ԾԱՅՐԱՅԵՂԱԿԱՆՆԵՐԸ ԿԸ ՓՈՐՁԵՆ ՁԱԽՈՂՈՒԹԵԱՆ ՄԱՏՆԵԼ «ԺԸՆԵՒ- 2 » ԽՈՐՀՐԴԱԺՈՂՈՎԸ

0
99

Սուրիա  պաշտօնապէս  դարձաւ  Քիմիական Զէնքերու Արգիլման միջազգային կազմակերպութեան անդամ: Միւս կողմէ, ՄԱԿ-ի ընդհանուր քարտուղար Պան Քի Մուն հոլանտացի  Սիկրիտ Քակը նշանակեց Սուրիոյ   քիմիական զէնքերը  չէզոքացնելու  միջազգային  միացեալ պատուիրակութեան  նախագահ:

Ռուսիոյ արտաքին գործոց նախարար Սերկէյ Լաւրով  Միացեալ Նահանգներէն պահանջեց համոզել Սուրիոյ ընդդիմութիւնը, մասնակցելու՝ «Ժընեւ-2»  խորհրդաժողովին: Սուրիոյ ամենահզօր   ընդդիմադիր  ուժերէն մէկը՝  Սուրիական Ազգային Խորհուրդը   հրաժարեցաւ խաղաղութեան «Ժընեւ -2»  խորհրդաժողովին  մասնակցութենէն: Իր կեդրոնատեղին Իսթանպուլի մէջ  գտնուող  Խորհուրդը  սպառնաց  դուրս գալ   ընդդիմադիր ուժերու դաշինքէն,  եթէ   ընդդիմութիւնը մասնակցի «Ժընեւ-2»ին: Իսթանպուլի մէջ  հաստատուած  ընդդիմութեան դաշինքը  Հոկտեմբեր ամսուան  վերջաւորութեան պիտի  որոշէ «Ժընեւ-2»ին մասնակցութիւնը: Ռուսիոյ Ազգային Ժողովի միջազգային յարաբերութիւններու  նախագահ   Ալեքսէյ  Պոշքոֆ  դիտել տուաւ, թէ  Սուրիոյ  ընդդիմութիւնը ապաւինած է արտաքին  օժանդակութիւններու վրայ  եւ այդ պատճառով  կը  փորձէ  ձախողութեան մատնել «Ժընեւ-2»  խորհրդաժողովը:

Ծայրայեղականները  ահաբեկչական գործողութիւններ իրականացուցին Դամասկոսի կեդրոնը՝  ձայնասփիւռի եւ հեռատեսիլի  համալիրներուն մօտակայ շրջանի մը մէջ: Հալէպի  մէջ, բուռն բախումներ  տեղի կ’ունենան ծայրայեղական  իսլամիստներու եւ ապստամբներու միջեւ: Իտլիպի մօտակայ Տարքուշ  քաղաքին մէջ, ականուած ինքնաշարժի մը պայթումին հետեւանքով  մահացան առնուազն  վաթսուն անձեր:  Վիրաւորներուն թիւը անցաւ իննսունը:

Դամասկոսի մէջ, Շաբաթ օր, Տար  Ալ Սալամ  դպրոցի  մերձակայքը,  հրասանդի  պայթումի  հետեւանքով  զոհուեցաւ  Նշան Մելիքեանը:

LEAVE A REPLY

Please enter your comment!
Please enter your name here