ՆԱԽԱԳԱՀ ՍԸԼԷՅՄԱՆ ՄԱՂԹԵՑ ՈՐ ՏՕՆԱԿԱՆ ՕՐԵՐԸ ՀԱՅՐԵՆԻՔԻ ՇԱՀԸ ԳԵՐԱԴԱՍԵԼՈՒ ԱՌԻԹ ԸՆՁԵՌԵՆ

0
128

 

Լիբանան արդէն  եօթներորդ ամիսը կը  բոլորէ առանց կառավարութեան: Լաւատեսները կը յայտնեն, թէ  նոր  կառավարութիւնը պիտի կազմուի նախքան 22 Նոյեմբերը՝ անկախութեան  տօնը:

Հանրապետութեան  նախագահ Միշէլ Սըլէյման իր  այցելուներուն հետ քննարկեց երկրին  քաղաքական, ապահովական եւ տնտեսական իրավիճակը:  Սըլէյման խիստ  անհրաժեշտ  նկատեց  քաղաքական  ներկայ  տագնապէն  ձերբազատումը: Սըլէյման նշեց, թէ  Ապրիլ ամսուան ընթացքին Լիբանան պիտի թեւակոխէ  հանրապետութեան նախագահի  ընտրութիւններու հանգրուանը. «Երկիրը  չի կրնար սահմանադրական  այս կարեւոր  իրագործումը դիմաւորել առանց կառավարութեան». ընդգծեց ան:  Նախագահը միաժամանակ նշեց, թէ  նորանշանակ վարչապետը տարբեր  դժուարութիւններ կը դիմագրաւէ կառավարութիւն կազմելու աշխատանքներուն  ընթացքին: Նախագահ Սըլէյման անգամ մը եւս   շեշտեց, թէ չի փափաքիր  վերընտրուիլ: Ան  նշեց, թէ  քաղաքական հոսանքները  չեն աջակցիր նոր կառավարութիւն կազմելու  ճիգերուն:

Նախագահ  Միշէլ Սըլէյման  լիբանանցիները  շնորհաւորեց Ատհայի  տօնին առիթով, մաղթելով  որ  տօնական  օրերը առիթ ընձեռեն աւելի հանդարտ եւ  տրամաբանական եղանակներով  մտածելու Լիբանանի  շահերու պաշտպանութեան մասին: Սըլէյման  ընդունեց  ներքին  գործոց նախարարի պաշտօնակատար Մարուան Շարպէլը, երեսփոխան Միշէլ Ֆարաոնը  եւ այլ անձնաւորութիւններ:

Նորանշանակ վարչապետ Թամամ Սալամ նոյնպէս  մտահոգուած է տիրող կացութեամբ: Սալամ, իր  այցելուներուն յայտնեց, թէ  Ատհայի  տօնէն  ետք, տարբեր  ոճով պիտի մօտենայ հարցերուն:

Հրաժարեալ վարչապետ Նեժիպ Միքաթի ըսաւ, թէ լիբանանցիները այլընտրանք չունին,  բացի՝ Թրիփոլիի ապահովական  ծրագիրին աջակցելէն:Միքաթի դրուատեց Թրիփոլիի ապահովական կայունութիւնը ամրապնդելու ուղղութեամբ ապահովական  կառոյցներու   դերակատարութիւնը:

LEAVE A REPLY

Please enter your comment!
Please enter your name here