ՀԱՅԱՍՏԱՆ ՄԱՔՍԱՅԻՆ ՄԻՈՒԹԵԱՆ ԱՆԴԱՄԱԿՑՈՒԹԵԱՆ ԵՐԵՔ ՓԱՍՏԱԹՈՒՂԹ ՀԱՍՏԱՏԵՑ

0
114

Աշխատանքային այցելութեամբ Պելոռուս գտնուող Հայաստանի նախագահ Սերժ Սարգսեան Մինսքի մէջ մասնակցեցաւ  Եւրասիական տնտեսական բարձրագոյն խորհուրդի նեղ կազմով՝ Հայաստանի, Ղրղզստանի, Տաճիկստանի եւ Ուքրանիոյ նախագահներուն մասնակցութեամբ նիստին:
Նիստին ընթացքին, ի շարս այլ նիւթերու, քննարկումի ներկայացուեցաւ Մաքսային միութեան եւ Միասնական տնտեսական գօտիին Հայաստանի անդամակցութեան նախապատրաստութեան վերաբերեալ երեք փաստաթուղթ, որոնք հաստատուեցան: Այդ փաստաթուղթերը հետեւեալներն են. Հայաստանի՝ Մաքսային Միութեան եւ Միասնական տնտեսական գօտիին միանալու մասին որոշման նախագիծը, Եւրասիական ընկերակցութեան գործընթացին Հայաստանի մասնակցութեան մասին յայտարարութիւնը եւ Եւրասիական տնտեսական յանձնաժողովին ու Հայաստանի Հանրապետութեան միջեւ փոխգործակցութեան խորացման մասին յուշագիրը:
Համագործակցութեան մասնակից պետութիւններու ղեկավարները քննարկեցին նաեւ տարբեր ոլորտներ ներառող 14 հարցեր, որոնք կը վերաբերէին առեւտրատնտեսական կապերու ընդլայնման հեռանկարներուն, իրաւապահութեան ոլորտին մէջ համագործակցութեան, մշակութային-մարդասիրական կապերու հետագայ զարգացման:
Քննարկուած հարցերուն կարգին էին 2014-2016 թուականներուն ահաբեկչութեան եւ ծայրայեղականութեան այլ բռնի դրսեւորումներուն դէմ պայքարին մէջ համագործակցութեան, թմրեցուցիչի անօրինական շրջանառութեան դէմ պայքարին մէջ համագործակցութեան եւ 2014-2018ի թմրամոլութեան հակազդման վերաբերող ծրագիրները, որոնք հաստատուած են նիստի մասնակիցներուն կողմէ:
Նախագահները քննարկեցին եւ համաձայնութիւն տուին նաեւ 2014-2018 թուականներուն յանցագործութեան դէմ պայքարին մէջ միացեալ միջպետական ծրագիրին, տուեալ ժամանակաշրջանին մարդոց առեւտուրի դէմ պայքարին մէջ ԱՊՀ մասնակից պետութիւններու համագործակցութեան մասին ծրագիրին:
Նիստին ընթացքին հաստատուըցաւ  փտածութեան հակազդելու միջպետական խորհուրդի ձեւաւորման մասին համաձայնագիրը եւ արհեստագիտութեամբ կիրարկուող յանցաւորութեան դէմ պայքարին մէջ համագործակցութեան վերաբերող հայեցակարգը: Մարդասիրական համագործակցութեան ոլորտին մէջ քննարկուեցաւ  1941-1945 թուականներու Հայրենական պատերազմի յաղթանակի 70-ամեակը տօնելու նախապատրաստութեան վերաբերող հարցեր, որոշում տրուեցաւ  2014-ին ԱՊՀ-ի մէջ զբօսաշրջութեան տարի յայտարարել եւ «ԱՊՀ մշակութային մայրաքաղաքներ» միջպետական ծրագիրը իրականացնել։
Որոշուեցաւ ԱՊՀ-ի մասնակից պետութիւններու ղեկավարներու խորհուրդի յաջորդ նիստը գումարել Քիեւի մէջ: ԱՊՀի նախագահութիւնը փոխանցուեցաւ  Ուքրանիոյ։
Նախագահ Սերժ Սարգսեան Մինսքի մէջ՝ միւս նախագահներուն հետ,  մասնակցեցաւ  նաեւ Անկախութեան պալատի բակին մէջ կայացած պատուաւոր հիւրերու ծառուղիի հիմնադրութեան արարողութեան:

 

LEAVE A REPLY

Please enter your comment!
Please enter your name here