ԼԱՒՐՈՎ՝ ԴՐԱՑԻ ՊԵՏՈՒԹԻՒՆՆԵՐ ԿԸ ՓՈՐՁԵՆ ՁԱԽՈՂՈՒԹԵԱՆ ՄԱՏՆԵԼ «ԺԸՆԵՒ-2»Ն

0
133

ՄԱԿ-ի Ապահովութեան Խորհուրդը   միաձայնութեամբ հաւանութիւն տուաւ, Սուրիոյ քիմիական զէնքերը  չէզոքացնելու  առաքելութեամբ  խառն պատուիրակութեան  մը կազմութեան:

Ռուսիոյ արտաքին գործոց նախարար Սերկէյ Լաւրով   զգուշացուց, որ  Սուրիոյ ընդդիմութեան կարգ մը անհատներ եւ դրացի  պետութիւններ կը փորձեն խանգարել «Ժընեւ- 2»  խորհրդաժողովը:  Ան նաեւ  ընդգծեց, թէ  Ճեպհէթ Ալ Նուսրա կը փորձէ Իրաք  փոխադրել  իր  հակակշիռին տակ  ունեցած  քիմիական զէնքերը:

Ապահովական գետնի վրայ,  սուրիական բանակը  կասեցուց   ծայրայեղականներու կողմէ Հոմս թափանցելու փորձ մը: «Հիւմըն Ռայց Ուոչ» իրաւապաշտպան միջազգային կազմակերպութիւնը հաղորդեց, թէ ծայրայեղականները սառնասրտօրէն  սպաննած են  վաթսուն եօթ  քաղաքացիներ, որոնց մեծամասնութիւնը՝ ալաուիներ: Ծայրայեղականները  անակնկալ  յարձակում մը գործեցին Դամասկոսի մօտակայ առեւտրական կեդրոնի մը վրայ, սպաննելով 11  քաղաքացի, վիրաւորելով՝ 23 ուրիշներ: Իսկ Դամասկոսի  Ալ Մաունա հիւանդանոցին մօտ պայթումի մը հետեւանքով մահացան 12 քաղաքացիներ, որոնց մէջ՝  երեք երեխայ եւ երկու կին:

Սուրիական բանակի երկարատեւ պայքարի արդիւնքով, Հալէպի ճանապարհի բացումէն ետք, առաջին անգամ հանրակառքեր դուրս եկան երթեւեկութեան: Այս մասին «Արմէնփրես»-ին տեղեկացուցած է Հալէպի անոր աղբիւրը` աւելցնելով, որ բացի Հալէպը արտաքին աշխարհին կապող հանրակառքերու երթեւեկութենէն, սկսած  է անհրաժեշտ դեղամիջոցներ, մթերքներ եւ այլ անհրաժեշտ պարագաներ ներկրուիլ քաղաք:

Սուրիական բանակը Խանասէր գիւղը զինեալներէն մաքրած է` բանալով Հոմս-Հալեպ ճանապարհը: Քանի մը օր շարունակ բանակը աշխատանքներ տարած է` մաքրելով ճանապարհը ականներէ, եւ միայն անվտանգ յայտարարելէ ետք բացած է երթեւեկութեան համար:

Աղբիւրը նաեւ տեղեկացուցած է, որ հայաշատ Հալէպի մէջ վերականգնած է մէկ ամսէ աւելի դադրած համացանցը:

Աղբիւրը, քաղաքին մէջ տիրող ընդհանուր իրավիճակին անդրադառնալով, նշած է, որ հայկական թաղմասերուն մէջ իրավիճակը համեմատաբար հանգիստ է, միջադէպեր չեն արձանագրուած, թէեւ մերթ ընդ մերթ հրասանդի եւ թնդանօթի ձայներ կը լսուին:

LEAVE A REPLY

Please enter your comment!
Please enter your name here