ՊՐՈՔ՝ ՀԱՅԱՍՏԱՆ ԿՈՐՍՆՑՈՒՑԱԾ Է ԻՐ ԵՒՐՈՊԱԿԱՆ ՀԵՌԱՆԿԱՐԸ

0
124

«Ոչ թէ մենք կորսնցուցինք Հայաստանը, այլ Հայաստանը կորսնցուց իր եւրոպական հեռանկարը», «Ազատութիւն» կայանին հետ հարցազրոյցի ընթացքին ըսած է Եւրոխորհրդարանի Արտաքին յարաբերութիւններու յանձնաժողովի նախագահ եւ Եւրոպայի ժողովրդային կուսակցութեան փոխնախագահ Էլմար Պրոք, աւելցնելով, որ Հայաստան «այդ կորուստը կրեց Ռուսիոյ կողմէ հաւանական մեծ ճնշումի պատճառով, որ ապահովական հարցերու առնչուող ճնշում էր, ինչ որ ուղղակի անընդունելի է»:
Երեքշաբթի, Սեպտեմբեր 24ին, Եւրոպական խորհրդարանը քն-նարկեց Եւրոմիութեան Հարեւանութեան ծրագիրի քաղաքականութեան առաջընթացի զեկոյցը: Հայաստանին վերաբերող գլուխը պէտք է վերանայուի՝ նկատի ունենալով Մաքսային միութեան միանալու Հայաստանի որոշումը:
Եւրոխորհրդարանի ամենաազդեցիկ պատգամաւորներէն Եացեք Վոլսքի, որ Հարեւանութեան ծրագիրի ջատագովներէն է եւ Հայաստանի մասով համազեկուցող, խոր ափսոսանք յայտնեց Հայաստանի համար իր եւ Հայաստանի վատնած ջանքերուն ու ժամանակին համար: «Մենք կ՛ափսոսանք Ընկերակցութեան համաձայնագիրի բանակցութիւններուն յաջողութիւն ապահովելու նպատակով Հայաստանի գործադրած ջանքերուն համար, որոնց արդիւնքով բանակցութիւնները աւարտեցան՝ պատրաստելով Հայաստանի հետ համաձայնագիրի նախաստորագրումը, որմէ ետք Հայաստան որոշեց Ընկերակցութեան համաձայնագիրին մաս չկազմել եւ միանալ Ռուսիոյ նախաձեռնած Մաքսային միութեան: Այդ մէկը գերիշխան երկիրի մը որոշում է, եւ մենք կը յարգենք զայն, սակայն կ՛ափսոսանք, որ ի զուր այդքան ջանք եւ ժամանակ տրամադրուեցան», ըսաւ Վոլսքի:
Եւրոխորհրդարանի քանի մը պատգամաւորներ յորդորեցին երես չթեքել Հայաստանէն: Օրինակ, Եւրոմիութիւն-Հայաստան բարեկամական խմբակի ղեկավար Էլենի Թէօխարուս նշեց, որ ինք վստահ չէ, թէ Հայաստան ընտրած է այս ուղին, եւ աւելցուցած է, թէ որոշումը հետեւանք է այն իրողութեան, որ երկիրը մեկուսացուած է եւ երբեմն ստիպուած է իր կամքէն անկախ որոշումներ կայացնելու:
«Մենք պէտք չէ մեր ձեռքերը լուանք, մենք պէտք է օգնենք Հայաստանին, որ վերադառնայ եւրոպական ճանապարհ: Եւրոմիութիւնը նաեւ պէտք է օգնէ Լեռնային Ղարաբաղի հարցով՝ նկատի առնելով ազգերու ինքնորոշման իրաւունքը», նշեց յոյն պատգամաւորը:
Նոյն յորդորը հնչեցուց նաեւ Եւրոխորհրդարանի բրիտանացի պատգամաւոր Չարլզ Տանոք՝ ըսելով, որ Եւրոմիութիւնը պէտք է շարունակէ աջակցիլ Հայաստանին:
Սակայն, Պրոք եւ Վոլսքի լաւատես չեն Հայաստանի հետ համագործակցութեան նոր ձեւաչափ որդեգրելու հաւանականութեամբ: «Մինչ Հայաստան որոշած է Եւրոմիութեան հետ ընկերակցութենէն հրաժարիլ, մենք կը պահպանենք մեր լաւ յարաբերութիւնները, բայց անոնք կրնան ըլլալ այնպիսին, ինչպիսին են շատ այլ երկիրներու հետ, այսինքն՝ սովորական կարգավիճակով», յայտարարեց Վոլսքի:

 

LEAVE A REPLY

Please enter your comment!
Please enter your name here