ԾԵՐԱԿՈՅՏԻ ՄԷՋ ԺԱՄԱՆԱԿԱՒՈՐ ՀԱՄԱՁԱՅՆՈՒԹԻՒՆ՝ ՊԵՏԱԿԱՆ ՊԻՒՏՃԷԻ ԵՒ ՊԱՐՏՔԻ ԱՌԱՍՏԱՂԻՆ ՇՈՒՐՋ

0
118

Չորեքշաբթի, 16 Հոկտեմբերին, Ծերակոյտի դեմոկրատներն ու հանրապետականները նախնական համաձայնութիւն մը գոյացուցին՝ յաւելեալ վարկեր վերցնելու շուրջ յաւելեալ իրաւասութիւններ շնորհելով կառավարութեան, ինչպէս նաեւ կառավարութիւնը մասնակիօրէն փակած սահմանափակումները ժամանակաւորապէս վերցնելով: Ըստ նախնական համաձայնութեան, որ պէտք է վաւերացուի նաեւ Ներկայացուցիչներու Տան կողմէ, բաւարար գումար պիտի տրամադրուի կառավարութեան բնականոն գործունէութիւնը շարունակելու համար մինչեւ  15 Յունուար  2014, իսկ կառավարութիւնը մինչեւ   7 Փետրուար 2014, պիտի կարենայ յաւելեալ վարկեր վերցնել՝ իր պարտքերը ժամանակին վճարելու համար: Ծերակոյտի դեմոկրատ մեծամասնութեան ղեկավար Հերի Ռիտ յայտարարեց, թէ ժամանակն է հաշտութեան գործընթացը սկսելու, մինչ հանրապետական փոքրամասնութեան ղեկավար Միչ ՄըքՔանըլ յայտարարեց, թէ համաձայնութիւն գոյացած է նաեւ պետական ծախսերը կրճատելու շուրջ՝ առանց մանրամասնութիւններ հրապարակելու այդ մասին: Այս տագնապին գլխաւոր պատճառը հանդիսացած «Օպամաքէր»ի նկատմամբ հանրապետականներու ընդդիմութիւնը միայն փոքր նշում մը ունի համաձայնութեան մէջ, ըստ որուն՝ անոր դիմողներու եկամուտները պէտք է ստուգուին՝ ապահովագրութեան համար վճարուած գումարներէն մաս մը անոնց վերադարձնելէ առաջ, որովհետեւ, ըստ նոր օրէնքին՝ որոշ չափէ մը ցած եկամուտ ունեցողները նպաստ պիտի ստանան առողջապահական ապահովագրութեան համար:

 

LEAVE A REPLY

Please enter your comment!
Please enter your name here