ՊԱՆ ՔԻ ՄՈՒՆ Կ’ԱՃԱՊԱՐԷ ՃՇԴԵԼՈՒ «ԺԸՆԵՒ-2» ԽՈՐՀՐԴԱԺՈՂՈՎԻՆ ԹՈՒԱԿԱՆԸ

0
105

ՄԱԿ-ի ընդհանուր քարտուղար Պան Քի Մուն  դիտել տուաւ, թէ Սուրիոյ  իրավիճակը  դարձած  է  խիստ վտանգաւոր  եւ անկանխատեսելի:  Ան պահանջեց  կարելի եղած չափով կանուխ կայացնել « Ժընեւ -2» խորհրդաժողովը, վերջ դնելու  սուրիացի  ժողովուրդին  սարսափելի   բռնութիւններուն եւ  տառապանքներուն:  Պան Քի Մունը  հոլանտուհի Սիկրիտ  Քաակը նշանակեց  Սուրիոյ  մէջ ՄԱԿ-ի եւ քիմիական զէնքի ոչնչացման  կազմակերպութեան  համատեղ աշխատանքներու  ղեկավար: 52-ամեայ   Քաակ  միաժամանակ կը  ղեկավարէ  ՄԱԿ-ի եւ ԵՈՒՆԻՍԷՖ-ի   Միջին Արեւելքի եւ Հիւսիսային Ափրիկէի մանկական միջազգային   հիմնադրամը:

Միւս կողմէ,  Ուաշինկթըն կ’աշխատի  Սուրիոյ  ընդդիմութիւնը համոզել  ետդարձ կատարելու  «Ժընեւ-2»  խորհրդաժողովին չմասնակցելու որոշումէն: Սպիտակ Տան խօսնակ Ճէյ Փսաքիի կարծիքով,  խորհրդաժողովը  տեղի պիտի ունենայ  Նոյեմբեր ամսուան  կիսուն .« Այդ մասնակցութիւնը կարեւոր  է եւ հակամարտութիւնը լուծելու միակ տարբերակն է, Սուրիոյ մէջ   քաղաքացիական պատերազմը   քաղաքական  ճանապարհով   լուծելու համար».ըսաւ ան:  Պետական քարտուղար Ճո Քերրի դարձեալ  շեշտեց   խորհրդաժողովին թուականը անյապաղ որոշելու անհրաժեշտութիւնը:

Սուրիոյ   փոխվարչապետ Ղատրի Ճեմիլ  յայտնեց, թէ  «Ժընեւ-2» խորհրդաժողովը   տեղի պիտի ունենայ  23 եւ 24   Նոյեմբերին: Մոսկուա անմիջապէս  հակադարձեց  Ճեմիլի  յայտարարութեան,  լուսաբանելով թէ  «Ժընեւ-2» խորհրդաժողովին թուականը  ճշդելու լիազօրութիւնը ՄԱԿ-ի ընդհանուր քարտուղարին  վերապահուած է եւ ոչ՝  սուրիացի պաշտօնակատարներու:

 Քիմիական  զէնքերը  ոչնչացնելու   միջազգային  յանձնախումբը կը շարունակէ իր աշխատանքը: Սուրիոյ  իշխանութիւնները կը փորձեն  երկրին տարբեր շրջաններուն մէջ վերանորոգել  ծայրայեղականներու կողմէ քանդուած ելեկտրականութեան կեդրոնները:

Սուրիոյ  տարբեր  շրջաններու մէջ թէժ  բախումներ    տեղի կ’ունենան բանակին եւ  ծայրայեղականներուն  միջեւ:  Բանակը  երկրի կար մը  շրջաններ կ’ազատագրէ  ծայրայեղականներու  տիրապետութենէն: Ծայրայեղականները   գրաւեցին  Հալէպի  բանտը: Քամիշլիի մէջ,  քիւրտերը  զինուորական յաջողութիւններ սկսան արձանագրել  Տաաշ եւ  Ճեպհէթ Ալ Նուսրայի  զինեալներուն դէմ:

LEAVE A REPLY

Please enter your comment!
Please enter your name here