Հայաստան Եւ Պասքեթպոլը (Պասքեթպոլի Միջազգային Մրցաշրջանը Երեւանի մէջ /2014 FIBA/)

0
132

 

Յաճախ ըսած ենք ու պիտի շարունակենք կրկնել լափալիսեան այն ճշմարտութիւնը թէ՝

երիտասարդները մեր ապագան են, պէտք է գուրգուրանք անոնց վրայ, պէտք է փոքր

տարիքէն պատրաստենք ու թրծենք զանոնք, որպէսզի հեզասահ ընթանայ անհրաժեշտ

սերնդափոխութիւնը: Մարդկային կեանքը օրկանական աշխարհի օրէնքներուն կը հետեւի.

Մարդը, ընկերութիւնը, հասարակութիւնը պէտք է եւ պարտաւոր է ապահովել իր

շարունակականութիւնը:

Այս խոհերով բաժնուեցայ Հայաստանի Պասքեթպոլի հաւաքականի հետ հանդիպումէն,

հոգեկան հանգստութիւն մը եկաւ վրաս եւ աւելի հաւատքով ու լաւատեսութեամբ

բաժնուեցայ իրենցմէ:

Լոս Անճելըսի Հայաստանի Հանրապետութեան հիւպատոսարանին մէջ ընդունելութիւն-

հարցազրոյց մըն էր, ուր ներկայ էին ինծի պէս հայ երիտասարդութեան կամքի ուժին

հաւատացողներ, մարզասէրներ, հովանաւոր ազգայիններ: Բոլորիս ուշադրութիւնը այս

հասակաւոր, ես պիտի ըսէի՝ պարթեւահասակ տղաներուն վրայ էր, որոնց կ’ընկերանային իրենց մարզիչները՝ գլխաւորութեամբ արտակարգ անձնաւորութեան մը, որ տիրացած է

բազմաթիւ ոսկեմետալներու, գովասանագիրներու եւ գնահատագիրներու: Ան Քարլ

Պարտագեանն է, ԱՄՆ ծնած ու մեծցած, իր ուսանած համալսարանին մէջ պասքէթպոլի

աստղ դարձած երիտասարդ մը, որ իմ կարծիքով մտատիպար մըն է հայ երիտասարդի:

Քարլ հայերէնը սորված է եւ ազատօրէն կը հաղորդակցի մայրենիով ԱՄՆ-ի մէջ ոչ միայն իր շնորհքին որպէս արդիւնք, այլ հայերէն թերթ կարդալով եւ սպասարկելով Հայաստանեայց եկեղեցւոյ որպէս սարկաւագ: Առանձնակի հպարտութեամբ կը յիշեմ իր խօսքը, երբ այս

տողերու հեղինակին կ’ըսէր. «Ես ձեր յօդուածները առաջին կարդացողներէն եմ»:

Այսօր Քարլ մեզի կը ներկայանայ որպէս Հայաստանի հաւաքականի գլխաւոր

կազմակերպիչ ու մարզիչ, որուն վստահուած է մեր հաւաքականը տանիլ յաղթանակէ

յաղթանակ: Ոչինչ կը պակսի իրեն՝ իր եւ մեր երազը իրականացնելու ճամբուն վրայ: Ան

կամքի տէր է, հայրենասէր՝ բառիս բուն իմաստով, հեզ բայց պահանջքոտ, գիտէ ընտրել

ճիշդ գործընկերներ եւ օգնականներ, ինչպէս Զօրիկ Իսաջանը:

Հիւպատոսարանի ընդունելութեան ընթացքին միջոցառումին հանդիսավար Միհրան

Թումաճան շատ պարզ կերպով ըսաւ. «Մենք բոլոր տուեալները ունինք ախոյեան

դառնալու, երբ ունինք այսպիսի նուիրեալ տղաք, մարզիչներ ու համակիրներ»:

