ՊԱՆ ՔԻ ՄՈՒՆ Կ’ԱՐԺԵՒՐՈՐԷ ՍՈՒՐԻՈՅ ՀԱԿԱՄԱՐՏՈՒԹԵԱՆ ԸՆԹԱՑՔԻՆ ԼԻԲԱՆԱՆԻ ՉԷԶՈՔ ԴԻՐՔԸ

0
97

Հրաժարեալ վարչապետ Նեժիպ Միքաթի Նիւ Եորքի մէջ  հանդիպում մը ունեցաւ  ՄԱԿ-ի ընդհանուր  քարտուղար Պան Քի Մունի հետ: Քի Մուն վերահաստատեց  Լիբանանի  անկախութիւնը եւ գերիշխանութիւնը պաշտպանելու  միջազգային  ընտանիքին յանձնառութիւնը, ինչպէս նաեւ Լիբանանին  քաղաքական ու  տնտեսական  օժանդակութիւն  տրամադրելու  խոստումները: ՄԱԿ-ի ընդհանուր քարտուղարը միաժամանակ  խոստացաւ  մարդասիրական  օժանդակութիւն առաքել Լիբանան ապաստանած  սուրիացի գաղթականներուն: Ան նաեւ  դրուատեց   Սուրիոյ հակամարտութեան հանդէպ չէզոք  քաղաքականութիւն վարելու  հանրապետութեան նախագահին եւ  վարչապետին   կեցուածքը:

ՄԱԿ-ի ընդհանուր  քարտուղարի  խորհրդական  Ճեֆրի Ֆելթման  դիտել տուաւ, թէ  հանրապետութեան նախագահ Միշէլ Սըլէյմանի արժանի  է  յատուկ  դրուատանքի, որովհետեւ  Նիւ Եորք կատարած վերջին  այցելութեան ընթացքին, լուրջ փորձեր կատարած է  Լիբանանը  հեռու պահելու  Սուրիոյ  հակամարտութենէն:   Ֆելթման միաժամանակ  յայտնեց, թէ   բաւական  դժուար պիտի  ըլլայ առանց  Իրանի մասնակցութեան խաղաղութեան համաձայնութիւն  գոյացնել  Սուրիոյ մէջ:

Լիբանանի  մէջ ներկայիս այն  տպաւորութիւնը ստեղծուած է, որ  Միջազգային Դրամատունը  պատրաստակամութիւն պիտի  ցուցաբերէ  օժանդակելու   լիբանանեան հաստատութիւններուն: Սոյն  նախատեսութիւնները աւելի շօշափելի պիտի դառնան  յառաջիկայ  շաբթուան  ընթացքին,  Նիւ Եորքի մէջ նախատեսուած   Միջազգային Դրամատան եւ Միջազգային Ելեւմտական  Հիմնադրամի  խառն  հանդիպումին, որուն Լիբանանի կողմէ պիտի մասնակցին նախարարներ Մուհամմէտ Սաֆատին, Նիքոլա Նահասը, Կեդրոնական Դրամատան ընդհանուր կառավարիչ  Ռիատ Սալամէն: Պան Քի Մունի հետ հանդիպումը աւարտելէ ետք, Միքաթի  պատրաստակամութիւն յայտնեց  դիւրացնելու  մարդասիրական  օժանդակութիւններու  մուտքը Սուրիա:

LEAVE A REPLY

Please enter your comment!
Please enter your name here