ԼԱՒՐՈՎ՝ ՍՈՒՐԻՈՅ ԸՆԴԴԻՄՈՒԹԵԱՆ ԿԵՑՈՒԱԾՔՆԵՐԸ ԱՐՄԱՏԱԿԱՆԱՊԷՍ ԿԸ ՏԱՐԲԵՐԻՆ ԺԸՆԵՒԻ ՅԱՅՏԱՐԱՐՈՒԹԵՆԷՆ

0
113

Ռուսիոյ  արտաքին գործոց նախարար  Սերկէյ Լաւրով  դիտել տուաւ, թէ Սուրիոյ ընդդիմութեան  յայտարարութիւնները կը  հակասեն  Ժընեւի առաջին խորհրդաժողովի   սկզբունքներուն:  Լաւրով՝ ամբողջական մեկուսացումէ զգուշացուց  ընդդիմութիւնը:

Սուրիոյ  վարչապետ Ուայէլ  Հալքի   շեշտեց, թէ ահաբեկչական գործողութիւններուն  աւարտը ժամանակի  հարց է: Վարչապետը   յայտնեց, թէ  պետութիւնը առանց նախապայմաններու  պիտի  մասնակցի  «Ժընեւ-2» խորհրդաժողովին:  

Սուրիոյ հետ  սահմանակից Հաթայ   նահանգի  Նրլըջայի  շրջանին մէջ թուրք սահմանապահները  բացայայտեցին  մաքսանենգութեան  ճանապարհով անծանօթ քիմիական նիւթեր Սուրիա  փոխադրող  երեք  ինքնաշարժ: Ինքնաշարժներուն  վարորդները մերժեցին ենթարկուիլ սահմանապահներուն ցուցմունքներուն:  Սահմանապահները ստիպուած   կրակ  բացին  ինքնաշարժներուն  ուղղութեամբ եւ  ձերբակալեցին անոնց  վարորդները:  Ինքնաշարժներուն մէջէն   յայտնաբերուեցան  քսան  պարկ  ծծումբ եւ  անծանօթ  քիմիական նիւթեր պարունակող  ութ զմռսուած տակառներ:  Մէկ թոնէ աւելի կշռող բռնագրաւուած  նիւթերը  ուղարկուեցան  քիմիական տարրալուծարան: Վերոյիշեալ  քիմիական  նիւթերը պիտի  յանձնուէին   ընդդիմութեան  զինեալներուն:

Դիւանագիտական  շրջանակներու  համաձայն, Սուրիոյ  հակամարտութիւնը  կարգաւորելու նպատակով  նախատեսուած  «Ժընեւ -2» խորհրդաժողովը   կրնայ ուշանալ   մինչեւ  յառաջիկայ  տարուան Յունուարի կէսը:

Միւս կողմէ,  Սուրիոյ  հարցով  ՄԱԿ-ի եւ Արաբական Լիկայի  պատուիրակ Լախտար  Իպրահիմիի   գրասենեակին  ընդհանուր  տնօրէնը  յայտարարեց, թէ  Իպրահիմի կը  հետապնդէ առեւանգուած   երկու կղերներուն ազատ արձակումը:

 Ապահովական  գետնի վրայ, Հալէպի Նոր Գիւղ   շրջանին վրայ արձակուած  հրթիռներու  հետեւանքով  վիրաւորուեցան քանի մը հայեր:  Բարեբախտաբար  վտանգ  չսպառնար անոնց կեանքին:  Հրթիռներ ինկան նաեւ Ազիզիէի լատինաց  եկեղեցւոյ վրայ:  Դամասկոսի մօտ  Վատիկանի  դեսպանատունը հրթիռարձակումի  ենթարկուեցաւ, պատճառելով նիւթական  վնասներ:

LEAVE A REPLY

Please enter your comment!
Please enter your name here