ԼԻԲԱՆԱՆԵԱՆ ԿԱՐՃ ԼՈՒՐԵՐ

0
94

-Լիբանանեան լրատուական  կարգ մը աղբիւրներու  համաձայն,  Ազէզի մէջ առեւանգուած   լիբանանցիները ազատ պիտի արձակուին յառաջիկայ քանի մը  ժամերուն  ընթացքին: Ականատեսներու վկայութեամբ, առեւանգեալները կը  գտնուին թրքական ներքին ապահովութեան ուժերու հսկողութեան տակ:

-Ատհայի  տօնին առիթով  վարչապետարանէն լոյս ընծայուած   հաղորդագրութիւնը  շիի համայնքին մօտ բաւական լուրջ  ընդվզում  յառաջացուցած  ըլլալու պատճառով, վարչապետարանը  վերատեսութեան ենթարկեց նախապէս յայտարարած  երկօրեայ արձակուրդը: Հետեւաբար,  պետական հաստատութիւնները եւ քաղաքապետութիւնները յաջորդական երեք օր՝ 15,16 եւ17  Հոկտեմբերին պիտի մնան փակ:

–  Եօթ ամիս Ֆրանսա  ապաստանելէ ետք, հիւսիսային Լիբանանի եւ Թրիփոլիի  միւֆթի Մելիք Շաար  այսօր պիտի  վերադառնայ Լիբանան: Շաար՝  եօթ ամիսներ առաջ հեռացած էր Լիբանանէն, սպառնալիքներ ստանալու  պատճառով:

– Լիբանանի  մօտ  Իրանի  դեսպան Ղատանֆար Ռըքն Ապատի  յայտարարեց, թէ Իրան պատրաստ է   մէկ տարուան ընթացքին փակելու իր միջուկային թղթածրարը: Ան յայտնեց, թէ  նախագահ  Պարաք Օպամայի  վերջին կեցուածքները դրական նախանշաններ  ցոյց կու տան  Իրանի ուղղութեամբ:  Դեսպանը  նշեց, թէ ապօրէն  ճանապարհներով  ահաբեկչական կազմակերպութիւններու  մուտքը  կ’ուշացնէ  Սուրիոյ հակամարտութեան լուծումը:

– Երեսփոխան  Ժան Օղասապեան մերժեց  Միջազգային Ատեանի ֆինանսաւորման Լիբանանի պարտաւորութիւնը նաւթի  թղթածրարին հետ  պայմանաւորելու   հրաժարեալ վարչապետ Նեժիպ Միքաթիի  ընթացքը: Օղասապեան  դիտել տուաւ, թէ Ատեանին  ֆինանսաւորումը  պետութեան պատասխանատուութեան ծիրին  մէջ  ինկող  պարտականութիւն մը  ըլլալով, անընդունելի  են անոր շուրջ սակարկութիւնները:

-Ներքին անվտանգութեան ուժերը  ձերբակալեցին  պայթումներ եւ ոճիրներ ծրագրաւորող  ահաբեկչական ցանցի մը  պատկանող երեք անձեր: Ենթականները կը  կրեն լիբանանեան եւ սուրիական  քաղաքացիութիւն:

LEAVE A REPLY

Please enter your comment!
Please enter your name here