ՄԱՐԶԱԿԱՆ – ՊԱՐՉԵԼՈՆԱ, ԱԹԼԵԹԻՔՕ ԵՒ ՌՈՄԱ ԿԸ ՊԱՀԵՆ ՀԱՐԻՒՐ ԱՌ ՀԱՐԻՒՐ ՑՈՒՑԱՆԻՇ

0
153

Անգլիոյ  ֆութպոլի ախոյեանութեան  եօթներորդ  հանգրուանի մրցումներոն, Արսենալ՝  1-1 արդիւնքով հաւասարութիւն մը արձանագրեց Ուսթ Պրումուիչ Ալպիոնի   հետ, այս  վերջնոյն դաշտին մէջ:  Գլաուտիօ Եաքոպ  յառաջ  մղեց   հիւրընկալ խումբը: Սակայն  Ճէք Ուիլշայր  հաւասարեցուց  արդիւնքը:  Շնորհիւ  սոյն հաւասարութեան, Արսենալ՝ 16 կէտով կը  գլխաւորէ  ախոյեանութեան  ընդհանուր դասաւորումը: Լիվըրփուլ նոյնպէս 16-ի բարձրացուց իր կէտերը, երբ  սեփական դաշտին մէջ 3-1  արդիւնքով պարտութեան մատնեց   Գրիսթալ Փալասը:   Լուիս Սուարէզ, Տանիէլ  Սթարիճ եւ  Սթիվըն Ճեռարտ նշանակեցին «Կարմիրներ»ուն կոլերը: Լիվըփուլի խմբապետ Սթիվըն Ճեռարտ  «Կարմիրներ»ու շապիկով կատարեց  իր 639-րդ  մրցումը:   Չելսի, մրցակիցի դաշտին մէջ 3-1  արդիւնքով պարտութեան մատնեց Նորուիչ Սիթին:  Օսքար, Հազարտ եւ Վիլիան նշանակեցին «Կապոյտներ»ուն կոլերը:  Սոյն յաղթանակին շնորհիւ, Չելսի  14-ի բարձրացուց իր  հաւաքած կէտերը:  Ուեսթ Համ Եունայթըտ՝ 3-0 արդիւնքով անակնկալ  յաղթանակ մը արձանագրեց Թոթենհամի  դէմ:

Մանչեսթըր Եունայթըտ մրցակիցի դաշտին մէջ 2-1  արդիւնքով պարտութեան մատնեց  Սանտերլանտը:   5  Հոկտեմբերին,  18  տարիքը նոր  թեւակոխած  պելճիքացի Ատնան  Եանուզայ, Մանչեսթըր Եունայթըտի հետ կատարած առաջին պաշտօնական  մրցումին  ընթացքին   նշանակեց  «Կարմիր Սատանաներ»ու զոյգ  կոլերը: Ան դարձաւ առաջին  մրցումին,  երկու կոլ նշանակող  Մանչեսթըր Եունայթըտի  ամենաերիտասարդ ֆութպոլիստը: Մրցումէն  ետք, Մանչեսթըր  Եունայթըտի մարզիչ  Տէյվիտ Մոյս  յայտարարեց, թէ Ատնան  Եանուզայ  իսկական տաղանդ մըն է: Կ’արժէ նշել, որ   չորս երկիրներ՝  Անգլիա, Պելճիքա,  Ալպանիա եւ Խրուաթիա  քաղաքացիութիւն շնորհելու պատրաստակամութիւն յայտնած են Եանուզային: Վերջինս  պաշտօնապէս  մերժած է  Պելճիքայի առաջարկը, իսկ  անգլիական  հպատակութիւն ընդունելու պարագային, երկրի սահմանադրութիւնը կ’ըսէ, թէ առնուազն հինգ տարի մնայուն  Բրիտանիոյ մէջ  ապրած  պարտի  ըլլալ, որպէսզի   կրէ հաւաքականին շապիկը: Ըստ  լրատուաական  աղբիւրներու, Եանուզայ  պիտի  դիմէ  բրիտանական  քաղաքացիութեան, սակայն միայն 23 տարեկանին պիտի սկսի կրել Անգլիոյ ազգային խումբին շապիկը: Մանչեսթըր Եունայթըտ ներկայիս տասը  կէտով կը  գրաւէ ընդհանուր դասաւորման 9-րդ դիրքը:

