Կայացաւ Սուրիահայերու Հիմնախնդիրները Համակարգող Յանձնաժողովի նիստը

0
120

 

Սեպտեմբեր 25-ին ՀՀ սփիւռքի նախարար Հրանոյշ Յակոբեանի գլխաւորութեամբ տեղի ունեցաւ  սուրիահայերու հիմնախնդիրները համակարգող յանձնաժողովի նիստը:

Սուրիայէն ժամանած ապաստան հայցողներու հետ տարուող աշխատանքներու վերաբերեալ զեկուցումով հանդէս եկաւ ՀՀ ՏԿՆ գաղթականներու պետական ծառայութեան պետ Գագիկ Եգանեան: Ան ներկայացուց թուային տուեալներ իրենց ծառայութեան դիմած
սուրիահայերու վերաբերեալ եւ նշեց, որ ի տարբերութիւն այլ երկիրներու` սուրիահայերու հետ տարուող աշխատանքը իրականացուած է բաւականին  արագ, փորձած են աւելի  սրտցաւ եւ ուշադիր ըլլալ:

ՀՀ սփիւռքի նախարարութեան Մերձաւոր եւ միջին արեւելքի երկիրներու վարչութեան պետ Լուսինէ Ստեփանեան ներկայացուց «Նոր Հալէպ» թաղամասի կառուցման նպատակով ՀՀ կառավարութեան 2013թ. յունիս 6-ի 656-ն որոշման կատարման ընթացքի վերաբերեալ տեղեկատուութիւն: Նշուեցաւ, որ լուծուած է հողայատկացման հարցը, այժմ կ’ընթանան տարածքի երկրաբանական հետազօտութիւնները:
Աւարտին կը մօտենան նախագծային աշխատանքները: Ամերիկայի հայ աւետարանչական ընկերակցութեան կատարած աշխատանքներուն վերաբերեալ հաղորդումով հանդէս եկաւ Հայ աւետարանչական ընկերակցութեան նախագահ Յարութիւն Ներսիսեան: Ան պատրաստակամութիւն յայտնեց աջակցիլ թաղամասի կառուցման:

Ամփոփելով նիստը` ՀՀ սփիւռքի նախարարը նշեց որ սուրիահայերու համար առաջնահերթ խնդիր կը մնայ կացարանով ապահովելու հարցը: Քննարկման ընթացքին անդրադարձ եղաւ նաեւ սուրիահայ ուսանողներու կրթաթոշակներու փոխհատուցման, մայրենի լեզուի ուսուցման լրացուցիչ ծրագիրներ կազմելու հարցերուն:

LEAVE A REPLY

Please enter your comment!
Please enter your name here