ՆՈՅՆԻՍԿ ՄԻՋԱԶԳԱՅԻՆ ԶՕՐԱԿՑՈՒԹԻՒՆԸ ԱՆԶՕՐ ԿԸ ՄՆԱՅ ԼՈՒԾԵԼՈՒ ԿԱՌԱՎԱՐՈՒԹԵԱՆ ՏԱԳՆԱՊԸ

0
108

Նոյնիսկ   Լիբանանին ցուցաբերուած  միջազգային    զօրակցութիւնը   անզօր կը  մնայ  յաղթահարելու նոր կառավարութեան  կազմութեան առջեւ ցցուող արգելքները:  Ներկայիս  այն տպաւորութիւնը ստեղծուած է, թէ  կազմութեան  աշխատանքները նոր թափ պիտի ստանան  Ատհայի տօներէն  ետք՝  Թեհրան – Ռիատ  հնարաւոր մերձեցումի մը լոյսին տակ: Սակայն  քաղաքական  դէտեր կասկածի տակ կ’առնեն  Սէուտական Արաբիա  այցելելու Իրանի նախագահին տրամադրութիւնները:

Պաապտայի  պալատին մէջ ,հանրապետութեան նախագահ Միշէլ  Սըլէյման    իր  երախտագիտութիւնը  յայտնեց  Լիբանանի կողմէ  ներկայացուած  պահանջներուն վերաբերեալ Միջազգային Դրամատան  ցուցաբերած    հոգատարութեան:  Նախագահ  Սըլէյման  սոյն   յայտարարութիւնը կատարեց  Համաշխարհային Դրամատան Միջին Արեւելքի, Ափրիկէի եւ Արեւմտեան Ասիոյ  տնօրէն  Ինկէր Անտերսընը եւ Համաշխարհային Դրամատան Միջին Արեւելքի տնօրէն  Ֆարիտ Պելհաժը  ընդունելու  ընթացքին: Վերջիններերս բարձր գնահատեցին  Լիբանանի ամբողջականութիւնը եւ  կայունութիւնը պահպանելու   նախագահ Միշէլ Սըլէյմանի   ճիգերը: Սըլէյման  միաժամանակ   շնորհակալութիւն յայտնեց  սուրիացի գաղթականներուն  համար   միջազգային  ընտանիքին  ցուցաբերած  մարդասիրական օժանդակութիւններուն:

Պաապտայի պալատ նաեւ  այցելեցին Աքքարի շրջանի երեսփոխաններ   Հետի Հըպէյշը, Խալէտ Զահրեմանը,  Ռիատ  Ռահալը,  Խըտր Հապիպը,   եւ Նիտալ Թաամէն, ինչպէս նաեւ   Ինտոնեզիոյ   ջուրերուն մէջ նաւաբեկումի ենթարկուած  զոհերու  հարազատներէն պատուիրակութիւն մը: Նախագահ Սըլէյման  ընդունեց  հետաքննիչ ատեանի  դատախազի  պաշտօնակատար Սամիր Համուտը եւ այլ անձնաւորութիւններ:

Խորհրդարանի նախագահ Նեպիհ Պըրրի դարձեալ  շեշտեց, թէ   ազգային  երկխօսութիւնը կը մնայ   ներլիբանանեւն  տարակարծութիւնները լուծելու  լաւագոյն  միջոցը:  Պըրրի միաժամանակ  դիտել տուաւ, թէ  նախագահական  ընտրութիւնները  նշուած   ժամանակամիջոցին  պիտի կայանան, իսկ  խորհրդարանի ընտրութիւնները՝ աւելի ուշ:

 

LEAVE A REPLY

Please enter your comment!
Please enter your name here