի 68-րդ ընդհանուր նստաշրջանին առիթով նախագահ  Պարաք Օպամայի արտասանած  խօսքը լեցուն էր  անհիմն տեղեկութիւններով եւ  զրպարտութիւններով:  Ան   նշեց, թէ Իրան, Չինաստան եւ Ռուսիա առարկայական մօտեցում կը ցուցաբերեն,  մինչ  Ուաշինկթըն,  արեւմտեան  եւ արաբական կարգ մը պետութիւններ, մէկ կողմէ ծայրայեղականները կը զինեն,  միւս կողմէ  երկխօսութեան կոչ կ’ուղղեն: Ասատ անգամ մը եւս  շեշտեց, թէ Սուրիա յանձնառու  պիտի  մնայ ՄԱԿ-ի  եւ այլ   միջազգային կառոյցներու  հետ  ստորագրած  համաձայնութիւններուն:

 Իրանի նախագահ Հասան Ռոհանի  պատրաստակամութիւն յայտնեց մասնակցելու  «Ժընեւ -2»  խորհրդաժողովին, եթէ առարկութիւններ   չըլլան  անոր  մասնակցութեան դէմ:

LEAVE A REPLY

Please enter your comment!
Please enter your name here