ՈՒԱՇԻՆԿԹԸՆ « ՄԻՋԱԶԳԱՅԻՆ ՉԱՓԱՆԻՇՆԵՐԷ ՑԱԾ» ԲՆՈՐՈՇՈՒՄԸ ԿՈՒ ՏԱՅ ԱՏՐՊԷՅՃԱՆԻ ՆԱԽԱԳԱՀԱԿԱՆ ԸՆՏՐՈՒԹԻՒՆՆԵՐՈՒՆ

0
143

Միացեալ Նահանգներու պետական քարտուղարութիւնը «միջազգային չափանիշներէ ցած» նկատեց Ատրպէյճանի մէջ տեղի ունեցած նախագահական ընտրութիւնները՝ համաձայն գտնուելով այդ մասին ԵԱՀԿ Խորհրդարանական վեհաժողովի պատուիրակութեան կատարած արժեւորումին:
Միացեալ Նահանգներու պետական քարտուղարութիւնը  նաեւ ցաւ կը յայտնէ, թէ հակառակ ազատ եւ արդար ընտրութիւններ ապահովելու մասին Ուաշինկթընի կողմէ Ատրպէյճանի իշխանութեանց կատարուած կոչերուն՝ բաւարար քայլեր չէին առնուած միջազգային չափանիշներու հասնող ընտրութիւններ իրականացնելու համար:
Ընտրութիւններուն վրայ բացասաբար ազդած է նաեւ այն իրողութիւնը, որ ընդդիմադիր թեկնածուները հաւասարաչափ հասանելիութիւն չեն ունեցած լրատուամիջոցներուն, իսկ որոշ լրագրողներ ենթարկուած են ճնշումներու եւ հետապնդման:
Ըստ եւրոպացի դիտորդներու՝ Ատրպէյճանի իշխանութիւնները նկատի չեն առած եւ չեն գործադրած նախապէս ԵԱՀԿի Ժողովրդավարական հաստատութիւններու եւ մարդկային իրաւունքներու գրասենեակին (ԺՀՄԻԳ) կողմէ տրուած առաջարկները՝ նախագահական ընտրութիւններու կայացման առնչուած:
ԵԱՀԿի Խորհրդարանական վեհաժողովի պատուիրակութեան ղեկավար Տորիս Պարնեթ Ատրպէյճանի իշխանութիւններուն կոչ ըրած է արագօրէն արձագանգելու դէտերու բարձրացուցած հարցերուն: Իսկ ԵԱՀԿ-ԺՀՄԻԳ դէտերու առաքելութեան ղեկավար Թանա տէ Ճիւլիէթա յայտարարած է, որ Ատրպէյճանի մէջ ընտրական հոլովոյթը մեծաւ մասամբ չի համապատասխաներ ԵԱՀԿի պահանջներուն:
Ընտրական գործընթացին հետեւած է աւելի քան 1200 դէտ՝ տարբեր երկիրներէ ու կազմակերպութիւններէ, ներառեալ՝ ԱՊՀ-էն, ԵԱՀԿ-էն, Եւրոպական խորհրդարանէն: ԱՊՀի դէտերու առաքելութեան ղեկավար Սերկէյ Լեպետեւ ընտրութիւնները գնահատած է «ազատ եւ ժողովրդավար»:
Ռուսական կողմի նախաձեռնութեամբ՝ Ռուսիոյ նախագահ Վլատիմիր Փութին, Ալիեւի հետ ունեցած է հեռաձայնային զրոյց մը, որուն ընթացքին ջերմօրէն շնորհաւորած է իր ատրպէյճանցի պաշտօնակիցը:
Նախապէս Ալիեւին ուղղուած շնորհաւորական հեռագիրին մէջ Փութին նշած է, թէ Ալիեւի «համոզիչ յաղթանակը» ցոյց կու տայ, որ ան կը շարունակէ քաղաքական բարձր հեղինակութիւն վայելել:
Ատրպէյճանի Ժողովրդավարական ուժերու ազգային խորհուրդ ընդդիմադիր դաշինքէն նախագահի թեկնածու Ճամիլ Հասանլի արդէն իսկ դատարանին դիմած է՝ վիճարկելու համար նախագահական ընտրութեանց արդիւնքը: Ան կը պահանջէ նոր ընտրութիւններու կայացում: Ըստ անոր՝ «Ընտրական խախտումները այնքան շատ եղած են, որ ժողովուրդը կարելիութիւն չէ ունեցած իր կամքը արտայայտելու»:
Ընտրութիւններու արդիւնքներուն դէմ իր բողոքը արտայայտելու համար, ընդդիմութիւնը որոշած է Պաքուի մէջ հանրահաւաք կատարել այս շաբաթավերջին:

 

LEAVE A REPLY

Please enter your comment!
Please enter your name here