ՀԱՆՐԱՊԵՏՈՒԹԵԱՆ ՆԱԽԱԳԱՀԸ ՄՕՏԷՆ ՀԵՏԵՒԵՑԱՒ ԱԶԷԶԻ ՄԷՋ ԱՌԵՒԱՆԳԵԱԼ ԼԻԲԱՆԱՆՑԻՆԵՐՈՒՆ ԱԶԱՏ ԱՐՁԱԿՄԱՆ ԲԱՆԱԿՑՈՒԹԻՒՆՆԵՐՈՒՆ

0
111

Ազէզի մէջ առեւանգուած  լիբանանցի ուխտաւորներուն  թղթածրարը  ունեցաւ  եգիպտական սենարիոյով  լիբանանեան վերջաբան: Արդարեւ  մօտաւորապէս  մէկուկէս տարի (Առեւանգման թուական՝ 22 Մաիս 2012), կալանքի տակ մնալէ ետք,  ինը առեւանգեալները քաթարեան  օդանաւով, Լիբանանի ընդհանուր անվտանգութեան ընդհանուր պետ, հազարապետ Ապպաս Իպրահիմի, Քաթարի արտաքին գործոց նախարար  Խալէտ Պըն Մուհամմէտ Աթիյէի եւ պաղեստինեան պատուիրակութեան մը  ընկերակցութեամբ պիտի ժամանեն  Պէյրութի միջազգային  օդակայանը: «Էլ. Պի.Սի» հեռատեսիլի  կայանը   հաղորդեց, թէ Ապպաս Իպրահիմ  միաժամանակ արծարծած է    Սուրիոյ մէջ առեւանգուած երկու եպիսկոպոսներուն հարցը: Ապպաս, հաւաստած է թէ  եպիսկոպոսները  ողջեն, իսկ վերջերս  Պրիւքսէլ կատարած այցելութիւնը առնչուած է զանոնք  ազատ արձակելու  բանակցութիւններիւն: Այս  միջոցին, Թուրքիոյ արտաքին գործոց նախարար  Ահմէտ Տաւուտօղլու  յայտարարեց, թէ  առեւանգուած երկու թուրք  օդաչուները  քանի մը  ժամերու  ընթացքին ազատ պիտի արձակուին:  Սակայն  Ապպաս Իպրահիմ  ընդգծեց, թէ  թուրք  օդաչուներուն ազատ արձակումը   առնչութիւն  չունի  Ազէզի առեւանգեալներուն  թղթածրարին հետ. « Լիբանանցի առեւանեալներու  թղթածրարը  փակուելէ ետք, տրամաբանական է որ  լուծումին հասնի թուրք  օդաչուներուն հարցը». յայտնեց ան:  Այս միջոցին, թուրք  օդաչուները առեւանգողներուն անունով   լոյս տեսաւ  հաղորդագրութիւն մը, որուն մէջ  կը  նշուէր  թէ Ազէզի առեւանգեալները  վերադառնալէ անմիջապէս ետք ազատ պիտի արձակեն զանոնք:

Լիբանանեան  «Ալ Լիուա» օրաթերթը կը գրէ, թէ  Քաթար՝ 150  միլիոն  տոլար գումար  մը վճարած է Ազէզի  առեւանգեալները ազատ արձակելու համար: Նախքան առեւանգեալներուն  վերադարձը, ներքին գործոց նախարարի պաշտօնակատար Մարուան Շարպէլ  յայտարարեց, թէ   ներքին ապահովական ուժեր ամբողջացուցած  են առեւանգեալները  դիմաւորելու կազմակերպչական աշխատանքները: Շարպէլ  խուսափեցաւ  խօսիլ   ժամանակացոյցի  եւ  անոնց  ժամանման  թուականին մասին: Ներքին գործոց նախարարը  հեռաձայնային հաղորդակցութիւններ ունեցաւ հանրապետութեան նախագահին,   հրաժարեալ եւ  նորանշանակ  վարչապետներուն հետ,  անոնց  դնելով  բանակցութիւններուն  մթնոլորտին մէջ:   Շարպէլ  շնորհակալութիւն  յայտնեց Քաթարին՝  առեւանգեալները ազատ արձակելու  աշխատանքներուն մէջ  ունեցած  դերակատարութեան  համար:

LEAVE A REPLY

Please enter your comment!
Please enter your name here