Մանչեսթըր Սիթի սեփական դաշտին մէջ 3-1  արդիւնքով պարտութեան մատնեց Փըրըմիյէրշիփի մէջ ցարդ  անպարտելի միակ խումբին՝ Էվըրթընին: Վերջինս՝  Ռոմելու Լուքաքոյի  միջոցաւ նշանակեց մրցումին առաջին կոլը, սակայն Ալվարօ Նեկրետոյի եւ Սերժիօ Ակուերոյի (2) կողմէ  յաջորդական երեք կոլերը շատ կարեւոր  յաղթանակ մը պարգեւեցին Սիթիին:  Մանչեսթըր Սիթի ներկայիս  ունի 13  կէտ, Էվըրթըն՝ 12:

Սպանիոյ ֆութպոլի ախոյեանութեան 8-րդ  հանգրուանի մրցումներուն,   Պարչելոնա, սեփական դաշտին մէջ  4-1 արդիւնքով  պարտութեան մատնեց  Վալատոլիտը: Նշենք,թէ  գաթալոնական խումբէն վնասուածքի հետեւանքով կը բացակայէր  Արժանթինի հաւաքականի յարձակող Լիոնէլ Մեսին: Հանդիպման առաջին կոլը նշանակեց  Վալատոլիտը՝  Խաւի Գերանի միջոցաւ: Սակայն չորս վայրկեան ետք, Ալեքսիս  Սանչէս հաւասարեցուց   հաշիւը, ապա՝ Զաւի, դարձեալ՝  Սանչէս եւ Նէյմար  վճռեցին  մրցումին ելքը:  Ներկայիս,  Պարչելոնա, կատարած ութ  մրցումներէն ապահոված  է առաւելագոյն՝   քսան չորս  կէտ: Երկրորդ  դիրքի վրայ  գտնուող  Աթլեթիքօ Մատրիտ սեփական  դաշտին մէջ ընդունեց Չելթա Վիկօն: Յարձակող Տիէկօ Գոսթայի «տուպլ»ը  2-1  արդիւնքով  յաղթանակ մը  շնորհեց  Աթլեթիքոյին, որ  Պարչելոնայի նման, արձանագրեց  յաջորդական  ութերորդ յաղթանակը:  Ռէալ   Մատրիտ  դարձեալ բախտաւոր յաղթանակ մը արձանագրեց, երբ   3-2 արդիւնքով պարտութեան մատնեց   Լեվանթէն: Արքայական ակումբը  մրցումի մինչեւ  86-րդ վայրկեանը  ետ կը  մնար հաշիւին մէջ, սակայն  շնորհիւ Ալվարօ Մորալեսի՝ 90-րդ   եւ Քրիսթիանօ Ռոնալտոյի՝  94-րդ վայրկեաններուն նշանակած կոլերուն,  յաղթանակով հեռացաւ դաշտէն:

