ՌՈՄԱ ԿԸ ՄՆԱՅ ԱՆԳԵՐԱԶԱՆՑԵԼԻ – ՊԱՐՉԵԼՈՆԱ ԵՒ ԱԹԼԵԹԻՔՕ ԿՈՐՍՆՑՈՒՑԻՆ ԻՐԵՆՑ ՅԱՂԹԱՐՇԱՒԻ ԲԱՆԱԼԻՆ

0
142

  Սպանիոյ   ֆութպոլի ախոյեանութեան 9-րդ հանգրուանի մրցումներուն, Պարչելոնայի  յաղթարշաւը կասեցաւ,երբ   0-0 արդիւնքով  հաւասարութիւն մը արձանագրեց   Օսասունայի համեստ կազմին դէմ:  Յատկանշական էր, որ  ախոյեանութեան նախորդ  64 մրցումներուն  ընթացքին նուազագոյնը մէկ կոլ  նշանակող Պարչելոնա, այս  հանդիպումին  չկրցաւ  գրաւել մրցակիցին  բերդը:   Գաթալոնական  խումբը, վերջին անգամ ախոյեանութեան գծով,  Վիլառէալի դէմ,  29 Յունուար 2012-ին, դաշտէն հեռացած էր  0-0  հաւասարութեամբ:  Պարչելոնայի անմիջական մրցակիցը  Աթլեթիքօ Մատրիտը  սայթաքեցաւ Պարչելոնա քաղաքի միւս խումբին՝  Էսփանիոլի առջեւ:   Մատրիտցիները   1-0 արդիւնքով  խոնարհեցան   Էսփանիոլի առջեւ:

  Ռէալ Մատրիտ,  2-0 արդիւնքով պարտութեան մատնեց Մալական:   Անխէլ Տի  Մարիա  եւ Քրիսթիանօ Ռոնալտօ նշանակեցի ն մայրաքաղաքի  կազմին կոլերը: Ռէալ,  ներկայիս  22 կէտով կը  գրաւէ ընդհանուր դասաւորման  3-րդ դիրքը:  Աթլեթիքօ  Մատրիտ եւ  Պարչելոնա  ունին 24-ական կէտ: Նշենք, թէ անգլիական ակումբ մը,  որ  փափաքած  է  գաղտնի պահել իր անունը,  45  միլիոն եուրօ առաջարկած է  Ռէալ Մատրիտի  յարձակող Քարիմ Պենզեմայի փոխանցումին համար:   Ռէալի  տնօրէնութիւնը խոստացած է  յառաջիկայ  շաբաթավերջին  Պարչելոնայի  դէմ կայանալիք « Էլ Գլասիքօ»էն ետք  քննարկել  այս առաջարկը:  Սպանական  «Էլ Մոնտօ Տեփորթիվօ»   օրաթերթը կը գրէ, թէ  Լիոնէլ Մեսի  դարձած է  սպանական  ֆութպոլի ամենաբարձր  վարձատրուող   մարզիկը:  Օրաթերթին  համաձայն,  Մեսի՝ տարեկան  20  միլիոն եուրօ գումար մը կը ստանայ   գաթալոնական ակումբէն:

 Վալենսիա՝ սեփական  դաշտին մէջ  2-1 արդիւնքով զիջեցաւ  Ռէալ  Սոսիետատի առջեւ:

