ՄԱՐԶԱԿԱՆ – ՄԱՆՉԵՍԹԸՐ ԵՈՒՆԱՅԹԸՏ ՊԱՐՏՈՒԹԵԱՆ ՄԱՏՆԵՑ ԼԻՎԸՐՓՈՒԼԸ

0
122

Անգլիոյ   «Լիկ Գափ»ի  երրորդ  հանգրուանի մրցումներուն, Մանչեսթըր Եունայթըտ Օլտ Թրեֆորտ մարզադաշտին մէջ  1-0 արդիւնքով պարտութեան մատնեց Լիվըրփուլը եւ հասաւ 1/8-րդ  հանգրուան:   Խաւիյէ  Հերնանտես,  46-րդ  վայրկեանին  նշանակեց Եունայթըտի եւ մրցումին յաղթանակի կոլը:  Միեւնոյն  հանգրուանին, Նիուքասլ Եուանյթըտ՝ 2-0 արդիւնքով պարտութեան մատնեց Լիծ Եունայթըտը:  Պիրմինկհամ Սիթի՝ 3-1 արդիւնքով  պարտութեան մատնեց Սուանսի Սիթին: Սթոք Սիթի՝ 2-0 արդիւնքով  յաղթեց  Թրէյնմըր Ռովըրզին:  Սթիվըն Այրլենտ եւ Փիթըր Գրաուչ նշանակեցին Սթոքի կոլերը:  Արսենալ՝ փենալթի հարուածներով 4-3 արդիւնքով պարտութեան մատնեց  Ուեսթ Պրոմուիչ Ալպիոնը: Լրացուցիչ ժամուն մրցումը աւարտեցաւ 1-1 հաւասարութեամբ:

Ստորեւ,  1/8-րդ  հանգրուանի   մրցումներուն վիճակաձգութիւնը.

Սանտերլանտ –  Սաութեմթըն

Լեսթըր Սիթի  – Ֆուլամ

Մանչեսթըր Եունայթըտ –  Նորուիչ Սիթի

 Պըրնլի –  Ուեսթ Համ Եունայթըտ

 Արսենալ – Չելսի

Թոթենհամ – Հոլ Սիթի

Նիուքասլ Եունայթըտ – Մանչեսթըր  Սիթի

Վերոյիշեալ  հանդիպումները սկզբունքով  պիտի կայանան Երկուշաբթի, 28 Հոկտեմբերին:

Գերմանիոյ   բաժակի  երկրորդ հանգրուանի մրցումներուն Պայերն Միւնիխ  4-1 արդիւնքով  պարտութեան մատնեց  Հանովըր  96-ը:  Թոմաս Միւլըր (2), Գլաուտիօ  Փիցարօ  եւ Ֆրանք Ռիպերի նշանակեցին պաւարիական խումբին կոլերը:

Սպանիոյ  ֆութպոլի ախոյեանութեան  6-րդ  հանգրուանի մրցումներուն, Ռէալ Մատրիտ՝    2-1 արդիւնքով   բախտաւոր  յաղթանակ մը արձանագրեց  Էլչէի դէմ: Քրիսթիանօ Ռոնալտօ նշանակեց  արքայական ակումբին  զոյգ  կոլերը:  Վալենսիա 1-0 արդիւնքով պարտութեան մատնեց  Կրանատային:  Սեւիլիա, սեփական դաշտին մէջ  4-1 արդիւնքով  յաղթեց Ռայօ Վալեքանոյին:

Իտալիոյ ախոյեանութեան  5-րդ  հանգրուանի մրցումներուն, Եուվենթուս  2-1 արդիւնքով պարտութեան  մատնեց Գիեւօն, այս  վերջնոյն  դաշտին մէջ:   Ֆապիօ Քուալիարելա եւ  Ալեքսանտր Պերնարտի ( սեփական բերդին մէջ)  նշանակեցին «Եուվէ»ի կոլերը:  Ռոմա նոյնպէս  մրցակիցի  դաշտին մէջ  տօնեց յաղթանակ, երբ  2-0 արդիւնքով պարտութեան մատնեց Սամփտորիան:  Ա.Սէ. Միլան եւ  Նափոլի արձանագրեցին հաւասարութիւններ: Առաջինը, Պոլոնիայի դէմ՝ 3-3,  երկրորդը՝ Սասուլոյի՝1-1:  Ներկայիս, Ռոմա՝ 15 կէտով  կը գլխաւորէ   ախոյեանութեան  ընդհանուր դասաւորումը: Եուվենթուս եւ Նափոլի  13-ական կէտով կը   հետապնդեն մայրաքաղաքի կազմին:

Ֆրանսայի ֆութպոլի ախոյեանութեան  7-րդ  հանգրուանի մրցումներուն, Փարի Սէն Ժերմէն  մրցակիցի  դաշտին մէջ  1-0 արդիւնքով պարտութեան մատնեց  Վալենսիյէնը:  Հանդիպման միակ կոլը նշանակեց  Ուրուկուէյի հաւաքականի  յարձակող Էտինսոն Գաւանին:  Այս յաղթանակէն  ետք, Լորան Պլանի խումբը 15 կէտով   բարձրացաւ   ընդհանուր դասաւորման  երկրորդ  դիրքին:  Մոնաքօ՝  3-0  արդիւնքով   յաղթանակ մը արձանագրեց  Պասթիայի դէմ:   Ռատամէլ  Ֆալքաօ  (2)  եւ  Էմանուէլ  Ռիվիյէ  նշանակցին Մոնաքոյի կոլերը:  Ֆալքաօ    եղանակի նշանակած կոլերուն թիւը բարձրացուց  7-ի:   Մոնաքօ՝  17 կէտով կը գլխաւորէ  ընդհանուր դասաւորումը: Նանթ, 2-0 արդիւնքով պարտութեան մատնեց Նիսը:

 

LEAVE A REPLY

Please enter your comment!
Please enter your name here