ՆԱԽԱԳԱՀ ՍԸԼԷՅՄԱՆ ՔՆՆԱՐԿԵՑ ԱՊԱՀՈՎԱԿԱՆ, ԱՌՈՂՋԱՊԱՀԱԿԱՆ ՀԱՐՑԵՐ

0
105

Հանրապետութեան նախագահ Միշէլ Սըլէյման  Պաապտայի պալատին մէջ ընդունեց առողջապահութեան   նախարարի պաշտօնակատար Ալի Հասան Խալիլը եւ անոր հետ քննարկեց  սուրիացի  գաղթականներուն առողջապահական օժանդակութիւն հայթայթելու  միջոցները:   Նախագահ Սըլէյման նաեւ ընդունեց նախկին նախարարներ Քարամ Քարամը եւ  Մուհամմէտ Շաթհը, ինչպէս նաեւ  հրաւէր մը ստացաւ մասնակցելու նախագահ Ռընէ Մուաուատի   մահուան տարելիցն:

Արաբական Ծոցի  օրաթերթեր կը գրեն, թէ  Լիբանան- Սէուտական Արաբիա  գերաստիճանի մը  նախապատրաստութիւնները  տեղի կ’ունենան թեթեւ կրակի վրայ:  Գերաստիճանի   թուականը ցարդ կը մնայ  անորոշ:

Հրաժարեալ  վարչապետ  Նեժիպ Միքաթի   մաղթեց, որ խորհրդարանի նախագահ Նեպիհ Պըրրի   նիստի կը հրաւիրէ  խորհրդարանը՝ յստակացնելու  «գործակատար» եզրին սահմանումը:  Միքաթի   ընդգծեց, թէ  իր  իրաւասութիւնները  սահմանափակ ըլլալով,  կը մերժէ կրել այլոց  սխալներուն կամ արարքներուն պատասխանատուութիւնը: Միքաթի  հանդիպում մը ունեցաւ  Լիբանանի Կեդրոնական Դրամատան  ընդհանուր  Կառավարիչ Ռիատ Սալամէի հետ եւ  ընդունեց   առեւտուրի եւ  տնտեսութեան նախարարի գործակատար Նիքոլա Նահասը:  Սալամէի հետ հանդիպումէն  ետք,  Միքաթի յայտարարեց,թէ  Կեդրոնական Դրամատան   ընդհանուր կառավարիչը   զինք իրազեկ դարձուցած էր   Լիբանանի  տնտեսական իրավիճակին: Միքաթի  ընդգծեց, թէ տնտեսական կայունութիւնը պիտի  նպաստէ  յաղթահարելու շրջանային զարգացումներուն  հետեաւանքով   երկրին դիմագրաւած  դժուարութիւնները:  Միքաթի  ընդունեց լիբանանեան բանակի պատուիրակութիւն մը:

Նորանշանակ  վարչապետ Թամամ Սալամ ընդունեց Ժողովրդավարական  Վերանորոգում շարժումը ներկայացնող պատուիրակութիւն մը:

Ներքին գործոց  նախարարի  պաշտօնակատար  Մարուան Շարպէլ  դիտել տուաւ, թէ   Թրիփոլիի ապահութեան ծրագիրէն  կարեւոր  բաժիններ  գործադրուած  են, առ այսօր: Նախարարը    մտահոգութիւն յայտնեց Սուրիոյ  հակամարտութիւնը Լիբանան փոխադրելու  ոմանց  փորձերուն,  ընդգծելով որ  շիիները եւ  սիւննիները կը մերժեն երկրին մէջ քաղաքացիական պատերազմ  ստեղծելու փորձերը:  Շարպէլ   զգուշացուց, որ  նախագահութեան աթոռին վրայ պարապութիւնը  վտանգաւոր կացութիւն մը  պիտի ստեղծէ երկրին մէջ:  Շարպէլ բուռն  քննադատութեան  ենթարկեց  Մարտ 8-ի եւ  14-ի ուժերը,   ընդգծելով, որ    անհնար է  պետութիւն  կառուցել Մարտ 8-ի եւ 14-ի  ուժերուն  միջոցաւ:

LEAVE A REPLY

Please enter your comment!
Please enter your name here