Ընդհանուր Դասաւորում

1-     Պարչելոնա՝  9 մրցում   25 կէտ

2-     Աթլեթիքօ Մատրիտ՝  9 մրցում  24  կէտ

3-      Ռէալ Մատրիտ՝  9 մրցում 22 կէտ

 Իտալիոյ  Ֆութպոլի ախոյեանութեան 8-րդ   հանգրուանի մրցումներուն,  կեդրոնական  հանդիպումը կայացաւ Ուրբաթ երեկոյեան, ուր  մայրաքաղաքի խումբը՝ Ռոմա, սեփական  դաշտին մէջ  ընդունեց ցարդ անպարտելի  Նափոլին:  Ռոմա, երկու անպատասխան  գնդակ   զետեղեց  Նափոլիի  բերդին մէջ, արձանագրելով եղանակի ութերորդ անընդմէջ   յաղթանակը:  Ռոմայի կոլերուն   հերոսը  դարձաւ   պոսնիացի միջնապահ Միրալյէմ  Փիանիչը:  Հակառակ կրած պարտութեան,  Նափոլիի մարզիչ  Ռաֆայէլ Պենիթէզ յայտարարեց, թէ իր խումբը աւելի  տպաւորիչ խաղ ցուցադրած էր  դաշտին մէջ:  Ռոմա՝  ներկայիս  24 կէտով կը  գլխաւորէ ախոյեանութեան  ընդհանուր դասաւորումը:  8-րդ  հանգրունաի երկրորդ   հետաքրքրական հանդիպումը կայացաւ  Ֆիորենթինայի մէջ, ուր  մրցումին սկիզբը, տեղւոյն կազմը  հաշիւին մէջ  2-0   ետ մնալէ ետք,  ընդամէնը  16  վայրկեանի  ընթացքին  չորս  կոլ նշանակեց  Իտալիոյ անցեալ տարուան ախոյեան Եուվենթուսի  բերդին մէջ եւ  4-2 արդիւնքով   տպաւորիչ յաղթանակ մը արձանագրեց  անոր դէմ:   Ճուզեփէ  Ռոսի (3) եւ Խոակին նշանակեցին Ֆիորենթինայի կոլերը:  Գարլոս Թեւէզ եւ Փօլ Փոկպա՝ Եուվենթուսի:

 Ա.Սէ.  Միլան,  Սան Սիրօ մարզադաշտին մէջ,  1-0 արդիւնքով  համեստ  յաղթանակ մը  տարաւ  Ուտինեզիի դէմ: Հանդիպման միակ կոլը նշանակեց    միջնապահ Ուալթէր   Փիրսան: Մրցումին ընթացքին, Ա.Սէ.  Միլանի յարձակող Մարիօ Պալոթելի վնասուածք ստանալով հեռացաւ դաշտէն:  Երիտասարդ  յարձակողը  պիտի բացակայի  Երեքշաբթի օր, «Չեմփիընզ Լիկ»ի  գծով, Պարչելոնայի դէմ տեղի ունենալիք հանդիպումէն: Լացիօ՝  2-1 արդիւնքով  խոնարհեցաւ Աթալանթայի առջեւ:

Ընդհանուր Դասաւորում

1-     Ռոմա՝   8 մրց.  24 կէտ

2-     Նափոլի՝  8 մրց.  19 կէտ

3-     Եուվենթուս՝  7  մրց.  19 կէտ

 Գեմանիոյ Ֆութպոլի ախոյեանութեան 9-րդ  հանգրուանի մրցումներուն,   Պայերն Միւնիխ եւ  Պորուսիա   Տորթմունտ  արձանագրեցին   իրենց   հերթական յաղթանակը:   Պայեր  Միւնիխ՝  4-1 արդիւնքով   պարտութեան մատնեց Մայնցը:  Արիան Ռոպէն,  Թոմաս  Միւլըր (2),  Մարիօ  Մանչուկիչ նշանակեցին պաւարիական  խումբին կոլերը:  Տորթմունտ, սեփական  դաշտին մէջ 1-0 արդիւնքով պարտութեան  մատնեց  Հանովր  96-ը:  Մարքօ Ռոյս նշանակեց   մրցումին միակ կոլը:

 Յատկանշական   ճակատագիր ունեցաւ Հոֆենհայմ – Պայեր  Լեւերքուզեն   մրցումը: Հանդիպման 71-րդ  վայրկեանին, երբ հաշիւը տակաւին կը մնար՝ 1-1  հաւասարութիւն,  Պայերի յարձակող  Շթեֆան   Քիսլինքի գլխու  հարուածէն  ետք,  գնդակը  յայտնուեցաւ   Հոֆենհայմի  բերդին մէջ:  Իրաւարարը՝  իբրեւ կոլ ընդունեց  Քիսլինկի  հարուածը, որուն  շնորհիւ  Լեվերքուզեն  2-1 արդիւնքով պարտութեան մատնեց  Հոֆենհայմը:  Մրցումէն անմիջապէս  ետք,  տեսանիւթերու միջոցաւ ապացուցուեցաւ, թէ  գնդակը բերդին  դուրսի կողմէն  մուտք  գործած էր Հոֆենհայմի   բերդին մէջ:  Հոֆենհայմ   որոշեց բողոքել  մրցումի արդիւնքին դէմ:

