Խօսք Առնելով Արաբական Դրամատուներու Միութեան 40-ամեակի Հանդիսութեան՝. Սարգիս Եողուրթճեան Անդրադարձաւ Միջազգային Դրամատնային Մարզերու Խրթին Հարցերուն

0
117

Հովանաւորութեամբ հանրապետութեան նախագահ զօր. Միշել Սլէյմանի եւ կազմակերպութեամբ Արաբական  Դրամատուներու միութեան, հինգշաբթի, 14 նոյեմբեր 2013-ի առաւօտեան ժամը 10:00-ին, Պէյրութի Այն Մրէյսէ շրջանի «Ֆենիսիա» պանդոկին մէջ բացումը կատարուեցաւ Արաբական դրամատուներու միութեան  40-ամեակի հանդիսութեան, ներկայութեամբ՝ պետական եւ դիւանագիտական ներկայացուցիչներու եւ դրամատնային մարզի պատասխանատուներու ու բարեկամներու:

Արաբական դրամատնային տարեկան համագումարին զուգահեռ կայացած միութեան 40-ամեակի երկօրեայ հանդիսութեանց ընթացքին արտասանուած խօսքերու ծիրին մէջ ելոյթ ունեցաւ նաեւ Միացեալ Նահանգներու Կեդրոնական դրամատան կառավարիչներու խորհուրդի անդամ, Դաշնակցային պահեստի համակարգի տնօրէն խորհուրդի փոխնախագահ, Միջազգային դրամական ֆոնտի խորհրդատու Սարգիս Եողուրթճեան:

Հայազգի փորձագէտը իր խօսքին մէջ անդրադարձաւ դրամատուներու, յատկապէս միջազգային ու ամերիկեան դրամատուներուն մէջ տիրող կարգ մը բացասական երեւոյթներուն, ինչպէս՝ (դրամատնային) տագնապներու լուծման եւ բարեփոխման նախանձախնդրութեամբ մշակուած օրինագիծերու բազմաթիւ էջերու ծաւալն ու անոնց տողատակի հեռանկարները: Տեսերիզի օգնութեամբ արտասանած իր խօսքին մէջ Եողուրթճեան ընդգծեց օրէնքներու բարեփոխման անհրաժեշտութիւնն ու անոնց բովանդակութեան պարզացումը՝ հասկնալի դարձնելու համար զանոնք նոյնիսկ կեդրոնական դրամատան վերահսկիչներուն համար: Ան նաեւ անդրադարձաւ դրամատիրութեան առնչուող հարցերու՝ ընդգծելով, որ չկայ դրամատիրութիւն առանց սխալի կամ ձախողութեան, այնպէս ինչպէս՝ չկայ կրօն առանց մեղքի: Իր կարգին, Ամերիկեան դաշնակցային պահեստի համակարգի տնօրէն խորհուրդի նախագահ Պեն Պըրնանքի, համացանցային հեռակայ դրութեամբ սոյն հանդիսութեան փոխանցած իր խօսքին մէջ մեծ դրուատիքով նշեց Սարգիս Եողուրթճեանի դերակատարութիւնը:

 

 

LEAVE A REPLY

Please enter your comment!
Please enter your name here