ՆԱԽԱԳԱՀ ՍԸԼԷՅՄԱՆ ԿԸ ՀԵՏԵՒԻ ԹՐԻՓՈԼԻԻ ԱՊԱՀՈՎԱԿԱՆ ԾՐԱԳԻՐԻՆ

0
124

Հանրապետութեան  նախագահ  Միշէլ Սըլէյման  իր գոհունակութիւնը  յայտնեց  Թրիփոլիի ապահովական  ծրագիրին  ընթացքէն եւ անոր գործադրութեան աջակցելու կոչ  մը ուղղեց  քաղաքական բոլոր կողմերուն: Սըլէյման ընդունեց  նախկին երեսփոխան Իսամ Ապու Ժամրան,  երեսփոխան Մուհամմէտ Քապպանին եւ այլ անձնաւորութիւններ:

Նախագահ Սըլէյման  ընդգծեց, թէ բանակը  օրինազանցութիւններ պիտի   չհանդուրժէ Թրիփոլիի  մէջ  եւ  հարուածէ անդորրը խանգարող   կողմերուն: Կառավարութեան  թղթածրարին մասին խօսելով, նախագահ Սըլէյման յայտնեց, թէ արգելք մը   չի տեսներ 9-9-6 տարազով  կազմի մը առաջարկին:  Սըլէյման    շեշտեց, թէ   երկիրը  չի կրնար մնալ առանց  կառավարութեան:

Վարչապետի պաշտօնակատար Նեժիպ Միքաթի   հեռաձայնային   խօսակցութիւներ ունեցաւ բանակի  ընդհանուր  հրամանատար  զօրավար  Ժան Քահուաճիի հետ  եւ  քննարկեց  Թրիփոլիի ապահովական իրավիճակը: Նշենք, թէ այսօրուան  դրութեամբ  բանակը շրջափակած է  Պապ Թըպենէ եւ Ժապալ Մըհսէն   շրջանները, արգիլելու՝ զէնքի եւ զինեալներու  մուտքը: Յառաջիկայ  օրերուն    բանակը  պիտի  փորձէ  աստիճանաբար  տեղաւորուիլ վերոյիշեալ շրջաններէն ներս:

Ներքին գործոց նախարար Մարուան Շարպէլ  ըսաւ, թէ    բանակի  միաւորներ կը շարունակեն տարածուիլ Թրիփոլիի արուարձաններուն մէջ եւ ցարդ արգելքներ  չկան  անոր քայլերուն առջեւ:

Թրիփոլիի ապահովական  ծրագիրին գործադրութեան կողքին, նոր   բանավէճ  մը օրակարգի նիւթ սկսած է դառնալ  քաղաքական  բեմի  վրայ՝ «Ժընեւ -2» խորհրդաժողովին Լիբանանի մասնակցութեան հարցը:  Կառավարութիւնը եւ Մարտ 8-ի ուժերը  համաձայն են   Լիբանանի մասնակցութեան, Մարտ  14-ի ուժերը՝ ոչ:  Արտաքին գործոց նախարարի պաշտօնակատար  Ատնան Մանսուր  յայտարարեց, թէ Լիբանան  տակաւին  կը սպասէ  «Ժընեւ -2» խորհրդաժողովին մասնակցելու հրաւէրին:

LEAVE A REPLY

Please enter your comment!
Please enter your name here