ԼԻՊԻՈՅ ՎԱՐՉԱՊԵՏԻՆ ԽՈՐՀՐԴԱՒՈՐ ԱՆՀԵՏԱՑՈՒՄԸ ԵՒ …. ՅԱՅՏՆՈՒԹԻՒՆԸ

0
123

Այսօր  առաւօտեան, լիպիական  լրատուական աղբիւրներ  հաղորդեցին, թէ զինեալներ խուժած են վարչապետ Ալի Զէյտանի բնակարանը եւ անորոշ ուղղութեամբ առաջնորդած են զինք:  Աւելի ուշ,  յայտարարուեցաւ, թէ   վարչապետը  ձերբակալուած էր: Ըստ քաղուած տեղեկութիւններուն,  «Լիպիոյ  Յեղափոխականներու խորհուրդ»  զինուորական կազմակերպութիւնը, որ կը գործէ  ներքին գործոց նախարարութեան հովանաւորութեան տակ,  ձերբակալած էր վարչապետ Ալի Զէյտանը: Կազմակերպութեան անունով   խօսնակ մը հաւաստեց, թէ Զէյտան  ձերբակալուած էր  «Պետութեան եւ պետական անվտանգութեան դէմ քրէական յանցագործութիւններ» կատարած  ըլլալու յանցանքով: Սակայն, ներքին գործոց նախարարութեան աղբիւր մը  հաղորդեց, թէ նախարարութիւնը ոչ մէկ առնչութիւն ունի վարչապետին  առեւանգման հետ:

«Ռոյթըրզ»  գործակալութիւնը հաղորդեց, թէ Զէյտան  ձերբակալուած է Միացեալ Նահանգներու  պետական քարտուղար Ճոն Քերրիի այն յայտարարութենէն ետք, թէ  Լիպիոյ  կառավարութիւնը նախապէս տեղեակ էր  «Ալ Քայիտա» ահաբեկչական  կազմակերպութեան  ղեկավարներէն մէկուն՝ Անաս Ալ Լիպիի  ձերբակալութենէն: խառնաշփոթ այս   զարգացումներուն ընթացքին,  Լիպիոյ  ժամանակաւոր կառավարութեան խօսնակ  Մուհամմէտ Եահիա  Ճապըր յայտարարեց, թէ  վարչապետը ազատ արձակուած էր: Ան նաեւ  խոստացաւ՝ աւելի ուշ, ամբողջական եւ  մանրամասն  տեղեկութիւններ հաղորդել: Դէպքերը աւելի  անհասկնալի դարձան, երբ վարչապետ Ալի Զէյտան յայտարարեց, թէ առեւանգողները  չէին  յաջողած զինք համոզել, որպէսզի հրաժարէր վարչապետի  պաշտօնէն:

Այս բոլորէն ետք,  Լիպիոյ Ազգային Խորհուրդի նախագահ  Նուրի  Պուսահմին յայտարարեց, թէ  բանակցութեանց շնորհիւ  ազատ արձակուած էր վարչապետը:

 

LEAVE A REPLY

Please enter your comment!
Please enter your name here