ՎԼԱՏԻՄԻՐ ՓՈՒԹԻՆ՝ ՄՈՍԿՈՒԱ ԵՒ ՈՒԱՇԻՆԿԹԸՆ ԸՆԴՀԱՆՈՒՐ ՆՊԱՏԱԿՆԵՐ ՈՒՆԻՆ ՍՈՒՐԻՈՅ ԻՐԱՎԻՃԱԿԻ ԿԱՐԳԱՒՈՐՄԱՆ ՇՈՒՐՋ

0
118

ՄԱԿ-ի  ընդհանուր քարտուղար Պան Քի  Մուն առաջարկեց ՄԱԿ-ի եւ Քիմիական Զէնքի Արգիլման Կազմակերպութեան համատեղ  առաքելութեան  ստեղծումը՝  ոչնչացնելու համար Սուրիոյ  մէջ առկայ  քիմիական  նիւթերու  զինանոցը: Քի Մուն նշեց, թէ  Սուրիոյ իշխանութիւնները կը ցուցաբերեն գնահատելի աջակցութիւն: Սուրիոյ քիմիական զէնքերը կը նախատեսուի ոչնչացնել  երեք յաջորդական հանգրուաններով: ՄԱԿ-ի Ապահովութեան խորհուրդը  Հինգշաբթի օրուան նիստին  պիտի  քննարկէ Պան Քի Մունի առաջարկը:  Ռուսիոյ  նախագահ Վլատիմիր Փութին հաւանական գտաւ, որ Սուրիոյ   քիմիական  զէնքերը  չէզոքացնելու  գործողութիւնները  աւարտին տարուան  մը  ընթացքին: Ան նշեց, թէ  աշխատանքները կ’ընթանան  հեզասահ եւ միջազգային  հետաքննիչներու հսկողութեան տակ:

Միւս  կողմէ,  Իրաքի վարչապետ  Նուրի  Մելիքի դիտել տուաւ, որ  ուժեր գոյութիւն ունին, որոնք կը փորձեն Իրաք փոխադրել Սուրիոյ հակամարտութիւնը:

Ռազմական գետնի վրայ,  բանակը  իր վերահսկողութեան տակ վերցուց  Դամասկոսը  Հալէպին կապող ճանապարհը:«Այդ ճանապարհի  վերահսկողութիւնը կեանքի ու մահուան հարց է եւ կը  վճռէ  Հալէպի մէջ վարչակարգին եւ բնակիչներուն ապագան: այժմ իշխանութիւնները կրնան   ընդլայլնել  մատակարարումները Հալէպ».նշեց  մարդու իրաւունքներու պաշտպանութեան սուրիական կեդրոնի  տնօրէն Ռամի Ապտուլ Ռահմանը:

Իսրայէլեան «Տեպքա» լրատուական կայքէջին կարծիքով,  Հըզպալլայի զինեալներուն Սուրիայէն  աստիճանական հեռացումը  նախանշան է, թէ գետնի վրայ  սուրիական  բանակը բարելաւած է  իր դիրքերը:

Ֆրանսա եւ Սէուտական Արաբիա յայտարարեցին, թէ պիտի շարունակեն  օժանդակել  Սուրիոյ ընդդիմութեան:

LEAVE A REPLY

Please enter your comment!
Please enter your name here