ՎԼԱՏԻՄԻՐ ՓՈՒԹԻՆ՝ ՍՈՒՐԻՈՅ ՀԱԿԱՄԱՐՏՈՒԹԻՒՆԸ ԼՈՒԾԵԼՈՒ ՔԱՅԼԵՐԸ ՀԱՄԱԿԱՐԳԵԼՈՒ ԿՈՉ ՈՒՂՂԵՑ ՄԻՋԱԶԳԱՅԻՆ ԸՆՏԱՆԻՔԻՆ

0
103

 Ռուսիոյ նախագահ  Վլատիմիր Փութին  միջազգային  ընտանիքէն պահանջեց համակարգել Սուրիոյ  հակամարտութիւնը լուծելու  ուղղութեամբ իրենց քայլերը՝ խուսափելով ուժ  կիրառելու  սենարիոյէն: Ան  դիտել տուաւ, թէ  քայլերը   համադրելու պարագային, ուժ  գործածելու  անհրաժեշտութիւն չի  մնար  Սուրիոյ մէջ:

Իր կարգին, Ռուսիոյ արտաքին  գործոց  նախարար Սերկէյ Լաւրով,  Սուրիոյ ընդդիւմութիւնը   զէնքով եւ  տնտեսական  օժանդակութեամբ  հովանաւորող  պետութիւններուն կոչ   ըրաւ՝  դադրեցնելու   այդ  օժանդակութիւնները  եւ պատրաստուիլ  «Ժընեւ -2» խորհրդաժողովին: Լաւրով  ըսաւ, թէ Մոսկուա անըդնունելի կը նկատէ  ռազմական  օժանդակութեան կոչերը: Ռուսիոյ արտաքին գործոց նախարարը առանց անուններ յիշատակելու ցաւ յայտնեց, որ  Միջին Արեւելքի   շարք մը երկիրներ   սերտ  յարաբերութիւններ կը պահպանեն Սուրիոյ մէջ գործող  Ճապհաթ Ալ Նուսրա ահաբեկչական կազմակերպութեան  հետ:

 Ռազմական գետնի վրայ, ծայրայեղականները,  գլխատեցին   հիւսիսային  Սուրիոյ Ռաքա  քաղաքին մէջ՝  ապպասեան վերջին Խալիֆէ  Հարուն Ալ  Ռաշիտի  արձանը: Նշենք, թէ  ամիսներ առաջ անոնք  քանդեցին  Ապու Ալլա Ալ Մահարիի արձանը:

Սուրիոյ տարբեր  շրջաններու մէջ   կատաղի բախումներ  տեղի  կ’ունենան  մէկ կողմէ՝ բանակին եւ  այսպէս կոչուած Սուրիոյ ազատ  բանակի  զինեալներուն միջեւ, միւս կողմէ՝  ազատ բանակին եւ  Ալ  Քայիտայի  զինեալներուն միջեւ:

LEAVE A REPLY

Please enter your comment!
Please enter your name here