 Շալքէ 04՝  3-2 արդիւնքով պարտութեան  մատնեց Այնթրախթ  Պրաունշուայքը:   Պորուսիա Մէօնշենկլատպախ՝  Պերլինի մէջ   1-0 արդիւնքով  պարտութիւն մը կրեց   Հերթա Պերլինէն:  Համպուրկ-  Շթութկարթ   ճակատումը  վերջ գտաւ 3-3  հաւասարութեամբ:

Ընդհանուր  Դասաւորում

1-     Պայերն Միւնիխ՝ 9 մրցում  23 կէտ

2-     Պորուսիա Տորթմունտ՝  9 մրցում  22  կէտ

3-      Պայեր  Լեվերքուզեն՝  9  մրցում  22 կէտ

 Անգլիոյ  ֆութպոլի ախոյեանութեան  8-րդ  հանգրուանի  մրցումներուն,  Լիվըրփուլ՝ 2-2 արդիւնքով հաւասարութիւն մը արձանագրեց Նիուքասլ Եունայթըտի դէմ:  «Կարմիրներ»ուն կոլերը նշանակեցին Սթիվըն Ճեռարտ (փենալթի) եւ  Տանիէլ Սթարիճ:   Ճեռարտի կոլը, անոր   100-րդն էր   Լիվըրփուլի շապիկով:   Ճեռարտ լրագրողներուն  յայտնեց, թէ  100-րդ  կոլը նշանակելու պահուն յիշած է, Շեֆիլտ Ուենզտէյի դէմ նշանակած առաջին կոլը՝ 1999-ին:   Մանչեսթըր  Եունայթըտ անգամ մը եւս  յուսախաբութեան մատնեց իր  համակիրները, երբ սեփական  դաշտին մէջ, 1-1 արդիւնքով հաւասարութիւն մը արձանագրեց  Սաութեմթընի դէմ:   Հանդիպման  26-րդ վայրկեանին,  Ռոպին  Վան  Փըսրի յառաջ  մղեց « Կարմիր Սատանաներ»ը: «Սուրբեր»ը այլ  հաշիւ ունէին իրենց մտքին մէջ:  Մրցումի 89րդ վայրկեանին,   Տէյան Լովրէնի միջոցաւ անոնք նշանակեցին  հաւասարութեան կոլը: Հանդիպումէն առաջ   բաւական  խանդավառ մթնոլորտ  կը տիրէր  Օլթ Թրաֆորտի ակումբին մէջ: Արդարեւ, 18-ամեայ  Ատնան Եանուզայ՝  հինգ տարուան   պայմանագրութիւն մը  կնքած էր  Մանչեսթըր Եունայթըտի  հետ:  Եանուզայ, շաբթական  60  հազար սթերլին գումար մը պիտի ստանար  Մանչեսթըր Եունայթըտէն: 

Չելսի եւ Արսենալ  արձանագրեցին տպաւորիչ  յաղթանակ: Արսենալ՝  4-1 արդիւնքով  պարտութեան մատնեց Նորուիչ Սիթին եւ պահպանեց ընդհանուր դասաւորման  առաջին դիրքը:  Ճէք Ուիլշայր, Մեսութ Օզիլ(2) եւ  Աարոն  Ռամզի  նշանակեցին  «Կանըրզ»ներուն  կոլերը:  Արսենալի մարզիչ  Արսէն Ուենկէր   լրագրողներուն յայտնեց, թէ  Ուիլշայրի նշանակած կոլը   գլուխ  գործոց մըն էր եւ  իր տեսած  երեք ամենագեղեցիկ կոլերէն մէկը:  Չելսի՝ 4-1 արդիւնքով պարտութեան մատնեց  Գարտիֆը:  Էտին Հազարտ (2),  Սամուէլ  Էթօ եւ  Օսքար նշանակեցին «Կապոյտ»ներուն կոլերը:  Մանչեսթըր Սիթի՝ Լոնտոնի  մէջ  3-1 արդիւնքով պարտութեան  մատնեց  Ուեսթ  Համ Եունայթըտը:  Սերժիօ Ակուերօ (2), եւ Տաւիտ Սիլվա դարձան Սիթիի կոլերուն  հեղինակը:  Թոթենհամ,  2-0 արդիւնքով պարտութեան մատնեց Ասթոն Վիլան եւ  16 կէտով  բարձրացաւ ընդհանուր դասաւորման չորրորդ դիրքը:  Էնտրուս  Թաունսենտ եւ  Ռոպերթօ Սոլտատօ նշանակեցին  լոնտոնեան կազմին  կոլերը:

Ընդհանուր Դասաւորում

1-     Արսենալ՝  8 մրցում   19 կէտ

2-     Չելսի՝ 8 մրցում  17  կէտ

3-     Լիվըրփուլ՝  8  մրցում՝  17  կէտ

Ֆրանսայի ախոյեանութեան 10-րդ հանգրուանի մրցումներուն,   Փարի Սէն Ժերմէն  4-0 արդիւնքով պարտութեան մատնեց   Պասթիան:  Զլաթան Իպրահիմովիչ եւ  Էտինսոն Գաւանի դարձան զոյգ կոլերու  հեղինակ:  Մայրաքաղաքի կազմը  24-ի  բարձրացուց  իր կէտերուն  քանակը եւ միանձեայ կը գլխաւորէ  ընդհանուր   դասաւորումը:   Մոնաքօ՝  2-2 արդիւնքով  հաւասարութեամբ  գոհացաւ  Սոշոյի դէմ:  Գարասօ՝  նշանակեց Մոնաքոյի զոյգ կոլերը:  Միշէլ Տէր Զաքարեանի  մարզած Նանթը  բարձրացաւ  ընդհանուր դասաւորման   4-րդ դիրքը:   Ան՝  1-0 արդիւնքով պարտութեան մատնեց  Աժասիօն:

Ընդհանուր Դասաւորում

1-     Փարի Սէն Ժերմէն՝  10  մրցում  24  կէտ

2-     Մոնաքօ՝   10  մրցում  22 կէտ

3-      Լիլ՝  10  մրցում   20 կէտ

Ռուսիոյ ախոյեանութեան 13-րդ  հանգրուանի մրցումներուն, Մոսկուայի Սպարտակը  1-0 արդիւնքով  պարտութեան մատնեց Անժին: Սպարտակի եւ մրցումին միակ կոլը նշանակեց Հայաստանի հաւաքականի  յարձակող Եուրա  Մովսիսեանը:  Ներկայիս, Սպարտակ՝  27 կէտով կը գրաւէ ընդհանուր դասաւորման երկրորդ  դիրքը: Սան  Փեթերսպուրկի Զենիթը 32 կէտով   կը մնայ առաջին դիրքի վրայ:

ին Քրասնոտար ,  սեփական դաշտին վրայ՝ 4-0 արդիւնքով պարտութեան մատնեց Թոմը:  Սոյն յաղթանակին  շնորհիւ, Քրասնոտար՝ 24-ի բարձրացուց իր կէտերուն քանակը:

Հայաստանի  Ֆութպոլի ախոյեանութեան 9-րդ  հանգրուանի մրցումներուն,  Փիւնիկ՝ 2-2 արդիւնքով հաւասարութիւն մը արձանագրեց Գանձասարի դէմ:  Երեւանի Արարատը 1-0 արդիւնքով  պարտութեան մատնեց  Միքան: Ուլիս՝  1-0 արդիւնքով յաղթեց  Բանանցին, իսկ Շիրակ՝ 5-2 արդիւնքով պարտութեան մատնեց Ալաշկերտը:  Ախոյեանութեան  ընդհանուր  դասաւորումը 17  կտով կը գլխաւորէ  Երեւանի Արարատը:  Երկրորդ  դիրքի վրայ  կու գայ Փիւնիկը՝  13 կէտ:

LEAVE A REPLY

Please enter your comment!
Please enter your name here