ՄԱՐԿԱՐԻԹԱ ԳԱՍՊԱՐԵԱՆ՝ ՄԻՆՍՔԻ ՄՐՑԱՇԱՐՔԻ ՅԱՂԹՈՂ

0
123

Ռուսիան  ներկայացնող Մարկարիթա  Գասպարեան դարձաւ  Մինսքի մէջ  կայացող  թենիսի ITF  մրցաշարքի  յաղթող:  19-ամեայ  Մարկարիթա, աւարտական  մրցումին  6-4, 6-4 արդիւնքով  պարտութեան մատնեց  ուքրանուհի Անասթասիա Վասիլեւային:  Իր  արձանագրած  յաղթանակին  առիթով,  Մարկարիթա ստացաւ 25  հազար տոլար արժողութեամբ վճառագիր  մը:

ՄԱՅԷՄԻԻ  ՀԵՐԹԱԿԱՆ  ՅԱՂԹԱՆԱԿԸ

 Էն.Պի.Էյ-ի ախոյեանութեան  մրցումներուն գծով,   Մայէմի Հիթ արձանագրեց  իր հերթական  յաղթանակը, երբ  97-81 արդիւնքով պարտութեան մատնեց Չարլոթ Հորնէցը:   Հիթի յարձակող՝  Լըպրոն Ճէյմզ  նշանակեց   25 կէտ:

ԽԵՏԻՐԱ ԿՐՆԱՅ ԲԱՑԱԿԱՅԻԼ  ՄՈՆՏԻԱԼ  2014-ԷՆ

 Իտալիա- Գերմանիա  ֆութպոլի  միջազգային  բարեկամական  մրցումին ընթացքին ծունկի լուրջ վնասուածք ստացած  Գերմանիոյ եւ Ռէալ Մատրիտի  միջնապահ  Սամի  Խետիրա  ենթարկուեցաւ  վիրաբուժական  գործողութեան:  26-ամեայ միջնապահը առնուազն   երեք շաբաթ պիտի մնայ  բժշկական հսկողութեան տակ: Մասնագէտներու կարծիքով,  Խետիրա առնուազն   վեցէն ութ ամսուան ժամանակամիջոցի կը կարօտի ամբողջութեամբ ապաքինելու համար:  Հետեւաբար,  Մոնտիալ  2014-ի եզրափակիչներուն մասնակցելու  անոր յոյսերը  հասան նուազագոյնին:

Խետիրայի  վնասուածքը  սկսաւ լրջօրէն մտահոգել Գերմանիոյ  ազգային խումբի մարզիչ  Եոահիմ  Լիովը:  Վերջինս որոշեց, Անգլիոյ հաւաքականին դէմ Երեքշաբթի երեկոյեան  տեղի ունենալիք  ֆութպոլի միջազգային  բարեկամական  հանդիպումին,  հաւաքականի կազմէն դուրս ձգել  Մեսութ Օզիլը,  Ֆիլիփ Լամը եւ Մանուէլ Նոյէրը:  Լիով յայտնեց, թէ նորեկներու հնարաւորութիւն պիտի տայ՝ Անգլիոյ դէմ  հանդիպումին..:

ՊՈԼԹ ԵՒ  ՖՐԷՅԶԸՐ ՏԱՐՈՒԱՆ  ԼԱՒԱԳՈՅՆ ԱԹԼԵԹՆԵՐԸ

Ճամայիքացի  արագավազորդներ  Ուսէյն Պոլթ  եւ  Շելի Էն Ֆրէյզր  Փրայս    ճանչցուեցան  տարուան լաւագոյն աթլեթները: Սոյն   հաստատումը կատարեց Աթլեթիզմի Միջազգային Ֆետերասիոնը:

26-ամեայ Ֆրէյզր Փրայս առաջին անգամ ըլլալով կը ստանայ   սոյն մրցանակը, իսկ վեցեակի ողիմպիական ախոյեան, 110 եւ 200 մեթր վազքի աշխարհի  մրցանակակիր  Պոլթը 5-րդ անգամ ըլլալով կը ճանչցուէր տարուան աթլեթ:

Յիշեցնենք,  որ ամրան ընթացքին  Մոսկուայի մէջ կայացող աթլեթիզմի աշխարհի ախոյեանութեան մրցումներուն, 27-ամեայ Պոլթ եւ  Ֆրէյզըր  նուաճեցին  երեք-ական ոսկէ մետալ(100մ.200մ. եւ4x 100մ ):

ՓՂՈՍԿՐԵԱՅ ԱՓՈՒՆՔ  ԵՒ ՆԻՃԵՐԻԱ  ՀԱՍԱՆ ՄՈՆՏԻԱԼ  2014-Ի ԵԶՐԱՓԱԿԻՉՆԵՐՈՒՆ

 Փղոսկրեայ Ափունքի  հաւաքականը  ձեռք բերաւ Մոնտիալ  2014-ի եզրափակիչներուն մասնակցելու  ուղեգիր՝  պայքարէն դուրս  ձգելով Սենեկալը:  Երթուդարձի  մրցումներուն, Փղոսկրեայ Ափունք՝  3-1 յաղթանակ եւ  1-1 արդիւնքով  հաւասարութիւն մը ապահովեց Սենեկալի դէմ:

