ՆԱԽԱԳԱՀ ՍԸԼԷՅՄԱՆ ՔՆՆԱՐԿԵՑ ՍՈՒՐԻԱՑԻ ԳԱՂԹԱԿԱՆՆԵՐՈՒՆ ԻՐԱՎԻՃԱԿԸ

0
109

Ապահովական եւ նոր  կառավարութիւն կազմելու  թղթածրարները անգամ մը եւս դարձան  հանրապետութեան նախագահ Միշէլ Սըլէյմանի եւ հրաժարեալ վարչապետ Նեժիպ Միքաթիի միջեւ  Պաապտայի  պալատին մէջ  կայացած    հանդիպումին  առանցքային  օրակարգերը:Նախագահ  Սըլէյման, Պաապտայի  պալատին մէջ գլխաւորեց ապահովական նիստի մը, որուն մասնակցեցան վարչապետ Նեժիպ Միքաթին,  ներքին գործոց նախարար Մարուան Շարպէլը, ընկերային հարցերու նախարար Ուայէլ Ապու Ֆաուրը, ապահովական եւ  զինուորական պատասխանատուներ: Նիստի ընթացքին քննարկուեցան սուրիացի գաղթականներուն մարդասիրական օժանդակութիւն հայթայթելու կարելիութիւնները:  Նախագահ Սըլէյման  յաջորդաբար ընդունեց,  փոխվարչապետ Սամիր Մուքպէլը, ընդհանուր անվտանգութեան ընդհանուր  տնօրէն Ապպաս Իպրահիմը, Լիբանանի  մօտ Միացեալ Նահանգներու դեսպան Տէյվիտ Հէյլը:

Հրաժարեալ վարչապետ Նեժիպ Միքաթի դիտել տուաւ, թէ  իրաւական եւ սահմանադրական   տուեալներ  չեն արտօներ, որպէսզի  լիագումար նիստի  հրաւիրէ հրաժարեալ կառավարութիւնը:   Հետեւաբար,  իր կառավարութեան իրաւասութիւններէն   դուրս կ’իյնայ  քննարկելու՝ նաւթի թղթածրարը, ինչպէս նաեւ  Միջազգային Ատեանը  ֆինանսաւորելու  օրակարգերը:

Խորհրդարանի նախագահ Նեպիհ Պըրրի զարմանք յայտնեց  Միքաթիի յայտարարութեան, դիտել տալով որ կառավարութիւնը  իրաւասութիւն ունի  քննարկելու նաւթի  թղթածրարը:

Միքաթի, վարչապետարանին մէջ գլխաւորեց  Ռումիյէի  բանտին իրավիճակին վերաբերեալ   ապահովական  նիստի մը, որուն մասնակցեցան արդարադատութեան նախարար Շեքիպ Ղըրթպաուին,  հետաքննիչ ատեանի գլխաւոր դատախազ Սամիր Համուտը, ապահովական մարզի այլ պատասխանատուներ: Միքաթի, ապահովական, իրաւական   մարմիններէն պահանջեց  մօտէն հետեւիլ Ռումիյէ բանտին մէջ տիրող կացութեան, ինչպէս նաեւ պայթուցիկ փոխադրելու թղթածրարին:  Հրաժարեալ վարչապետը նաեւ ընդունեց Լիբանանի մօտ Նորվեկիոյ դեսպանը եւ այլ անձնաւորութիւններ:

Միւս կողմէ,   նորանշանակ  վարչապետ Թամամ Սալամ յայտարարեց, թէ կը շարունակէ  նոր կառավարութիւն կազմելու  խորհրդակցութիւնները: Ան շեշտեց, թէ  մտադրութիւն չունի հրաժարելու իր նշանակումէն, սակայն կը մերժէ արկածախնդրութիւնները: Սալամ  նշեց, թէ  հրաժարիլ կը նշանակէ  պատասխանատուութենէ խուսափում: Ան նաեւ յայտնեց, թէ՝ Ժողովուրդ, Բանակ եւ Դիմադրութիւն կարգախօսի տակ  կառավարութեան մը  պահանջը մեծապէս կը խանգարէ կազմութեան աշխատանքները:

LEAVE A REPLY

Please enter your comment!
Please enter your name here