ՄԻՔԱԹԻ ԿԸ ՄԵՐԺԷ ՊԱՏԳԱՄՆԵՐ ՓՈԽԱՆՑԵԼՈՒ ԹԱՏԵՐԱՎԱՅՐԻ ՄԸ ՎԵՐԱԾԵԼ ԹՐԻՓՈԼԻՆ

0
118

 Թրիփոլի   դարձաւ   կատաղի   բախումներու  թատերաբեմ:  Ցերեկի ընթացքին ընդհատումով տեղի ունեցող  կրակոցները լուրջ   բախումներու  վերածուեցան երեկոյեան  ժամերուն եւ  շարունակուեցան  մինչեւ  լոյս առաւօտ:   Զինեալ ճակատումները   տարածուած են  քաղաքի  տարբեր շրջաններու մէջ:  Լիբանանեա բանակը յաճախ կը փորձէ  հակադարձել արձակուող  կրակոցներուն,  սակայն ըստ երեւոյթին, անոր  կարելիութիւնները կը մնան սահամանափակ    ներկայ  հանգրուանին:  Բանակի կարգ մը դիրքեր  զինեալներու յարձակումներուն  թիրախ  դարձան    գիշերային  բախումներուն  ընթացքին:

Երկրին եւ  յատկապէս  Թրիփոլիի զարգացումներուն հետեւաքով, հանրապետութեան նախագահը  յետս կոչեց դէպի Աւստրիա  նախատեսուած  եռօրեայ այցելութիւնը: Մուսթաքպալ Հոսանքի անդամ, երեսփոխան Սամիր Ճըսր դիտել տուաւ, թէ  իր մօտ այն տպաւորութիւնը ստեղծուած է, որ  գաղտնի միտում մը գոյութիւն  ունի,  քաղաքին ապահովական  ծրագիրը  ուշացնելու  պետութեան   քայլերուն մէջ:

Փաստօրէն, այսօրուան դրութեամբ, Սուրիոյ հակադիր եւ կողմնակից  ուժերուն  միջեւ  փոխհասկացութիւն ստեղծելու  քաղաքական  միջնորդութիւնները կը մնան ապարդիւն: Այս վտանգաւոր կացութեան մէջ,  կ’ըսուի, թէ   բանակը  նոր  ծրագիր մը  պիտի դնէ գործադրութեան, նոյնիսկ եթէ ճակատումի մէջ մտնէ  զինեալներու հետ:

Հանրապետութեան նախագահը ապահովական կառոյցներու ներկայացուցիչներու հետ նիստ մը գումարեց  երէկ կէսօրին: Նիստի   աւարտին որոշուեցաւ քրէական  պատասխանատուութեան ենթարկել  բոլոր անոնք, որոնք զէնք կը  կրեն Թրիփոլիի  մէջ:  Ապահովական  կառոյցներու  տուեալներով, արդէն իսկ կարելի եղած է  երեք  հարիւր անձերու դէմ  հրապարակել ձերբակալութեան հրամանագիր: 

Հրաժարեալ   վարչապետ  Նեժիպ Միքաթի  զգաստութեան հրաւիրեց  հակամարտութեան կողմերը,  շեշտելով թէ   Թրիփոլի պիտի  չըլլայ  շրջանային   ուժերու  նամակաբերը, ոչ ալ՝  պատգամներ փոխանցելու թատերաբեմը:

Երէկուան բախումներէն ետք,  զոհերուն թիւը բարձրացաւ  տասմէկի, վիրաւորները՝   աւըլ քան  երեսուն  եօթ:

Նորանշանակ  վարչապետ Թամամ Սալամ  յայտնեց, թէ  մնայուն  հեռախօսազրոյցներ կ’ունենայ   հրաժարեալ վարչապետ Նեժիպ Միքաթիի,  ներքին գործոց նախարար   Մարուան Շարպէլի, բանակի   ընդհանուր  հրամանատար զօրավար  Ժան Քահուաճիի,  Թրիփոլիի եւ հիւսիսային Լիբանանի միւֆթի, շէյխ Մելիք Շաարի հետ՝ Թրիփոլիի ապահովական  զարգացումներուն  հետեւելու  նպատակով:  Սալամ  պահանջեց անմիջապէս  դադրեցնել արիւնահոսութիւնը, զգուշացնելով որ  ճակատումը քանդում  եւ աւեր  պիտի տարածէ քաղաքին մէջ:

LEAVE A REPLY

Please enter your comment!
Please enter your name here