ՍԱԼԱՄ ԱՏՀԱՅԻ ՏՕՆԷՆ ԵՏՔ ՆՈՐ ԹԱՓՈՎ ՊԻՏԻ ՇԱՐՈՒՆԱԿԷ ԿԱԶՄՈՒԹԵԱՆ ԱՇԽԱՏԱՆՔՆԵՐԸ

0
124

Հանրապետութեան նախագահ Միշէլ Սըլէյման Պաապտայի  պալատին մէջ   ընդունեց   նորանշանակ  վարչապետ  Թամամ Սալամը եւ անոր հետ քննարկեց նոր կառավարութիւն կազմելու նորագոյն  զարգացումները: Սալամ ընդունելով հանդերձ, որ  յառաջընթաց  տեղի չունենար  կառավարութեան   հարցով, ընդգծեց թէ  պիտի շարունակէ   իր աշխատանքները:  Սալամ խոստացաւ Ատհայի տօնէն անմիջապէս ետք  նոր թափով  լծուիլ  կազմութեան աշխատանքներուն:

Հրաժարեալ վարչապետՆեժիպ Միքաթի  վարչապետարանին մէջ ընդունեց  Լիբանանի մօտ Թուրքիոյ դեսպան Էնան Էօզյիլտզը եւ քննարկեց Ազէզի եւ Պէյրութի մէջ առեւանգուած  քաղաքացիներուն  թղթածրարները:  Ապա ան ընդունեց  Ֆրանքոֆոնեան միջազգային  կազմակերպութեան տնօրէն  Գլեման Տոհիմանը, ներքին ապահովութեան ուժերու տնօրէնի պաշտօնակատար գնդապետ Իպրահիմ Պասպուսը եւ  պետական նախարար Ահմէտ Քարամէն: Վերջինս յայտնեց, թէ  Ինտոնեզիոյ իշխանութիւնները  կը ձգձգեն  նաւաբեկումի զոհ լիբանանցիներու աճիւններուն  վերադարձը:

Ընկերվար Յառաջդիմական Կուսակցութեան պետ Ուալիտ Ճոմպլաթ յայտարարեց, թէ  նախագահական  ընտրութիւններու թղթածրարը  բացուած է, հետեւաբար անհրաժեշտ է  նուազագոյն  վնասներով դուրս  գալ այս իրագործումէն:  Ճոմպլաթ այնքան ալ խանդավառութիւն չցուցաբերեց  նախագահ Միշէլ Սըլէյմանի պաշտօնավարութեան  ժամկէտը  երկարաձգելու առաջարկին, նշելով որ  պիտի նախընտրէր զինուորական հաստատութենէն  դուրս  աձնաւորութիւն մը տեսնել նախագահի պաշտօնին վրայ:Այս առիթով ան դիտել տուաւ, թէ  Երեք Ութերու տարազով կառավարութիւն մը  ընդունելի պիտի  չըլլայ ներկայիս: Ճոմպլաթի կարծիքով, լաւագոյնը պիտի  ըլլայ  9-9-6 տարազով կառավարութիւն մը: Ճոմպլաթ նաեւ մերժեց իրողական կառավարութեան տարբերակը:   Ճոմպլաթ քննադատեց նախագահ Պաշշար Ասատի  վարչակարգը իյնալու  վրայ դրուած սխալ  գրաւները , նկատել տալով որ  Ասատ այսօր եւս կրնայ շահիլ  նախագահական   ընտրութիւնները:

LEAVE A REPLY

Please enter your comment!
Please enter your name here