ԼԻԲԱՆԱՆԵԱՆ ԿԱՐՃ ԼՈՒՐԵՐ

0
107

–         Լիբանանեան  օրաթերթեր կը   գրեն, թէ   խորհդարանի նախագահ Նեպիհ Պըրրիի եւ ուժանիւթի նախարարի պաշտօնակատար   Ժըպրան Պասիլի միջեւ  տարակարծութիւնները արգելք կը հանդիսանան ծովային նաւթէն  օգտուելու  վերաբերեալ խորհրդարանական նիստ մը գումարելու գիգերուն, հակառակ որ  Ուալիտ Ճոմպլաթ հաւանութիւն տուած է  նման նիստ մը գումարելու առաջարկին:

–         Լիբանանեան Ուժեր Կուսակցութեան գործադիր խորհուրդի  պետ Սամիր Ժաաժա անընդունելի նկատեց  տիրող քաղաքական  իրավիճակը եւ յատկապէս կառավարութեան բացակայութիւնը:  Ժաաժա վաղը՝ Երկուշաբթի, հեռատեսիլային   յայտագիրի մը  ընթացքին բաւական կարծր արտայայտութիւններ պիտի ունենայ կառավարութեան ուշացումին առիթով եւ լուրջ  ընտրանքներու առջեւ  պիտի դնէ   նորանշանակ վարչապետ Թամամ Սալամը:

–         Իսրայէլեան բանակի  հիւսիսային զօրքերու հրամանատար Եայիր  Կոլան  դիտել տուաւ, թէ  Հըզպալլայի դէմ  յաջորդ  պատերազմը աւելի  դաժան եւ ճակատագրական պիտի  ըլլայ: Կոլան  նշեց, թէ իսրայէլեան  բանակը դասեր քաղած է  2006-ի պարտութենէն եւ քաջատեղեակ է  Հըզպալլայի կարողութեան:

–         Միջազգային Դրամատան Միջին Արեւելքի եւ հիւսիսային Ափրիկէի  փոխնախագահ Ինկէր  Անտերսըն  հերքեց  Լիբանանին  մատուցուելիք միջազգային  օժանդակութիւնները Հըզպալլան զինաթափելով պայմանաւորելու  մասին տեղեկութիւնները:  Անտերսըն դիտել տուաւ, թէ Միջազգային Դրամատունը ուշադրութիւն չի դարձներ  նման  երեւոյթներու  եւ կը գործակցի   184  պետութիւններու հետ:

–         ՄԱԿ-ի մօտ Լիբանանի  ներկայացուցիչ Նաուաֆ Սալամ յայտնեց,թէ յառաջիկայ  օրերուն ՄԱԿ-ի պատուիրակութիւն մը պիտի  ժամանէ Լիբանան՝ Սուրիա փոխադրուելիք մարդասիրական  օժանդակութիւններուն  գործընթացին հետեւելու նպատակով:

–         Ելեւմտական  հարցերու  հրաժարեալ նախարար Մուհամմէտ Սաֆատի  գրաւոր  նամակ մը  փոխանցեց   հրաժարեալ վարչապետ Նեժիպ Միքաթիին, պահանջելով  երեք  վճարումներու միջոցաւ փակել Լիբանանի կողմէ   Միջազգային Ատեանին  2013 թուականի  պարտաւորութիւնները:

–         Զինուորական ատեանը  մահավճիռ արձակեց  լիբանանցի սպայ  Ղասան  Ալ Ճըտի դէմ՝  Իսրայէլի հաշւոյն  լրտեսութեան  յանցագործութեամբ ձերբակալուելու   եւ խոստովանելու  պատճառով:

 

LEAVE A REPLY

Please enter your comment!
Please enter your name here