ԵՒՐՈՊԱԿԱՆ ՄԻՈՒԹԻՒՆԸ 70 ՄԻԼԻՈՆ ԵՈՒՐՕ ԱՐԺՈՂՈՒԹԵԱՄԲ ՕԺԱՆԴԱԿՈՒԹԻՒՆ ԽՈՍՏԱՑԱՒ ԼԻԲԱՆԱՆԻ ՄԷՋ ՍՈՒՐԻԱՑԻ ԳԱՂԹԱԿԱՆՆԵՐՈՒՆ

0
113

Հանրապետութեան նախագահ Միշէլ Սըլէյման Պաապտայի  պալատին մէջ ընդունեց  Լիբանանի մէջ  հաւատարմագրուած ՄԱԿ-ի Ապահովութեան Խորհուրդի  մնայուն անդամ  հինգ  պետութիւններու  դեսպանները:  Սըլէյման  յայտնեց, թէ Նիւ Եորքի խորհրդաժողովը կազմակերպչական եւ քննարկուած  օրակարգերուն տեսանկիւնէն,  մեծ յաջողութիւն մըն էր:  Սըլէյման  ընդգծեց, թէ գործնական գետնի վրայ, կատարուած ներդրումները  չեն բաւարարեր սուրիացի գաղթականներուն  մարդասիրական օժանդակութիւն  հայթայթելու  ծրագիրներուն: Հանդիպումը աւարտելէ ետք,  ՄԱԿ-ի ընդհանուր քարտուղարի անձնական պատուիրակ Տերէք  Փլամլի  շեշտեց, թէ միջազգային  ընտանիքը յանձնառու  կը մնայ  սուրիացի  գաղթականներու  հոսքին պատճառով Լիբանանին  օժանդակելու իր խոստումին:  Փլամլի՝   միջազգային ընտանիքէն յաւելեալ   օժանդակութիւն  խնդրեց  Լիբանանի համար:  Այս առիթով, ան  շեշտեց քաղաքական խմբաւորումներու միջեւ  երկխօսութեան եւ  Պաապտայի Յայտարարութեան  կառչած մնալու անհրաժեշտութիւնը:  Ան  նշեց, թէ  Սուրիոյ հակամարտութիւնը  իր ուղղակի անդրադարձը կ’ունենայ  ներլիբանանեան   բեմի զարգցումներուն  վրայ:

Իր  կարգին,  Լիբանանի մօտ Եւրոպական Միութեան  դեսպան Անճելինա  Էխորհրսթ,  ձմրան  ընթացքին իրագործելի, եօթանասուն  միլիոն եուրօ արժողութեամբ   օժանդակութիւն մը խոստացաւ  Լիբանանի  մէջ  սուրիացի գաղթականներուն:

Կառավարութեան տագնապը  կը գտնուի, անելային կացութեան  մը առջեւ: Ըստ երեւոյթին Ատհայի տօնէն ետք զայն լուծելու  երաշխիքները   ի դերեւ   դուրս պիտի  գան՝   հակասական  տեսակէտերու գոյութեան, ինչպէս նաեւ  շրջանային ուժերու միջեւ տիրող  անհամաձայնութիւններուն պատճառով:  Մարտ  14-ի ուժերը   հանրապետութեան նախագահէն եւ  նորանշանակ վարչապետէն   պահանջեցին անյապաղ  կազմել ապակուսակցական եւ Պաապտայի Յայտարարութեան  յանձնառու  կառավարութիւն մը: Խորհրդարանի նախագահ Նեպիհ Պըրրի դարձեալ  շեշտեց    երկխօսութեան սեղան վերադառնալու իր նախաձեռնութիւնը վերաշխոյժացնելու  անհրաժեշտութիւնը:  Լրատուական կարգ մը աղբիւրներ նշեցին,թէ  հանրապետութեան նախագահը իր այցելուներուն  յայտնած է, թէ  պատրաստ  է ընդունելու  Սալամի կողմէ ներկայացուած որեւէ  ցանկ:

LEAVE A REPLY

Please enter your comment!
Please enter your name here