ԱՓԱԹՈՒՐԱՅ՝ ՀԱՅԱՍՏԱՆ ՄԻՇՏ ԱԼ ՀԱՒԱՍԱՐԱԿՇՌՈՒԱԾ ՔԱՂԱՔԱԿԱՆՈՒԹԻՒՆ ՎԱՐԱԾ Է

0
136

ՆԱԹՕն յոյսով է, որ ղարաբաղեան հակամարտութիւնը շուտով պիտի կարգաւորուի: Այս մասին լրագրողներուն յայտնեցէ ՆԱԹՕ-ի գլխաւոր քարտուղարի յատուկ ներկայացուցիչ Ճէյմզ Ափաթուրայը:
Անդրադառնալով ատրպէյճանական կողմէն Հայաստանի ու Արցախի հասցէին հնչող մնայուն սպառնալիքներուն՝ Ափաթուրայը նշած է, որ արդէն ծանօթ է, թէ ՆԱԹՕ-ն Ղարաբաղի հարցին առնչութեամբ որեւէ դերակատարութիւն չունի, բայց կը սատարէ ԵԱՀԿ Մինսքի խմբակի ջանքերուն: «Մենք կը գործակցինք ե՛ւ Հայաստանի, ե՛ւ Ատրպէյճանի հետ: Բոլոր հանդիպումներուն ընթացքին շեշտը կը դնենք ղարաբաղեան խնդրի բացարձակապէս խաղաղ կարգաւորման հարցին վրայ: Ղարաբաղեան հակամարտութիւնը ռազմական լուծում չունի, միակը՝ փոխզիջումային, քաղաքական լուծումն է: Տարածաշրջանի բոլոր երկիրները տնտեսական, քաղաքական մեծ օգուտներ պիտի ստանան այս հակամարտութեան կարգաւորումէն ետք», աւելցուց Ափաթուրայը:
ՆԱԹՕ-ի գլխաւոր քարտուղարի յատուկ ներկայացուցիչը նշեց, որ, ինչպէս յայտնի է, մօտիկ ապագային Մինսքի գործընթացի ծիրին մէջ կը նախատեսուի կազմակերպել Հայաստանի ու Ատրպէյճանի նախագահներու հանդիպումը: «Յոյսով ենք, որ ղարաբաղեան հակամարտութիւնը յառաջիկայ հանգրուանին կը կարգաւորուի», յայտնեց ան։
Խօսելով Հայաստանի եւ ՆԱԹՕ-ի գործակցութեան մասին՝ Ափաթուրայը նշեց, որ Հայաստանը միջազգային անվտանգութեան ապահովման աշխոյժ մասնակիցներէն է, ինչպէս նաեւ խաղաղապահ առաքելութիւններու կազմին մէջ:
Ըստ ՆԱԹՕի գլխաւոր քարտուղարի յատուկ ներկայացուցիչին, իրենց համար շատ յստակ է, որ Հայաստան Ռուսիոյ հետ ռազմավարական գործընկերութեան մէջ է, ինչ որ երկիրին ինքնիշխան որոշումն է, սակայն Հայաստանը միշտ ալ հաւասարակշռուած քաղաքականութիւն վարած է եւ ընդլայնած իր գործակցութիւնը նաեւ ՆԱԹՕի հետ:
«Այստեղ «կամ-կամ»ի խնդիր չկայ, կայ «եւ-եւ»ի սկզբունք», ըսած է ան։
Ան աւելցուցած է, որ ՆԱԹՕ երբեք նպատակ չէ ունեցած ընդլայնիլ եւ տարածուիլ դէպի յետխորհրդային տարածք, սակայն դաշինքի դռները միշտ բաց եղած են ժողովրդավարական երկիրներուն դիմաց. «ասիկա քաղաքական սկզբունք է, որուն մենք հաւատարիմ են», շեշտեց Ափաթուրայ՝ աւելցնելով, որ ՆԱԹՕն կը յարգէ  ինքնիշխան ընտրութիւնը իր բոլոր գործընկերներուն, որոնք մտադիր չեն անդամակցելու ՆԱԹՕ-ին:

LEAVE A REPLY

Please enter your comment!
Please enter your name here