ՄՈՆՏԻԱԼ 2014 -« ՓԼԷՅ ՕՖՍ» – ՖՐԱՆՍԱ ԿՐՆԱՅ ԴՈՒՐՍ ՄՆԱԼ ԵԶՐԱՓԱԿԻՉՆԵՐԷՆ

0
140

Ուրբաթ   երեկոյեան  տեղի ունեցան Մոնտիալ  2014-ի  եզրափակիչներուն մասնակցելու   լրացուցիչ  հանդիպումներու  երթի  մրցումները:   Լիզպոնի մէջ, Փորթուգալի հաւաքականը, շնորհիւ  Քրիսթիանօ Ռոնալտոյի 82-րդ  վայրկեանին նշանակած կոլին, 1-0  արդիւնքով պարտութեան մատնեց  Շուէտը:  Ի դէպ, Ռոնալտօ,  ազգային խումբին շապիկով կը նշանակէր  իր  44-րդ  կոլը:

Քիեւի մէջ,  Ուքրանիոյ  հաւաքականը  2-0 արդիւնքով պարտութեան մատնեց  Ֆրանսան:  Երկու  կազմերը   տասը  մարզիկներով  աւարտեցին մրցումը:  Ռոման  Զոզուլիա եւ Անտրէ  Եարմոլենքօ  նշանակեցին Ուքրանիոյ  կոլերը:  Մարզիչ Տիտիյէ  Տեշանի  հաւաքականը  կրնայ  հասնիլ Մոնտիալ  2014-ի եզրափակիչներուն:  Ֆրանսացիները  դժուար , թէ դարձի  հանդիպումին  երեք կոլ նշանակեն Ուքրանիոյ  բերդին մէջ:

Յունաստան ՝ 3-1 արդիւնքով տպաւորիչ յաղթանակ մը արձանագրեց  Ռումանիոյ դէմ:  Քոնսթանթինոս Միթրողլու (2) եւ  Տիմիթրիս  Սալփինկիտիս նշանակեցին յոյներուն կոլերը:

Խրուաթիոյ  հաւաքականը  յաջողեցաւ՝  0-0  հաւասարութեամբ հեռանալ   Իսլանտայի  դէմ ճակատումէն:

Դարձեալ,  Մոնտիալ 2014-ի   լրացուցիչ  մրցումներու  գծով,  Ուրուկուէյի հաւաքականը  մասամբ ապահովեց  եզրափակիչներուն մասնակցելու  ուղեգիրը՝ Ամմանի մէջ, Յորդանանի հաւաքականին դէմ արձանագրած  5-0 յաղթանակով: Դարձի  հանդիպումը  Մոնթեվիտէոյի մէջ պիտի   ըլլայ  ձեւականութիւն:   Իր կարգին, Մեքսիքօ՝  5-1 արդիւնքով  պարտութեան  մատնեց  Նիւ Զելանտան:

Նշենք, թէ դարձի  բոլոր  հանդիպումները  տեղի պիտի  ունենան Երեքշաբթի երեկոյեան:

LEAVE A REPLY

Please enter your comment!
Please enter your name here