ՊԱԱՊՏԱՅԻ ՅԱՅՏԱՐԱՐՈՒԹԻՒՆԸ ՅԱՐԳԵԼՈՒ ԿՈՉ ՔԱՂԱՔԱԿԱՆ ԿՈՂՄԵՐՈՒՆ

0
135

Պէյրութի  Ֆենիսիա  պանդոկին  մէջ, հանրապետութեան նախագահ Միշէլ Սըլէյմանի հովանաւորութեամբ,  քաղաքական,   հասարակական, տնտեսական  անձնաւորութիւններու մասնակցութեամբ տեղի ունեցաւ«  Անկախութիւն՝ Ուխտէն մինչեւ  Պաապտայի Յայտարարութիւնը»  խորհրդաժողով մը, որուն  խօսք առին  մեծ  թիւով անձնաւորութիւններ: Այս առիթով բոլոր խօսք առնողները դիտել տուին, թէ  Պաապտայի  Յայտարարութիւնը երկրին  ներքին ապահովական կայութիւնը  պահպանելու միջոց մըն է:  Հանրապետութեան նախագահ Միշէլ Սըլէյման իր խօսքին մէջ  շեշտեց  յարգել Պաապտայի Յայտարարութիւնը, նշելով որ անիկա  կը  վայելէ  շրջանային ուժերու եւ  միջազգային ընտանիքին զօրակցութիւնը:  Լիբանանի մօտ Ռուսիոյ դեսպան Ալեքսանտր Զասփիքին   իր զօրակցութիւնը յայտնեց  Պաապտայի  Յայտարարութեան,  դիտել տալով, որ  «Ժընեւ-2» խորհրդաժողովին Լիբանանի մասնակցութիւնը դրական ազդեցութիւն պիտի ունենայ Ներլիբանանեան  բեմին վրայ:

Հանրապետութեան նախագահ Միշէլ Սըլէյման յառաջիկայ  ժամերուն պիտի  մեկնի  Քուէյթ,  մասնակցելու արաբափրիկեան  տնտեսական համագործակցութեան խորհրդաժողովին:  Այցելութիւնը առիթ մը պիտի  ըլլայ, Քուէյթի   իշխանութիւններուն հետ քննարկելու,  Յունուարին  Քուէյթի մէջ՝  Լիբանանի  տնտեսութեան  օժանդակելու նպատակով   նախատեսուած  միջազգային  խորհրդաժողովին կազմակերպչական աշխատանքներու ընթացքը:  Միջազգային Դրամատան կողմէ  պատրաստուած տեղեկագիր  մը  կը  հաստատէ, թէ  սուրիացի   գաղթականներուն հոսքէն  ետք, Լիբանանի կրած վնասները կը գնահատուին եօթ միլիառ տոլար:  Համաշխարհային Դրամատան  միջինարեւելեան հարցերու  վարչական տնօրէն Ֆարիտ  Պելհաժ   յայտնեց, թէ  300-400 միլիոն  տոլար արժողութեամբ  օժանդակութեան սնտուկ մը  պիտի ստեղծուի  Լիբանանի համար:

Հրաժարեալ  վարչապետ  Նեժիպ Միքաթի  նշեց, թէ  լիբանանեան բանակը  կը  տարածուի  Թրիփոլիի արուրձաններուն մէջ, սակայն ապահովութիւնը միայն   բանակին տարածումով չամրապնդուիր, այլ ՝ երկխօսութեամբ եւ պետութեան շուրջ  համախմբուելով: Կ’արժէ  նշել,որ   ներքին  գործոց նախարարի պաշտօնակատար  Մարուան Շարպէլ, երէկ առաւօտեան Թրիփոլիի սերային մէջ  ընդլայնուած   ժողով մը  գլխաւորելէ  ետք,   աւետեց  քաղաքին ապահովութեան ծրագիրին գործադրութիւնը:

Քաղաքական բեմի վրայ  ծայր առած բանավէճերը, ցեխարձակումները  անհնար կը դարձնեն  նոր կառավարութեան կազմութիւնը:

LEAVE A REPLY

Please enter your comment!
Please enter your name here