Գերմանիոյ  ֆութպոլի ախոյեանութեան  ութերորդ հանգրուանի մրցումներուն, Պորուսիա Տորթմունտ կրեց եղանակի առաջին պարտութիւնը, երբ  2-0 արդիւնքով  խոնարհեցաւ  Պորուսիա Մէօնշենկլատպախի  առջեւ: Մաքս Քրուզէ եւ  Ռաֆայէլ նշանակեցին  Մէօնշենկլատպախի  կոլերը:   Տորթմունտի մարզիչ Եուրկէն  Կլոպ, մրցումէն  ետք յայտարարեց, թէ իր մարզիկներն  էին  պարտութեան  գլխաւոր  պատասախանատուն: Պայերն Միւնիխ եւ Պայեր Լեվերքուզեն չկրցան օգտուիլ Տորթմունտի պարտութենէն, երբ անոնց միջեւ կայացած ճակատումը  վերջ գտաւ  1-1 արդիւնքով  հաւասարութեամբ:  Տոնի  Կրոս, 29-րդ վայրկեանին    յառաջ մղեց  Լեվերքուզենը, սակայն  երկու վայրկեան ետք  Սիտնէյ  Սէմ հաւասարեցուց  հաշիւը:  Համպուրկ  մրցակիցի  դաշտի մէջ 5-0  արդիւնքով պարտութեան մատնեց Նիւրենպերկը:

Իտալիոյ ֆութպոլի ախոյեանութեան եօթներորդ  օրուան մրցումներուն, Ռոմա ունեցաւ տպաւորիչ  ելոյթ  մը, երբ Սան  Սիրօ մարզադաշտին մէջ  3-0  արդիւնքով պարտութեան մատնեց տեղւոյն  Ինթէր Միլանը:  Ֆրանչեսքօ Թոթի (2) եւ Ալեսանտրօ Ֆլորենցի  նշանակեցին  Ռոմայի կոլերը: Մայրաքաղաքի կազմը  եօթ  մրցումներէ ետք ապահոված է  քսանմէկ կէտ:   Նափոլի՝ 4-0  արդիւնքով  պարտութեան մատնեց   Լիվորնօն:  Փանտեւ,  Ինլէր,  Քալէխոն եւ  Համշիք նշանակեցին  Նափոլիի կոլերը, որ այս  յաղթանակէն ետք  19-ի բարձրացուց իր  կէտերը: Անցեալ տարուան ախոյեան Եուվենթուսի կազմը 3-2 արդիւնքով կարեւոր  յաղթանակ մը  արձանագրեց  Ա.Սէ. Միլանի դէմ՝  Փիրլօ, Ճովինքօ եւ Քելինի նշանակեցին «Ծեր Պառաւ»ին կոլերը: Սալի Մունթարի՝ Միլանի:  «Եուվէ»  19 կէտով կը գրաւէ ընդհանուր դասաւորման  երրորդ դիրքը:

Ֆրանսայի ախոյեանութեան  իններորդ  օրուան մրցումներուն,  Մոնաքօ 2-1   դժուար յաղթանակ մը տարաւ Սէն Թեթիէնի  դէմ:   Եանիք  Քարաստ, 15-րդ վայրկեանին  նշանակեց Մոնաքոյի եւ  մրցումին առաջին կոլը: Լուքաս  Օքամփոս՝ 49-րդ  վայրկեանին հաւասարեցուց հաշիւը: Դաշտի  տէրերը  մրցումի միայն  87-րդ վայրկեանին նշանակեցին  յաղթանակի կոլը:   Մոնաքոյի կազմը  ինը մրցումներէ ետք  հաւաքած է  21  կէտ:  Սէն Թեթիէն՝  13  կէտով կը գրաւէ  7-րդ դիրքը:   Օրուան ամենասպասուած  հանդիպումը կայացաւ Մարսէյի մէջ, ուր տեղւոյն կազմը   ընդունեց   Փարի Սէն Ժերմէնը: Մայրաքաղաքի կազմը, շնորհիւ  Մաքսուէլի եւ Զլաթան Իպրահիմովիչի կոլերուն՝ 2-1 արդիւնքով պարտութեան մատնեց  տանտէրներուն: Փարի Սէն Ժերմէն՝ Մոնաքոյի նման   ունի 21 կէտ: Մարսէյ՝ 14 կէտով կը մնայ   3-րդ դիրքի վրայ: Մոնփելիյէ՝ 5-1 արդիւնքով  ծանր պարտութեան  մատնեց Լիոնը:  Նանթ՝   3-0  արդիւնքով պարտութեան մատնեց Էվիանը:  Ֆիլիփ  Ճորճեւիչ (2)  եւ  Էլ Հաճի  Ճիլոփոճի  նշանակեցին Նանթի կոլերը:

