ԽԱՌՆ ՊԱՏԳԱՄՆԵՐ ԿԸ ԽԱՆԳԱՐԵՆ ԿԱՌԱՎԱՐՈՒԹԵԱՆ ԿԱԶՄՈՒԹԻՒՆԸ

0
112

 Նորանշանակ  վարչապետ Թամամ Սալամ  իր այցելուներուն յայտնեց, թէ որեւէ  նորութիւն չունի  փոխանցելիք  կառավարութեան  կազմութեան առնչութեամբ, սակայն  բնականոն  ձեւով  կը շարունակէ իր   շփումները:  Այս անորոշութեան մէջ,  քաղաքական  բեմին վրայ վերստին  պիտի  բարձրանայ ազգային երկխօսութեան սեղան վերադառնալու  խորհրդարանի նախագահ Նեպիհ Պըրիի   նախաձեռնութիւնը:  Շատ հաւանաբար,  Պըրրի յառաջիկայ  ժամերուն այցելութիւն մը կատարէ   Պաապտայի պալատ՝  հանրապետութեան  նախագահին  իրազեկելու  խորհրդարանական խմբաւորումներուն հետ ունեցած խորհրդակցութիւններուն   մթնոլորտը: Պըրրի, միաժամանակ  երկրորդ  հանդիպում մը  պիտի ունենայ Մուսթաքպալ Հոսանքի պետ  Ֆուատ Սինիորայի հետ:  Նշենք, թէ  նախագահ Սըլէյման  նոյնպէս օգտաշատ  կը գտնէ երկխօսութիւնը եւ այն համոզումը ունի, որ  երկխօսութիւնը  զանազան հարցերու շուրջ   հասկացողութեան եզրեր  կրնայ ստեղծել   եւ դիւրացնել նոր կառավարութեան  կազմութիւնը:  Լիբանանեան Ուժեր Կուսակցութեան գործադիր խորհուրդի պետ Սամիր Ժաաժա  անընդունելի նկատեց  երկիրը առանց կառավարութեան  թքելու ւ  վիճակը:

Սալամ  երէկ առաւօտեան, Մըսայթպէյի  իր բնակարանին մէջ  ընդունեց Ֆրանսայի արտաքին գործոց նախարարութեան կից  արտերկրի  ֆրանսացիներու  հարցերով զբաղող նախարար  Էլին Մուրէն,  տնտեսական յանձնախումբերը ներկայացնող պատուրիակութիւն մը, նախկին նախարար Ատնան Քասարի ընկերակցութեամբ:  Սալամ իր այցելուներուն հետ քննարկեց  երկրին  տնտեսական եւ   ընկերային իրավիճակը,  ինչպէս նաեւ   քաղաքացիներուն  կենցաղային  պայմանները բարելաւելու կարելիութիւնները:  Սալամ նաեւ   ընդունեց   երեսփոխան Նեպիլ Տը Ֆրէյժը, նախկին  նախարար Ֆաուզի Հըպէյշը եւ այլ անձնաւորութիւններ:

LEAVE A REPLY

Please enter your comment!
Please enter your name here