Իր կարգին,  Նիճերիոյ  հաւաքականը՝ 1994,1998,2002 եւ 2010-էն ետք,   հինգերորդ անգամ ըլլալով   հասաւ  Մոնտիալ  2014-ի եզրափակիչներուն: Նիճերիացիները՝  երթուդարձի  մրցումներուն,  2-0, 2-1 արդիւնքով պարտութեան մատնեցին Եթովպիան:

ՓԻՐԼՕ  ՉԻ ԳԻՏԵՐ ՈՒ՞Ր  ՇԱՐՈՒՆԱԿԵԼ…

 Իտալիոյ ազգային խումբի եւ Եուվենթուսի  միջնապահ Անտրէա Փիրլօ  յայտարարեց, թէ  կը  փափաքի շարունակել   ասպարէզը:  Փիրլօ  նշեց, թէ  հիանալի մարզավիճակի մէջ կը գտնուի, սակայն  չի գիտեր, թէ ու՞ր պիտի  շարունակէ ապագան՝ Եուվենթուսի   հետ, թէ՞ այլուր:  34-ամեայ   միջնապահին   ծառայութիւններով   հետաքրքրուած  են Մանչեսթըր  Եունայթտը, Չելսին, Արսենալը, Թոթենհամը եւ ուրիշներ:

ՈՒՔՐԱՆԻՈՅ ԱՂՋԿԱՆՑ  ՀԱՒԱՔԱԿԱՆԸ  ԴԱՐՁԱՒ  ԵՒՐՈՊԱՅԻ    ՃԱՏՐԱԿԻ ԱԽՈՅԵԱՆ

Լեհաստանի մայրաքաղաք Վարշաւայի մէջ  ընթացող  ճատրակի աղջկանց  Եւրոպայի խմբային ախոյեանութիւնը աւարտեցաւ  Ուքրանիոյ հաւաքականին  յաղթանակով:  Փաստօրէն  անոնք,  յաջորդաբար երկրորդ  տարին ըլլալով, իրենց մօտ պահեցին ախոյեանութեան տիտղոսը: Մրցաշարքի նախավերջին հանգրուանին, ուքրանուհիները՝ 3-1 արդիւնքով  պարտութեան մատնեցին  Հայաստանը:  Հայաստանի հաւաքականը գրաւեց  չորրորդ դիրքը:

ԳԱՐԼՍԸՆ   – ԱՆԱՆՏ ՝   4-2

Ճատրակի   համաշխարհային  թագին  յաւակնորդ   Մակնուս Գարլսըն՝  4-2 արդիւնքով առաւելութիւն մը  հաստատեց աշխարհի  գործող ախոյեան Վիշուանաթան Անանտի դէմ: Երկու  մրցորդներուն միջեւ  վեցերորդ  հանգրուանի   հանդիպումը աւարտեցաւ Գարլսընի յաղթանակով: Մրցամարտը  աւարտելու կը  մնայ  վեց հանգրուան:

ՊՐԱԶԻԼ ՊԻՏԻ  ՇԱՀԻ ՄՈՆՏԻԱԼ 2014-Ի ԲԱԺԱԿԸ

Սոյն յայտարարութիւնը կատարեց  Պրազիլի հաւաքականի մարզիչ  Լուիս  Ֆելիփէ Սքոլարին:  Հոնտուրասի  հաւաքականին դէմ Պրազիլի արձանագրած  5-0  յաղթանակէն  ետք, Սքոլարի  յայտնեց, թէ  հաւաքականը  ցոյց տուած էր  իր բոլոր ունակութիւնները.« Պրազիլ պիտի  դառնայ  աշխարհի ախոյեան» . ըսաւ  Սքոլարի:

 ԵՐԵՔՇԱԲԹԻ   ԵՐԵԿՈՅԵԱՆ`

ՄՈՆՏԻԱԼ  2014-Ի ԼՐԱՑՈՒՑԻՉՆԵՐՈՒ ԳԾՈՎ,  ԴԱՐՁԻ   ՀԱՆԴԻՊՈՒՄՆԵՐՈՒՆ  ՅԱՅՏԱԳԻՐԸ

Ռումանիա –  Յունաստան  ժամը՝  20.00  ( երթի հանդիպում՝  1-3)

Խրուաթիա –  Իսլանտա ժամը՝  20.15 ( երթի  հանդիպում՝ 0-0)

 Շուէտ –  Փորթուգալ ժամը՝   20.45  (երթի  հանդիպում՝   0-1)

Ֆրանսա  –  Ուքրանիա  ժամը՝  22.00 ( երթի հանդիպում՝  0-2)

ՖՈՒԹՊՈԼԻ  ՄԻՋԱԶԳԱՅԻՆ  ՀԱՆԴԻՊՈՒՄՆԵՐ

Երեքշաբթի  երեկոյեան տեղի պիտի ունենան ֆութպոլի  միջազգային բարեկամական  14   հանդիպումներ:

Ստորեւ,  կարգ մը  յատկանշական   հանդիպումներու  ժամանակացոյցը.

Արժանթին –  Պոսնիա ժամը՝  3.30

Նորվեկիա  – Սկովտիա  ժամը՝  20.00

Հարաւ Ափրիկէ – Սպանիա ժամը՝ 21.00

Հոլանտա –  Գոլոմպիա  ժամը՝  21.30

 Լեհաստան  -Իրլանտա  ժամը՝  21.45

 Անգլիա – Գերմանիա ժամը՝  22.00

 

LEAVE A REPLY

Please enter your comment!
Please enter your name here