Ռուսիոյ ախոյեանութեան 12-րդ  հանգրուանի մրցումներուն,   Մոսկուայի Սպարտակը  0-0 արդիւնքով  անգոհացուցիչ  հաւասարութիւն մը արձանագրեց Թերէքի դէմ: Միւս կողմէ, Մոսկուայի Բանակայինները    0-2 արդիւնքով  պարտութիւն մը կրեցին Մոսկուայի Տինամոյէն:  Ախոյեանութեան  ընդհանուր  դասաւորումը  29 կէտով կը  գլխաւորէ Սան Փեթերսպուրկի  Զենիթը: Վերջինս,  3-0  արդիւնքով պարտութեան մատնեց  Տոմը: Սպարտակը եւ  Լոքոմոթիվը 24-ական կէտով համապատասխանաբար  կը գտնուին  երկրորդ  եւ երրորդ  դիրքերու  վրայ: 

ՔԼԻՉՔՕ ՄՈՍԿՈՒԱՅԻ ՄԷՋ  ՊԱՐՏՈՒԹԵԱՆ ՄԱՏՆԵՑ  ՓՈՎԵԹՔԻՆԸ

Ուքրանացի Վլատիմիր  Քլիչքօ պաշտպանեց  արհեստավարժ  բռնցքամարտի  գեր ծանր  կարգի՝WBA,WBO, IBF եւ IBO  վարկածներու աշխարհի ախոյեանի տիտղոսը՝ համոզիչ  յաղթանակ մը տանելով  ռուս  Ալեքսանտր  Փովեթքինի դէմ: 12  ռաունտերու վրայ  ընթացող  հանդիպումը  կայացաւ Մոսկուայի Ողիմպիական մարզադաշտին մէջ, աւելի քան  14  մարզասէրներու  ներկայութեան: Երեք  մրցավարները միաձայնութեամբ յաղթանակը շնորհեցին Քլիչքոյին:

Մրցումէն ետք, 37-ամեայ  Քլիչքօ յայտարարեց, թէ ռինկին մէջ  յաղթած էր  հզօրագոյն մարզիկը: Կ’արժէ նշել, որ 34-ամեայ   Փովեթքին արհեստավարժ դառնալէ ետք  կը կրէր  իր առաջին պարտութիւնը:

ՍՈՉԻԻ ՈՂԻՄՊԻԱԿԱՆ ԿՐԱԿԸ  ՊԱՇՏՕՆԱՊԷՍ  ՓՈԽԱՆՑՈՒԵՑԱՒ  ՌՈՒՍԻՈՅ

Աթենքի մէջ կայացած  պաշտօնական աարարողութեան մը  ընթացքին, 22-րդ  Ողիմպիական  խաղերու  ջահը պաշտօնապէս  փոխանցուեցաւ  «Սոչի – 2014»ի պատուիրակութեան: Ողիմպիական  ջահը պաշտօնապէս  Կիրակի օր հասաւ Մոսկուա:

ՏԻՈՔՈՎԻՉ  ՇԱՀԵՑԱՒ ՓԵՔԻՆԻ  ՄԻՋԱԶԳԱՅԻՆ ՄՐՑԱՇԱՐՔԸ

Սերպ Նովաք Տիոքովիչ    շահեցաւ թենիսի  Փեքինի  միջազգային ATP  մրցաշարքը:  Աւարտական  մրցումին, Տիոքովիչ   6-3,  6-4  արդիւնքով պարտութեան մատնեց  Ռաֆայէլ Նատալը:  Տիոքովիչի եւ Նատալի  միջեւ Կիրակի օրուան  հանդիպումը   38-րդն էր:  Նատալ յաղթած է  22 առիթներով,  Տիոքովիչ՝ 16: Միւս կողմէ,  Ռաֆայէլ Նատալ սկսաւ  գլխաւորել տղոց  արհեստավարժ թենիսի  համաշխարհային  դասաւորումը:

