«ԺԸՆԵՒ 2»Ի ԹՈՒԱԿԱՆԸ ՈՐՈՇԵԼՈՒ ՆԱԽԱՊԱՏՐԱՍՏՈՒԹԻՒՆՆԵՐ

0
114

 Ռուսիոյ  փոխարտաքին գործոց նախարար Կենատի Կաթիլով  յայտնեց, թէ  յառաջիկայ ամսուան  սկիզբը,  Միացեալ Նահանգներ, Ռուսիա եւ  ՄԱԿ-ը   եռակողմ  հանդիպում մը պիտի ունենան,  «Ժընեւ-2-» խորհրդաժողովին նախապատրաստուելու  նպատակով:

Միացեալ Նահանգներու պետական քարտուղարութեան խօսնակ Ճէյն Փսաքի   յայտարարեց, թէ  «Ժընեւ -2» խորհրդաժողովին  թուականին մասին  յստակ թուականի մը  ճշդումը  բաւական  դժուար պիտի  ըլլայ  ներկայ  հանգրուանին: Փսաքի  լուսարձակի  տակ  առաւ Իրանի մասնակցութիւնը, նշելով թէ Ուաշինկթըն  իր դաշնակիցներուն հետ  կը քննարկէ  Իրանի մասնակցութեան հարցը:

Զինուորական գետնի վրայ, սուրիական  բանակը կասեցուց Լիբանանէն  Սուրիա թափանցելու փորձ մը:

 Միւս կողմէ, Սուրիոյ Սետնայա քաղաքին մէջ 14  Հոկտեմբերին տեղադրուեցաւ Հայաստանի մէջ ձուլուած Յիսուս Քրիստոսի` 39 մեթր բարձրութեամբ պրոնզէ շքեղ արձանը: Ալ-Շերոպիմ կամ Հրեշտակներու լերան գագաթին վեր խոյացող արձանը կը կոչուի «Ես եկած եմ փրկելու աշխարհը»: Ան մէկ մեթրով բարձր է Պրազիլի մէջ տեղադրուած համանման քանդակէն:

Հայաստանի մէջ ձուլուած արձանի տեղադրման եռօրեայ աշխատանքներու ընթացքին, պատերազմական գործողութիւնները այդ շրջանի մէջ դադրած են: Այս մասին կը հաղորդէ «Արմենփրես»-ը` վկայակոչելով «Քոմսամուսկայա Փրավտա»-ն:

Արձանի տեղադրման գաղափարը ծագած է հինգ տարի առաջ գործարար Եուրի Կաւրիլովի մօտ, որուն աջակցած է նաեւ սուրիացի գործարար էլ- Գատման Սամիր Շաքիպը: Արձանի տեղադրումէն  ընդամէնը երկու օր ետք, մտայաղացման հեղինակ Եուրի Կաւիլով մահացաւ` հասցնելով իր ետին ձգել նման գեղեցիկ գործ Սուրիոյ եւ աշխարհին:

LEAVE A REPLY

Please enter your comment!
Please enter your name here