ՄՈՆՏԻԱԼ – 2014՝ ՊՈՍՆԻԱ, ՍՊԱՆԻԱ, ԱՆԳԼԻԱ ԵՒ ՌՈՒՍԻԱ ԱՊԱՀՈՎԵՑԻՆ ԻՐԵՆՑ ՈՒՂԵԳԻՐԸ

0
121

Երեքշաբթի երեկոյեան եւրոպական  տարբեր   քաղաքներու մէջ   տեղի ունեցաւ  Մոնտիալ – 2014ի  եզրափակիչներուն մասնակցելու զտման մրցումներու գծով  26   հանդիպում:  Պոսնիա  Հերցեկովինա ապահովեց Պրազիլի մէջ  կայանալիք Մոնտիալի  ուղեգիրը, երբ  Է.Խմբակին մէջ  1-0 արդիւնքով  պարտութեան մատնեց  Լիթուանիան:

Աշխարհի ախոյեան Սպանիոյ  հաւաքականը, Անգլիա եւ Ռուսիա  նոյնպէս ապահովեցին  իրենց ուղեգիրները:

Խրուաթիա, Շուէտ, Ռումանիա, Իսլանտա, Փորթուգալ, Յունաստան, Ուքրանիա եւ Ֆրանսա՝ համապատասխան խմբակներու մէջ երկրորդ դիրք գրաւելու  պատճառով, «Փլէյ-Օֆ» մրցումներու միջոցաւ   պիտի  վճռեն իրենց ճակատագիրը:  Վերոյիշեալ ութ հաւաքականներէն միայն  չորսը  ձեռք պիտի  բերէ  եզրափակիչներուն մասնակցելու ուղեգիր: «Փլէյ-Օֆ»ներու վիճակաձգութիւնը  տեղի պիտի ունենայ  21 Հոկտեմբերին,  Ցիւրիխի մէջ: Դանիոյ հաւաքականը, հակառակ Բ. Խմբակի մէջ երկրորդ  դիրքը գրաւելուն,  անգոհացուցիչ ցուցանիշներուն  պատճառով զրկուեցաւ «Փլէյ-Օֆ»ներուն մասնակցելու իրաւունքէն:

Երեքշաբթի օրուան  հանդիպումներէն ետք, Իտալիա, Հոլանտա, Պելճիքա, Զուիցերիա, Գերմանիա, Ռուսիա, Պոսնիա, Անգլիա եւ Սպանիա ձեռք բերին Մոնտիալ-2014ին մասնակցելու   իրաւունք: Իսկ՝ Խրուաթիա, Շուէտ, Ռումանիա, Իսլանտա, Փորթուգալ, Յունաստան, Ուքրանիա, Ֆրանսա պիտի սպասեն  երկհանգրուանային «Փլէյ-Օֆ»ներու վիճակաձգութեան: «Փլէյ-Օֆ»ներու երթուդարձի մրցումներուն թուականները ճշդուած են արդէն՝ 15 եւ 19 Նոյեմբեր:

Վերադառնալով Երեքշաբթի  օրուան հանդիպումներուն,  Պելճիքա՝ 1-1 արդիւնքով հաւասարութիւն մը արձանագրեց  Ուէյլզի  դէմ: Խրուաթիոյ հաւաքականը, որ արդէն իսկ ապահոված էր  սոյն խմբակին երկրորդ դիրքը 2-0  արդիւնքով պարտութիւն մը կրեց Սկովտիայէն: Առ ի բողոք  իր  մարզիկներուն ցուցաբերած անտարբերբերութեան եւ անորակ խաղին, Խրուաթիոյ մարզիչ Իկոր Սթիմաք սպառնաց  հրաժարիլ:

Բ. Խմբակէն ներս, Նափոլիի մէջ,  Իտալիոյ հաւաքականը  Հայաստանի դէմ հանդիպումին,  երկու առիթնեով  կրճատեց իր  մրցակիցին առաւելութիւնը: Մրցումը վերջ  գտաւ 2-2  հաւասարութեամբ, (կիսախաղ՝ 1-1):  Եուրա Յովհաննիսեանեւ Հենրիխ Մխիթարեան  նշանակեցին Հայաստանի կոլերը, Ալեսանտրօ Ֆլորենզի եւ Մարիօ Պալոթելի՝ Իտալիոյ:  Պուլկարիա՝  սեփական  դաշտին մէջ պարտութիւն մը կրեց Չեխիայէն եւ  կորսնցուց «Փլէյ-Օֆ»ներուն մասնակցելու  յոյսերը: Նշենք, թէ Հայաստանի  հաւաքականը  իր խմբակին մէջ   գրաւեց  հինգերորդ  դիրքը: Իտալիոյ դէմ հանդիպումէն ետք,  Հայաստանի հաւաքականի մարզիչ Վարդան Մինասեան  յայտարարեց, թէ  մրցումին արդիւնքը կը համապատասխանէր  խաղի  ընթացքին: Իտալիոյ  հաւաքականի մարզիչ Չեզարէ  Պրանտելի յայտնեց, թէ Հայաստան ցուցադրած էր   հետաքրքիր խաղ:

Գ.Խմբակին մէջ,  Գերմանիա՝   մրցումի հաշիւին մէջ  2- 0  արդիւնքով ետ մնալէ ետք՝ 5-3 արդիւնքով տպաւորիչ յաղթանակ մը արձանագրեց  Շուէտի դէմ:  Չելսիի յարձակող՝ Անտրէ Շուրլէ նշանակեց  հեթ-թրիք մը (երեք կոլ): Իրլանտա՝  3-1 արդիւնքով պարտութեան մատնեց Ղազախստանը:

Դ.Խմբակին մէջ,  Քիփրիան Մարիսայի երկու կոլերը  բաւարար էին, որպէսզի Ռումանիա՝  2-0 արդիւնքով պարտութեան մատնէր Էսթոնիան: Հոլանտա՝ Իսթանպուլի մէջ 2-0 արդիւնքով պարտութեան մաստնեց Թուրքիան եւ  վերջ դրաւ «Փլէյ-Օֆ»ներուն հասնելու  Թուրքիոյ  յոյսերուն:

Ե. Խմբակին մէջ,  Զուիցերիա՝  1-0 արդիւնքով  պարտութեան մատնեց  Սլովենիան: Վերջինիս պարտութիւնը  պատճառ  դարձաւ, որ Իսլանտան  հասնէր  «Փլէյ-Օֆ»ներուն: Իսլանտացիները, Օսլոյիի մէջ,  1-1 արդիւնքով  մարտական  հաւասարութիւն մը արձանագրեցին  Նորվեկիոյ  դէմ:

Զ.Խմբակէն ներս,  Պաքուի մէջ,  Ռուսիա 1-1 արդիւնքով հաւասարութիւն մը արձանագրեց  Ատրպէյճանի  դէմ եւ ապահովեց  Մոնտիալ – 2014ի եզրափակիչներուն  մասնակցելու իր   ուղեգիրը:  Փորթուգալ, որուն կազմէն կը բացակայէր  Քրիսթիանօ Ռոնալտօ՝ 3-0 արդիւնքով պարտութեան  մատնեց Լիւքսեմպուրկը:

Է.Խմբակին մէջ,  Պոսնիա՝  1-0 արդիւնքով  պարտութեան մատնեց   Լիթուանիան:  Կ’արժէ  նշել, որ Պոսնիոյ  հաւաքականը՝ 2010-ի Մոնտիալին եւ 2012-ի Եւրոպայի Ազգային Խումբերու ախոյեանութեան զտման մրցումներուն, երկու առիթներով  Փորթուգալէն պարտուելով  զրկուած էր  եզրափակիչներուն  մասնակցելու  իրաւունքէն:

Ը. Խմբակին մէջ, շնորհիւ  Ուէյն Ռունիի եւ Սթիվըն Ճեռարտի  կոլերուն,  Անգլիա՝ 2-0 արդիւնքով պարտութեան մատնեց Լեհաստանը: Նշենք, թէ Անգլիոյ  խմբապետ Սթիվըն Ճեռարտ 107-րդ անգամ կրեց ազգային խումբին շապիկը՝ Փիթըր  Շիլթընըէն ( 125), Տէյվիտ Պեքհամէն (115)  Պոպի Մուրէն (108)  ետք դառնալով  զայն  չորրորդ  ամենաշատ կրող մարզիկը:

Թ.Խմբակին մէջ,  Սպանիա՝ 2-0 արդիւնքով  հանցիստ  յաղթանակ  մը արձանագրեց  Վրաստանի դէմ: Ալվարօ Նեկրետօ եւ Խուան Մաթա  նշանակեցին  սպանացիներուն կոլերը: Միւենոյն խմբակին մէջ, Ֆրանսա՝  3-0 արդիւնքով պարտութեան մատնեց  Ֆինլանտան:

15   Հոկտեմբերի դրութեամբ, 18 հաւաքականներ՝  Պրազիլ (հիւրընկալ), Աւստրալիա, Ճափոն, Իրան, Հարաւ Քորէա, Պելճիքա, Անգլիա, Իտալիա,  Ռուսիա,  Զուիցերիա, Պոսնիա, Գերմանիա, Հոլանտա, Սպանիա, Գոսթա Ռիքա, Միացեալ Նահանգներ,Արժանթին եւ Գոլոմպիա  ապահոված են  Մոնտիալ 2014-ի  ուղեգիրները:

Ստորեւ,  մրցումներուն  թեքնիք արդիւնքները:

Ա. ԽՄԲԱԿ

Սերպիա- Մակեդոնիա՝ 5-1

Պելճիքա –  Ուէյլզ՝ 1-1

Սկովտիա  –  Խրուաթիա՝ 2-0

Բ.ԽՄԲԱԿ

Պուլկարիա –  Չեխիա՝ 0-1

Դանիա –  Մալթա՝ 6-0

Իտալիա – Հայաստան՝ 2-2

Գ.ԽՄԲԱԿ

Ֆարօ Կղզիներ- Աւստրիա՝ 0-3

Իրլանտա – Ղազախստան՝ 3-1

Շուէտ –  Գերմանիա՝ 3-5

Դ. ԽՄԲԱԿ

Հունգարիա – Անտորա՝ 3-0

Ռումանիա –  Էսթոնիա՝ 2-0

Թուրքիա –  Հոլանտա՝ 0-2

Ե. ԽՄԲԱԿ

 Կիպրոս –  Ալպանիա՝ 0-0

Նորվեկիա –  Իսլանտա՝ 1-1

Զուիցերիա –  Սլովենիա՝  1-0

Զ.ԽՄԲԱԿ

Ատրպէյճան –  Ռուսիա՝ 1-1

Իսրայէլ – Հիւսիսային Իրլանտա՝ 1-1

Փորթուգալ –  Լիւքսեմպուրկ՝3-0

Է.ԽՄԲԱԿ

Յունաստան –  Լիխնիշթայն՝ 2-0

Լաթվիա – Սլովաքիա՝ 2-2     

Լիթուանիա- Պոսնիա 0-1

Ը.ԽՄԲԱԿ

Անգլիա – Լեհաստան՝ 2-0 

Մոնթենեկրօ –  Մոլտովա՝ 2- 5

Սան Մարինօ –  Ուքրանիա՝ 0-8

Թ.ԽՄԲԱԿ

Ֆրանսա –  ֆինլանտա՝ 3-0

Սպանիա –  Վրաստան՝  2-0

Հարաւամերիկեան Գօտիէն ներս,  Ուրուկուէյի հաւաքականը Մոնթէվիտէոյի մէջ ընդունեց  Արժանթինը:  Հանդիպումը  վերջ գտաւ   Ուրուկուէյի յաղթանակով՝  3-2:  Քրիսթիան Ռոտրիկէզ, Էտինսոն Գաւանի եւ Լուիս Սուարէզ նշանակեցին տանտէրներուն կոլերը,  Մաքսի Ռոտրիկէզ՝ Արժանթինի:

Սոյն հանդիպումէն ետք, Արժանթին՝ 32 կէտով  կը  գրաւէ  հարաւամերիկեան Գօտիի ընդհանուր դասաւորման  առաջին դիրքը:  Գոլոմպիա՝ 30 կէտով  կու գայ երկրորդ  դիրքի վրայ:  Չիլի՝ 28 կէտ,  Էքուատոր՝ 25 կէտ համապատասխանաբար՝ կու գան  երրորդ եւ չորրորդ դիրքերուն վրայ:  Ուրուկուէյի հաւաքականը՝  25 կէտով  կը գրաւէ  հինգերորդ դիրքը եւ «Փլէյ –Օֆ»ի  մրցումներուն  յաղթելու պարագային ձեռք պիտի  բերէ Մոնտիալին  մասնակցելու իրաւունք:

LEAVE A REPLY

Please enter your comment!
Please enter your name here