Մրցաշարքին  աղջկանց տիտղոսը  շահեցաւ Սերենա Ուիլիյըմզը: Աւարտական  մրցումին,  29-ամեայ Սերենա՝  6-2, 6-2 արդիւնքով պարտութեան մատնեց  Ելենա Եանքովիչը:

«ԱՐԱՐԱՏ -73» Ի  ՖՈՒԹՊՈԼԻՍՏՆԵՐԸ  ՄԵԾԱՐՈՒԵՑԱՆ

Կիրակի, 6 Հոկտեմբերին,  Արագածոտնի մարզի  Ագարակ  համայնքը մեծ շուքով  նշեց «Արարատ -73» ֆութպոլի խումբին զոյգ յաղթանակներու(բաժակ եւ ախոյեանութեան տիտշոս)   40-ամեայ  յոբելեանը: Նախաձեռնութեան հեղինակն  էր  ռուսաստանաբնակ բարերար Հրաչեայ Պօղոսեանը: Միջոցառումը կը հովանաւորէր մարմնամարզութեան եւ Երիտասարդութեան  հարցերու նախարար Եուրի  Վարդանեանը:  Այս առիթով,  Ագարակի  կեդրոնին մէջ տեղի ունեցաւ «Արարատ-73»ի պատմական յաղթանակները խորհրդանշող  յուշարձանի  մը  բացման արարողութիւնը: Այս յիշատակելի միջոցառումէն, անհանգստութեան պատճառով  բացակայեցաւ Արկադի Անդրէասեանը, իսկ Նիքիթա Սիմոնեանը  Չորեքշաբթի առաւօտեան պիտի ժամանէ Հայաստան:

Ռուսիոյ  ֆութպոլի ֆետերասիոնի փոխնախագահ  87-ամեայ Նիքիթա Սիմոնեան   հարց տուաւ, թէ  ինչո՞ւ  «Արարատ»ի պատուին յուշարձանը կը կառուցեն Ագարակի եւ ոչ՝ Երեւանի մէջ: Ան նաեւ  ընդգծեց, թէ  10 Հոկտեմբերն է «Արարատ»ի  յաղթանակի  օրը  եւ   կարելի չէ նշել նախօրոք:

ՎԵԹԷԼ  ՇԱՀԵՑԱՒ  ՀԱՐԱՒԱՅԻՆ  ՔՈՐԷԱՅԻ ԿՐԱՆ ՓՐԻՆ

Ռէտ Պուլ Խումբի  վարորդ Սեպասթիան Վեթէլ  շահեցաւ Ֆորմիւլա 1 ինքնաշարժներու Հարաւային Քորէայի կրան փրին:  Քիմի Ռայքոնեն   երկրորդ հանդիսացաւ: Ախոյեանութեան տիտղոսին Վեթէլի  գլխաւոր մրցակից  Ֆեռնանտօ Ալոնզօ  վեցերորդ  հանդիսացաւ: 26-ամեայ գերմանացին 272 կէտով կը գլխաւորէ   ընդհանուր դասաւորումը: Ֆեռնանտօ Ալոնզօ  195 կէտով կը գրաւէ երկրորդ դիրքը: Ֆորմիւլա 1 ինքնաշարժներու  յաջորդ  կրան փրին տեղի պիտի ունենայ  յառաջիկայ Կիրակի, 13  Հոկտեմբերին,  Ճափոնի մէջ:

 

 

LEAVE A REPLY

Please enter your comment!
Please enter your name here