ՄԱՐԶԱԿԱՆ – ՄԱՆՉԵՍԹԸՐԻ ՀՍԿԱՆԵՐԸ ԵՒ ՌԷԱԼ ՄԱՏՐԻՏ ՊԱՐՏՈՒԵՑԱՆ

0
216

Անգլիոյ   Ֆութպոլի ախոյեանութեան  6-րդ հանգրուանի մրցումներուն, Արսենալ՝ 2-1 արդիւնքով պարտութեան մատնեց Սուանսի Սիթին եւ սկսաւ գլխաւորել ախոյեանութեան ընդհանուր  դասաւորումը: Սերժ Նապի եւ Աարոն  Ռամզի  նշանակեցին « Կանըրզ»ներուն կոլերը:  Վեց հանդիպումներէ  ետք, Արսենալ հաւաքած է  15  կէտ:   Մանչեսթըր Եունայթըտ, սեփական դաշտին մէջ, 2-1 արդիւնքով պարտութիւն մը կրեց Ուեսթ Պրոմուիչ Ալպիոնէն: Ալպիոն՝  վերջին անգամ  1978-ին յաղթած  էր  «Կարմիր Սատանաներ»ուն:   Ուէյն  Ռունի՝ նշանակեց Եունայթըտի կոլը,  Մորկան  Ամալֆիթանօ եւ Այտօ  Փերախնիօ՝ Ուեսթ Պրումուիչ Ալպիոնի:  Միւս կողմէ  Մանչեսթըր Սիթի  3-2 արդիւնքով պարտութիւն մը կրեց  Ասթոն Վիլայէն:  Լոնտոնի մէջ, Թոթենհամ ընդունեց Չելսին:  Հետաքրքրական այս  հանդիպումը վերջ գտաւ  1-1 հաւասարութեամբ:  Կոլֆի  Սիկուրտսըն  յառաջ մղեց Թոթենհամը:  Ճոն Թերրի  հաւասարեցուց  հաշիւը:  Թոթենհամ   ունի  13  կէտ: Չելսի՝ 11

Սպանիոյ  ֆութպոլի ախոյեանութեան  7-րդ  հանգրուանի մրցումներուն, ամենահետաքրքրական  հանդիպումը կայացաւ  մայրաքաղաք՝ Մատրիտի մէջ, ուր  տեղւոյն Ռէալը, Սանթիակօ Պեռնպաօ   մարզադաշտին մէջ ընդունեց   Աթլեթիքօ  Մատրիտը:  Արքայական ակումբը   եղանակի  առաջին պարտութիւնը  կրեց Աթլեթիքոյի առջեւ:  Ա. Կիսախաղի 11-րդ  վայրկեանին,  Աթլեթիքոյի յարձակող Տիէկօ Գոսթայի  նշանակած  կոլը  բաւարար էր, որ Տիէկօ Սիմէոնէի  խումբը արձանագրէ   եղանակի  7-րդ  յաջորդական  յաղթանակը եւ  21  կէտով  հաւասարի Պարչելոնային:   Աթլեթիքօ ցուցադրեց  ինքնավստահ խաղ: Արդիւնքը կրնար  կրկնապատկուիլ  եթէ  Ռէալի  բերդապահ  Տիէկօ Լոփէզ  չցուցաբերեր արթնութիւն:   Նշենք, թէ Սպանիոյ  ախոյեանութեան գծով, Աթլեթիքօ Մատրիտ  վերջին անգամ  1995-ին  յաղթած էր Ռէալին:  Ռէալ Մատրիտ ներկայիս  16 կէտով  կը գրաւէ   ընդհանուր դասաւորման   3-րդ դիրքը:   Պարչելոնայի այժմու կազմը  արձանագրեց  ակումբի պատմութեան   լաւագոյն  մեկնարկը, երբ  ախոյեանութեան 7-րդ հանգրուանին  2-0 արդիւնքով պարտութեան մատնեց  Ալմերիան, արձանագրելով  յաջորդական  7-րդ յաղթանակը: :  Լիոնէլ Մեսի եւ Ատրիանօ նշանակեցին Պարչելոնայի կոլերը: Գաթալոնական խումբին արժանթինցի յարձակող Լիոնէլ Մեսի, հանդիպման   28-րդ վայրկեանին վնասուածք ստանալով    լքեց մրցումը:  Բժիշկները  յայտնեցին, թէ  26-ամեայ  արժանթինցին ստացած է  մկանային  վնասուածք  եւ պիտի  բացակայի  Երեքշաբթի՝ 1 Հոկտեմբերին, «Չեմփիընզ Լիկ»  մրցաշարքի  գծով, Սելթիքի դէմ հանդիպումէն:  Ռէալ  Սոսիետատ –  Սեւիլիա  հանդիպումը վերջ գտաւ  1-1   հաւասարութեամբ:

Գերմանիոյ ֆութպոլի ախոյեանութեան   7-րդ հանգրուանի  մրցումներուն,  Պորուսիա Տորթմունտ    հինգ անպատասխան  գնդակ զետեղեց Ֆրայպուրկի  բերդին մէջ:   Մարքօ Ռոյս(2), Ռոպերթ Լեւանտովսքի (2) եւ  Եաքուպ  Պլաշչիքովսքի  նշանակեցին Տորթմունտի կոլերը:  Մրցումէն   ետք,  Տորթմունտի  մարզիչ  Եուրկէն Գլոպ յայտարարեց, թէ  Նափոլիի դէմ պարտութիւնը լաւ դաս մը եղած էր իր խումբին համար:

Պայերն Միւնիխ՝ 2-0 արդիւնքով պարտութեան մատնեց  Հանովըր  96-ը:  Սիմոն  Ռոլֆէս եւ Սիտնէյ  Սէմ նշանակեցին պաւարիական խումբին կոլերը:  Ներկայիս,  Պորուսիա ե Պայերն՝ 19-ական կէտով  կը գլխաւորեն  ախոյեանութեան  ընդհանուր դասաորումը:  Այնթրախթ  Ֆրանքֆորթ 2-2 արդիւնքով հաւասարութիւն մը արձանագրեց  Համպուրկի  դէմ:   Հոլանտացի   Պերթ Վան  Մարվէյք իր պաշտօնական  առաջին  մրցումը կը կատարէր  Համպուրկի գլխաւոր  մարզիչի  պաշտօնով:  Ներկայիս  Համպուրկ ունի 5 կէտ, Այնթրախթ՝  7:

Իտալիոյ  ֆութպոլի ախոյեանութեան  6-րդ հանգրուանի մրցումներուն, Ճենովայի դէմ  Կորան Փանտեւի «տուպլը»   2-0 արդիւնքով յաղթանակ մը պարգեւեց  Նափոլիին :   Նափոլիի կազմէն  թեթեւ վնասուածքի  հետեւանքով կը  բացակայէր  արժանթինցի յարձակող Կոնսալօ Հիկուայինը:  Նափոլի  ներկայիս   ունի  16 կէտ:  Ա.Սէ. Միլան՝ Սան Սիրօ մարզադաշտին մէջ 1-0 արդիւնքով  պարտութեան մատնեց Սամփտորիան:  Միլանցիներուն  յաղթանակի կոլը նշանակեց  Սլովենիոյ հաւաքականի միջնապահ  Վալթէր  Պիրսան: Միլան ներկայիս հաւաքած է   ութ կէտ:

Ֆրանսայի  ֆութպոլի ախոյեանութեան  8-րդ  հանգրուանի մրցումներուն,  Փարի Սէ Ժերմէն՝   2-0 արդիւնքով  յաղթանակ մը արձանագրեց  Թուլուզի դէմ:  Մարքինիոս եւ Էտինսոն  Գաւանի  նշանակեցին  փարիզցիներուն կոլերը:  Մարսէյ՝  2-0 արդիւնքով պարտութեան  մատնեց Լօրիանը:  Փարի Սէն Ժերմէն  ներկայիս   հաւաքած է   18 կէտ:  Մարսէյ՝ 17: Լիլ – Լիոն  ճակատումը  վերջ գտաւ  0-0  հաւասարութեամբ:  Լիլ, ներկայիս  ունի 14 կէտ,  Լիոն՝  11 կէտով կը գրաւէ  8-րդ դիրքը:

 Սէն Թեթիէն, սեփական դաշտին մէջ  2-2 արդիւնքով հաւասարութիւն մը արձանագրեց Պասթիայի դէմ:  

Ռուսիոյ ախոյեանութեան  11-րդ հանգրուանի մրցումներուն, Սան Փեթերսպուրկի Զենիթը  4-2 արդիւնքով պարտութեան մատնեց  Մոսկուայի Սպարտակը:  Սոյն  յաղթանակէն ետք, Զենիթ  26 կէտով   սկսաւ գլխաւորել ընդհանուր  դասաւորումը:  Սպարտակ՝  23 կէտով կը գրաւէ   երկրորդ դիրքը: Հայաստանի հաւաքականի անդամ Եուրա Մովսիսեան  նշանակեց Սպարտակի  երկրորդ կոլը:

Հայաստանի ախոյեանութեան  7-րդ հանգրուանի մրցումներուն, Երեւանի Արարատը 1-0արդիւնքով պարտութեան մատնեց  Փիւնիկը, այս  վերջնոյն  դաշտին մէջ եւ  14 կէտով սկսաւ միանձնեայ գլխաւորել  ընդհանուր  դասաւորումը:   Արարատի կոլը նշանակեց Ալեքսանտր Ռաքիչ:  Պարտութիւնը՝  Փիւնիկի առաջիննն էր ընթացիկ տարեշրջանին: Ներկայիս, ան  12 կէտով կը գրաւէ ընդհանուր  դասաւորման  2-րդ  դիրքը:   Միկա- Շիրակ  ճակատումը վերջ գտաւ  2-2 հաւասարութեամբ:  Շիրակ՝  ինը կէտով կը գրաւէ  ընդհանուր դասաւորման  5-րդ դիրքը:

LEAVE A REPLY

Please enter your comment!
Please enter your name here