Տղաքը նոր վերադարձեր էին հայրենիքէն, ուր անոնք իրենց հայաստանաբնակ

խաղընկերներուն հետ անցուցած էին բարդ ու բազմակողմանի վարժութիւններ եւ լի էին

ինքնավստահութեամբ: Անոնք լրջօրէն կը շարունակեն իրենց մարզումները այստեղ՝ Լոս

Անճելըսի մէջ, որովհետեւ «սա կարեւոր ստուգատես է մեր թիմի համար, նաեւ՝

պարտաւորեցնող այն առումով, որ առաջին անգամ Եւրոպայի առաջնութեան խաղերն

անցկացուելու են մեր հայրենիքում», յայտնեց Քարլ Պարտաքեանը:

Այո՛, առաջին անգամ ըլլալով Հայաստանի պասքեթպոլի պատմութեան մէջ, Եւրոպայի

առաջնութեան խաղերը տեղի պիտի ունենան մեր հայրենիքին մէջ: Հայաստանի խումբը

ընդգրկուած է C բաժանմունքին մէջ, ուր պիտի մրցին Ուելսի, Մալթայի, Սկովտիոյ,

Անտորայի եւ Սան Մարինոյի հաւաքականները: Հասնելու համար ցանկալի

արդիւնքներու: Գլխաւոր մարզիչը կը վստահեցնէ թէ դիտարկումներ կը կատարուին

ընտրելու լաւագոյն մարզիկները հայրենիքէն, Արցախէն եւ սփիւռքէն:

Ուշադրութեամբ հետեւեցանք մեր պասքեթպոլիստներու յաղթելու վճռակամութեամբ

լեցուն արտայտութիւններուն: Անոնք առանձնակի բծախնդրութեամբ ու

պատասխանատուութեամբ կը մօտենան ախոյեանական խաղերուն, որովհետեւ հանդէս

պիտի գան Հայաստանի դրօշի ներքոյ: «Ինձ համար մեծ պատիւ է, որ ներկայացնելու եմ

Հայաստանը: Իւրաքանչիւր հայ ցանկանում է օգտակար լինել իր հայրենիքին: Ես յոյս

ունեմ, որ մեր յաջողութեամբ կը կարողանանք բարձրացնել մեր երկրի դրօշը», ըսաւ

հաւաքականի աւագ Մայք Դանիէլեանը: Պասքէթպոլիստ Գոռ Փլաւչեանը վստահ է թէ

«Եւրոպայի առաջնութեան անցկացումը Հայաստանում մեծապէս կարող է ազդել

Հայաստանում այս մարզաձեւի նկատմամբ հետաքրքրութեան մեծացմանը եւ կ՛ոգեւորի

մեր կրտսեր պասքեթպոլիստներին»:

Հանդիպման ընթացքին Քարլ Պարտաքեան կարեւորութեամբ նշեց որ բարերարներու եւ

Հայաստանի պասքեքպոլի դաշնութեան ջանքերուն շնորհիւ՝ դժուարութիւնները այլեւս

անցեալի մէջ են:

Խրախուսանքի եւ յաջողութիւններու համար խօսք առին ծանօթ բարերար եւ անցեալի

մարզիկ Ալպեր Պոյաճեանն ու Թոմիկ Ալեքսանեանը, որոնց ճառագայթող հպարտութիւնը

յոյս ու հաւատք ներշնչեց մամլոյ ասուլիսի ներկաներուն սրտերուն մէջ:

Ահաւասիկ վաւերական եւ կարեւոր խորհուրդ պարունակող իրականութիւն մը, զոր

Հայատանի Գլխ. Հիւպատոս Գ. Յովհաննիսեան բանաձեւեց հետեւեալ խօսքով.

«Պասքեթպոլի տղամարդկանց Հայաստանի ազգային հաւաքականը Հայաստան-Սփիւռք

համագործակցութեան լաւագոյն օրինակներից է»:

Մեր երիտասարդ խումբը քաջալերելու համար եկած էին նաեւ Հայաստանի նախկին

հաւաքականի նշանաւոր խաղցողներէն եւ մարզիչներէն Աբրահամ Համամճեանն ու թեթեւ քաշի ըմբշամարտի համաշխարհային աստղ Վանէս Մարտիրոսեանը:

 

ԴՈԿՏ. ՄԻՆԱՍ ԳՈՃԱՅԵԱՆ

Լոս Անճելըս

Ռամկավար Մամուլ

Հոկտեմբեր 18, 2013

 

LEAVE A REPLY

Please enter your comment!
Please enter your name here