ՔՐՏԵՐԷՆ ՈՐՄԱԶԴՆԵՐՈՒՆ ՀԱՄԱՐ ԿԸ ՍԱՀՄԱՆՈՒԻ ՏՈՒԳԱՆՔ

0
135

«Մարմարա» կը գրէ, թէ Թուրքիոյ վարչապետ Ռեճէպ Թայիփ Էրտողանի կողմէ հրապարակուած Ժողովրդավարացման ծրարը բազմաթիւ նորութիւններ բերել կը խոստանայ. այդ նորութիւններէն մէկը ոչ պետական վարժարաններու մէջ մայրենի լեզու դասաւանդելու կարելիութիւնն էԱյս նիւթը ներկայիս առաւելաբար կենսական կարեւորութիւն կը ներկայացնէ քիւրտերուն, որոնք երկար ժամանակէ ի վեր մայրենի լեզուով ուսուցման իրաւունքի պայքար կը մղեն։ Քիւրտերը քրտաբնակ բնակավայրերու մէջ այլեւս սկսած են հրապարակաւ գործածելու քրտերէնը ու յաճախ քրտերէն որմազդներ կը կախեն պատերու վրայ։ Ասիկա այլեւս բնական պէտք է նկատուի, քանի որ Ժողովրդավարական ծրարը կը խոստանայ մինչեւ իսկ մայրենի լեզուով քաղաքական ընտրարշաւ ու քարոզչութիւն ընելը արտօնել։
Սակայն, հակառակ այս բոլորին, տակաւին կան կառավարիչներ, որոնք չեն հանդուրժեր քրտերէն որմազդները։ Նմանօրինակ դէպք մը պատահեցաւ Պաթմանի մէջ, ուր կարգ մը հասարակական կազմակերպութիւններու կողմէ մայրենի լեզուով ուսուցման մասին քրտերէնով կախուած որմազդները տուգանքի ենթարկուեցան։ Պաթմանի ապահովութեան տնօրէնութիւնը 22 հոգիի դէմ 500ական լիրայի դրամական պատիժ հռչակեց։ Այս պատիժը անոնց կը տրուի՝ իբրեւ թէ «առանց արտօնութեան որմազդ կախելու» պատրուակով, մինչդեռ միայն քրտերէնով գրուած որմազդներուն դէմ տուգանք սահմանուած է։
Տուգանքի ենթարկուողները որոշած են դատարան դիմել։
«Այս երեւոյթին դիմաց մենք ալ կրնանք հետաքրքրութեամբ հարց տալ, թէ ի՞նչ պիտի պատահի արդեօք, եթէ մեր վարժարաններուն կողքին կամ ազգային հաստատութիւններուն քով հրապարակաւ հայերէն որմազդներ կախենք։ Ատենօք մեր վարժարաններուն ճակատին վրայ հայերէնով գրուած անոնց անուններն իսկ սրբուեցան իշխանութիւններուն հրահանգով։ Այսօր հայերէն որմազդներ կախելու իրաւունք պիտի ունենա՞նք։ Կամ, նոյնիսկ եթէ մեզի այդ իրաւունքը տրուի, մենք պիտի յարգե՞նք մեր մայրենին եւ անոր համար տեղ պիտի բանա՞նք որմազդներու վրայ», կ՛եզրակացնէ «Մարմարա»:

 

LEAVE A REPLY

Please enter your comment!
Please enter your name here