ԻՊՐԱՀԻՄԻ ՄԱԿ-Ի ԱՆՈՒՆՈՎ ՇՆՈՐՀԱԿԱԼՈՒԹԻՒՆ ՅԱՅՏՆԵՑ ԼԻԲԱՆԱՆԻՆ

0
126

Երկար  սպասումներէ եւ  նախատեսութիւններէ   ետք, Սուրիոյ  հարցով ՄԱԿ-ի եւ Արաբական Լիկայի    պատուիրակ  Լախտար Իպրահիմի երէկ  կէսօրին, Մասնաայի  ճանապարհով   ժամանեց Պէյրութ եւ անմիջապէս  բարձրացաւ Պաապտայի պալատ, ուր հանդիպում մը ունեցաւ  հանրապետութեան   նախագահ  Միշէլ Սըլէյմանի հետ:  Հանդիպումէն  ետք,  Իպրահիմի   յայտնեց, թէ  Լիբանան ծանր  բեռ մը կը  կրէ Սուրիոյ հակամարտութեան հետեւանքով:  Ան  ՄԱԿ-ի անունով  շնորհակալութիւն   յայտնեց  Լիբանանին՝ Սուրիոյ հակամարտութեան հարցով   ցուցաբերած  մարդասիրական կեցուածքին եւ ծառայութիւններուն համար: Արաբ  դիւանագէտը   նշեց, թէ  տակաւին  վաղաժամ է խօսիլ  «Ժընեւ -2» խորհրդաժողովի հրաւէրներուն մասին, որովհետեւ թուական կը մնայ քննարկումի տակ:  Իպրահիմի դարձեալ ընդգծեց, թէ  ռազմական  լուծումը բացառուած է Սուրիոյ  մէջ,  իսկ պահանջուածը  քաղաքական  լուծում մըն է:  Իպրահիմի  նաեւ  փոխանցեց  առեւանգուած երկու հոգեւորականները ազատ արձակելու  վերաբերեալ տեղի ունեցող բանակցութիւններուն    նորագոյն  զարգացումները:   Իպրահիմի, Պաապտայէն անմիջապէս ուղղուեցաւ Այն Էլ  Թինէ  եւ  հանդիպում մը ունեցաւ  խորհրդարանի նախագահ  Նեպիհ Պըրիի  հետ:  Հանդիպումէն ետք,  ան ըսաւ, թէ  Պըրրիի եւ   հանրապետութեան նախագահին  իրազեկած է   տարբեր երկիրներու մէջ  ունեցած  զրոյցներուն  մթնոլորտը եւ  լսած  է անոնց  տեսակէտը՝  Սուրիոյ հակամարտութեան առնչութեամբ:  Իր կարգին, Պըրրի անհրաժեշտութիւն նկատած է « Ժընեւ -2»ին  Լիբանանի մասնակցութիւնը եւ խորհրդաժողովը  յաջողութեամբ պսակելու անհրաժեշտութիւնը:

Իպրահիմիի  շրջագայութեան երրորդ  կայարանը եղաւ  վարչապետարանը, ուր    վարչապետի  պաշտօնակատար  Նեժիպ Միքաթիի  հետ քնննրկեց  սուրիացի  ժողովուրդին մարդասիրական  օժանդակութիւններ  հայթայթելու  կարելիութիւնները:  Հանդիպումէն ետք,  Իպրահիմի յայտարարեց, թէ լիբանանեան իշխանութիւնները իրենց զօրակցութիւնը յայտնած են  «Ժընեւ -2»  խորհրդաժողովին, ինչպէս նաեւ՝ մասնակցելու  ցանկութիւն:  Ան նշեց, թէ  Սուրիոյ կառավարութիւնը եւ ներքին  ընդդիմութիւնը նոյնպէս  հաւանութիւն  տուած  են  առանց  որեւէ նախապայմանի  մասնակցելու   խորհրդաժողովին:  Իպրահիմի  ընդգծեց, թէ   արաբական բոլոր պետութիւնները կը  նախազգան  Սուրիոյ  հակամարտութեան  ետին սպառնացող վտանգը:  Այս  առիթով այն յայտնեց, թէ  ծայրայեղական կազմակերպութիւնները   չեն շահագրգռուած  խաղաղութեամբ եւ  հաղորդակցութիւն չկայ անոնց հետ:  Իպրահիմի   նշեց, թէ   պիտի   չայցելէ  Սէուտական Արաբիա:

Յատկանշական էր, որ նախքան  Իպրահիմիի ժամանումը, արտաքին  գործոց  նախարարի պաշտօնակատար  Ատնան Մանսուր  յայտարարեց,թէ    հրաւէր ստանալու պարագային Լիբանան պիտի մասնակցի «Ժընեւ -2» խորհրդաժողովին:

 Այլ գետնի  վրայ,  նախագահ  Սըլէյման   ընդունեց  Թրիփոլիի երեսփոխանները ներկայացնող  պատուիրակութիւն մը նախարարներ  Մուհամմէտ Սաֆատիի,  Ահմէտ Քարամէի,  երեսփոխաններ  Պատր Ուանուսի,  Ռոպեր Ֆատելի,  Սամեր Սաատէի   մասնակցութեամբ: Սոյն  պատուիրակութիւնը նաեւ այցելեց  վարչապետի պաշտօնակատար Նեժիպ Միքաթիին:   Նախագահը նաեւ   ընդունեց  նախկին  երեսփոխան  Հասան Եաաքուպը,  ընդհանուր անվտանգութեան  ընդհանուր  տնօրէն, հազարապետ  Ապպաս Իպրահիմը,  Սպանիոյ մօտ Լիբանանի  դեսպան Շարպէլ Աունը  եւ այլ անձնաւորութիւններ:

Վարչապետ  Նեժիպ Միքաթի  իր այցելուներուն հետ քննարկեց Թրիփոլիի ապահովական  իրավիճակը եւ  յայտնեց, թէ  պիտի  մերժէ  օրէնքէն դուրս որեւէ  ձայն, իսկ Թրիփոլիի պայթումներբուն  յանցագործները պիտի կրեն իրենց արդար պատիժը:

LEAVE A REPLY

Please enter your comment!
Please enter your name here