ԻՐԱՆ – ՎԵՑԵԱԿ ՅԱՋՈՐԴ ՀԱՆԴԻՊՈՒՄԸ 7 ԵՒ 8 ՆՈՅԵՄԲԵՐԻՆ

0
110

 «Ռոյթըրզ»  լրատուական գործակալութիւնը հաղորդեց, թէ  Իրանի եւ Վեցեակի  միջեւ  բանակցութիւններու   յաջորդ  հանգրուանը  տեղի պիտի ունենայ   7 եւ 8 Նոյեմբերի միջեւ:  «Ռոյթըրզ» նշեց, թէ  Ժընեւի մէջ կայացող երկօրեայ  բանակցութիւնները  աւարտեցան դրական եւ  կառուցողական  մթնոլորտի մէջ:   Կողմերը  Երեքշաբթի  օր ունեցան երկու հանդիպում, Չորեքշաբթի՝  մէկ:  Չորեքշաբթի օրուան հանդիպումէն  ետք,  Եւրոպական Միութեան արտաքին  քաղաքականութեան  գլխաւոր  բանագնաց  Քաթրին Աշթըն  դռնփակ հանդիպում մը ունեցաւ  Իրանի արտաքին գործոց նախարար  Մուհամմէտ Ճաուատ  Զարիֆի հետ: Հանդիպումէն  ետք, Աշթըն յայտարարեց, թէ Արեւմուտքը եւ Իրանը   վարած են ցարդ՝ «ամենահանգամանալի բանակցութիւններ»ը:

Եւրոպական Միութեան արտաքին քաղաքականութեան հարցերու   ներկայացուցիչ  Մայքըլ Մանն  հաստատեց, թէ  Իրան մտադիր է  երաշխաւորելու իր միջուկային  ծրագիրին  թափանցիկութիւնը: Իրանի փոխ արտաքին գործոց նախարար Ապպաս  Արաքչի յայտարարեց թէ Թեհրան պատրաստ է ընթացք տալու՝  իր միջուկային  կեդրոնները անակնկալ   հետաքննութեան ենթարկելու  Վեցեակի առաջարկին: Ան  նշեց Ժընեւի մէջ  համախմբուած կողմերուն միջեւ  վստահութեան հաստատման  անհրաժեշտութիւնը:  Իրանեան  պատուիրակութեան անդամ  մը յայտնեց, թէ  Թեհրան պատրաստ է  քննարկելու  մինչեւ  քսան տոկոս ուրանի հարստացումը դադրեցնելու  կարելիութիւնը, եթէ Միացեալ Նահանգներ եւ Եւրոպական Միութիւն  ջնջեն  միակողմանի  պատժամիջոցները:

«Ուաշինկթըն Փոսթ» օրաթերթը կը գրէ, թէ  Թուրքիա իրանեան իշխանութիւններուն յանձնած է Իսրայէլի հաշւոյն  լրտեսութիւն կատարող տասը իրանցի գործակալներու անուններ:

LEAVE A REPLY

Please enter your comment!
Please enter your name here