ՙՀԱՏՈՒՑՈՒՄԸ ՊԷՏՔ Է ԴԱՌՆԱՅ ԱԶԳԱՅԻՆ ՊԱՀԱՆՋԱՏԻՐՈՒԹԵԱՆ ԿԻԶԱԿԷՏԸ՚

0
102

Ն.Ս.Օ.Տ.Տ. ԱՐԱՄ Ա. ԿԱԹՈՂԻԿՈՍ

Իր պատգամը ուղղելով Եւրոպայի Հայ համայնքներու կազմակերպած Գ. համագումարին, Ն.Ս.Օ.Տ.Տ. Արամ Ա. Կաթողիկոս շեշտեց հատուցման առաջնահերթ կարեւորութիւն տալու հրամայականըª Հայ ժողովուրդի ազգային պահանջատիրական պայքարին մէջ£ Վեհափառ Հայրապետը յատկապէս ըսաւ. ՙՏասնամեակներ շարունակ հսկայ դրամագլուխ, մարդոյժ ու ժամանակ տրամադրեցինք Ցեղասպանութեան ճանաչման£ Այս ծիրէն ներս եզակի նուաճումներ արձանագրեցինք, կարեւոր հանգրուաններէ անցանք, անհրաժաշտ է որ շարունակենք մեր աշխատանքը այս ուղղութեամբ: Սակայն ժամանակը հասած է, որ առաջնահերթութիւն տանք հատուցման, որովհետեւ ճանաչում ու հատուցում իրարու հետ սերտօրէն ընդելուզուած են£ ճանաչումը ինքնանպատակ չէ, անոր յաջորդող հանգրուանը հատուցումն է՚£

Վեհափառ Հայրապետը անդրադառնալով Ցեղասպանութեանª ըսաւ. ՙՑեղասպան թուրքը եւ աշխարհաքաղաքական շահերով իրեն նեցուկ կանգնող երկիրները օր մը պիտի անդրադառնան, որ կարելի չէ պատմութիւնը ուրանալ, պատմական դէպքերը եղծել£ Հայոց Ցեղասպանութիւնը պատմական անժխտելի իրողութիւն մըն է£ Հայ թէ օտար պատմագէտներ ու ցեղասպանագէտներ պատմական տուեալներու լոյսին տակ փաստած են Հայոց Ցեղապանութեան իրողութիւնը՚£

Անդրադառնալով հատուցման հարցին Վեհափառ Հայրապետը շեշտեց.- ՙ1¤Հատուցման հարցը պէտք է հետապնդուի միջազգային օրէնքի շրջագիծէն ներս£ Ա՛յս էր Անթիլիասի Մայրավաքին մէջ երկու տարիներ առաջ տեղի ունեցած միջազգային համագումարին նպատակը£ 2) Երբ հատուցման ու միջազգային օրէնքի մասին կը խօսինք, անհրաժեշտ է հեռու մնալ զգացական ու ենթակայական մօտեցումներէ եւ միջազգային օրէնքի տուեալներուն, բառապաշարներուն ու սահմանումներուն ճամբով մօտենալ հատուցման՚£

Վեհափառ Հայրապետը նաեւ ընդգծեց մեր ազգային պահանջատիրութիւնը միասնական ուժերով միջազգային համայնքին ներկայացնելու հրամայականը£ Ան ըսաւ. ՙԲնականաբար Հայաստանի ու Սփիւռքի մօտեցումներուն մէջ տարբերութիւն պէտք է ըլլայ, սակայն այդ տարբերութիւնը պէտք է դառնայ ներդաշնակ ու միաժամանակ համահունջ մեր ազգային գերագոյն շահերուն՚£

Ողջունելով Ցեղապանութեան 100-րդ տարելիցին առիթով Հայաստանի Հանրապետութեան նախաձեռնութեամբ հաստատուած համազգային յանձնախումբի աշխատանքը, Վեհափառ Հայրապետը ըսաւ. ՙՄեր սպասումն է որ սոսկ ձեռնարկներ կազմակերպող ու համադրող յանձնախումբ չդառնայ ան, այլ պէտք է մեր ժողովուրդին հաւաքական կամքին ու պահանջատիրութեան թարգմանը հանդիսանայ յաչս ցեղասպանին ու միջազգային համայնքին՚£ Իր խօսքի աւարտին Նորին Սրբութիւնը իր գնահատանքը յայտնեց մեր ժողովուրդի բռնաբարուած իրաւունքներուն համար աշխատող բոլոր հայորդիներուն ու մարմիններուն, յիշեցնելով, որ Մեծի Տանն Կիլիկիոյ Կաթողիկոսութիւնը որպէս թարգմանը իր ժողովուրդի պահանջատիրութեան, պիտի շարունակէ զօրավիգ կանգնիլ Հայ ժողովուրդի արդար դատին£

 

LEAVE A REPLY

Please enter your comment!
Please enter your name here