ՄԱՐԶԱԿԱՆ: «ՉԵՄՓԻԸՆԶ ԼԻԿ» – ՊԱՐՉԵԼՈՆԱ, ԱՐՍԵՆԱԼ ԵՒ ՏՈՐԹՄՈՒՆՏ ԱՐՁԱՆԱԳՐԵՑԻՆ ՓԱՅԼՈՒՆ ՅԱՂԹԱՆԱԿ

0
126

Եւրոպայի Ախոյեան Ակումբներու Ախոյեանութեան «Չեմփիընզ Լիկ»  բաժակի   խմբային մրցումներուն,Ե.Խմբակին մէջ,   Չելսի  4-0 արդիւնքով մեծ յաղթանակ մը արձանագրեց Սթեուա Պուքարեսթի դէմ, այս  վերջնոյն  դաշտին մէջ:  Ռամիրէզ(2), Ֆրանք Լամփարտ եւ  Տանիէլ  Կէորկեւսկի (սեփական բերդէն ներս) նշանակեցին լոնտոնեան կազմին կոլերը:  Միւենոյն  խմբակին մէջ,  Շալքէ 04՝  1-0 արդիւնքով պարտութեան մատնեց Պասէլը:  Եուլիան Տրաքսլէր նշանակեց գերմանական կազմին  կոլը:

 Զ. Խմբակին մէջ  Պորուսիա Տորթմունտ  3-0 արդիւնքով տպաւորիչ  յաղթանակ մը արձանգրեց Մարսէյի դէմ:  Ռոպերթ Լեվանտովսքի (2) եւ  Մարքօ Ռոյս նշանակեցին  Տորթմունտի կոլերը:   Տորթմունտի մարզիչ Եուրկէն Գլոպ    լրագրողներուն  յայտնեց, թէ իր խումբը կատարած էր իր վրայ դրուած պարտականութիւնը:  Միւենոյն խմբակին մէջ, Արսենալ   ընդունեց Նափոլին: Անգլիացիները ցուցադրեցին  բացառիկ  խաղ եւ  երկու անպատասխան գնդակ զետեղեցին իտալական խումբին  բերդին մէջ:  Մեսութ Օզիլ եւ  Օլիվիյէ Ժիրու  նշանակեցին «Կանտըրզ»ներուն կոլերը:  Նափոլիի մարզիչ Ռաֆայէլ Պենիթէզ ըսաւ,թէ   իր կազմը ստացած  երկու կոլերէն ետք յուսահատած  էր:

 Է. Խմբակին մէջ,  Սան Փեթերսպուրկի Զենիթը  չկրցաւ իր դաշտին մէջ  պարտութեան մատնել Աւստրիա Վիեննան: Հանդիպումը  վերջ  գտաւ 0-0  հաւասարութեամբ: Երկու  հանդիպումներէ ետք,  Զենիթ եւ Աւստրիա Վիեննա  հաւաքած են մէկական կէտ:  Միեւնոյն խմբակին մէջ, Աթլեթիքօ Մատրիտ, մրցակիցի  դաշտին մէջ  2-1 արդիւնքով պարտութեան մատնեց Պորտօն:  Տիէկօ   Գոսթա եւ  Արտա  Թուրան նշանակեցին սպանական խումբին կոլերը: Աթլեթքիօ ունի  վեց կէտ:  Պորտօ՝ երեք:

Ը. Խմբակին մէջ,  Պարչելոնա  1-0 արդիւնքով պարտութեան մատնեց  Սելթիքը:   Կլասքոյի մէջ  տեղի ունեցող  սոյն  մցումին   միակ  կոլը նշանակեց Պարչելոնայի կիսապաշտպան Սեսք Ֆապրեկասը :  Հանդիպումէն ետք, Պարչելոնայի մարզիչ Ճերարտօ Մարթինօ  ըսաւ, թէ իր խումբը  ցուցադրած էր  մրցաշրջանին  լաւագոյն  մրցումը:  Միւենոյն  խմբակին մէջ,   Այաքս Ամսթերտամ սեփական դաշտին մէջ  1-1 արդիւնքով հաւասարութիւն  մը արձանագրեց Ա.Սէ. Միլանի դէմ:  Սթեֆանօ Տենիսով՝ 90-րդ վայրկեանին յառաջ մղեց    հոլանտական խումբը:  Իտալացիները   մրցումի  հաշուած  վայրկեաններուն հաւասարեցան՝  Մարիօ Պալոթելիի նշանական  փենալթիին շնորհիւ:

ՎԱԼՏԷԶ ՊԻՏԻ  ԼՔԷ  ՊԱՐՉԵԼՈՆԱՆ

 Գաթալոնական Պարչելոնա խումբի   բերդապահ  Վիքթոր Վալտէզ յայտարարեց, թէ   շատ  մօտ ապագային  պիտի   կրէ  Մոնաքոյի շապիկը:  30-ամեայ Վալտէզ պիտի  կնքէ չորս տարուան  պայմանագրութիւն  մը  եւ  իւրաքանչիւր տարի  պիտի ստանայ   10   միլիոն եուրօ գումար աշխատավարձ:

ԴԱՒԻԹ  ՆԱԼՊԱՆՏԵԱՆ  ԱՒԱՐՏԵՑ ԱՍՊԱՐԷԶԸ

Հայազգի  Դաւիթ Նալպանտեան որոշեց  լքել   թենիսի ասպարէզը: Արհեստավարժ  թենիսի մէջ Նալպատնեան  շահած է  11 տիտղոս:  2002-ին  ան հասաւ Ուիմպըլտընի մրցաշարքի աւարտականին, սակայն  պարտութիւն կրեց  Լէյթըն Հիութէն: Արժանթինահայ մարզիկը 2013-ի   ընթացքին երկու  ցուցադրական   հանդիպումներ  պիտի   ունենայ Ռաֆայէլ Նատալի հետ:

LEAVE A REPLY

Please enter your comment!
Please enter your name here