ՆԱԽԱԳԱՀ ՍԸԼԷՅՄԱՆ ՔՈՒԷՅԹԻ ԽՈՐՀՐԴԱԺՈՂՈՎԻՆ ՊԻՏԻ ԱՐՏԱՍԱՆԷ ԼԻԲԱՆԱՆԻ ԽՕՍՔԸ

0
138

Հանրապետութեան նախագահ Միշէլ Սըլէյման իր տիկնոջ  Ուաֆա Սըլէյմանի հետ մեկնեցաւ Քուէյթ, ուր պիտի  մասնակցի արաբափրիկեան տնտեսական երրորդ  խորհրդաժողովին:  Սըլէյման,  այսօր պիտի արտասանէ  Լիբանանի խօսքը,  իսկ վաղը՝ Չորեքշաբթի օր, պիտի  արտասանէ  խորհրդաժողովին  եզրափակիչ խօսքը:

Նախագահ Սըլէյման, խորհրդաժողովի  ծիրին մէջ հանդիպում մը պիտի ունենայ Քուէյթի Սապահ Ալ Ահմատ Ալ Ճապէր Ալ Սապահ իշխանին  հետ: Սըլէյման պիտի  քննարկէ  միջազգային  ընտանիքին կողմէ  Լիբանան   հաստատուած  սուրիացի գաղթականներուն մարդասիրական   օժանդակութիւն  հայթայթելու կարելիութիւնները:  Այս  ծիրին  մէջ,  նախկին ներքին գործոց նախարար Զիատ Պարուտ  նշեց, թէ   միջազգային ընտանիքը  ցարդ  շատ  համեստ մասնակցութիւն    բերած  է սուրիացի   գաղթականներուն համար  ստանձնած իր  յանձնառութիւններուն մէջ:   Պարուտ    ընդգծեց, թէ  Լիբանանի  բնակչութեան  մէկ  չորրորդը   սուրիացի   գաղթականներ են: ՄԱԿ-ի կից  գաղթականաց  հարցերով զբաղող  կազմակերպութեան տուեալներով՝  816 հազար  սուրիացի գաղթականներ ապաստանած են Լիբանան:

Լրատուական կարգ մը  աղբիրներ  հաղորդեցին, թէ հանրապետութեան նախագահ Միշէլ Սըլէյման լուրջ   յաւակնորդ մըն  Ֆրանկոֆոնեան Երկիրներու նախագահի պաշտօնին:  Ներկայիս այդ պաշտօնը կը վարէ  Սենեկալի նախկին նախագահ Ապտօ Տիուֆը: Անոր պաշտօնավարութեան   ժամկէտը կ’աւարտի  2014-ին:

Հրաժարեալ վարչապետ Նեժիպ Միքաթի  վարչապետարանին մէջ ընդունեց  նախարար Մարուան Խէյր էլտտինը:  Ան  նաեւ ընդունեց  տնտեսական   տարբեր  յանձնաժողովներ, ուժանիւթի եւ  ջուրի նախարարի պաշտօնակատար  Ժըպրան Պասիլը, Լիբանանի մօտ Քաթարի դեսպանը, Շուէտի արտաքին  գործոց նախարարութեան  միջինարեւելեան եւ  հիւսիսային Ափրիկէի   հարցերու պատասխանատու Ռոպերթ  Ռայտպըրկը,  Լիբանանի մօտ  Շուէտի դեսպանին ընկերակցութեամբ: Միքաթի  իր այցելութներուն հետ քննարկեց ներլիբանանեան  բեմին վերջին զարգացումները, դիտել տալով որ սահմանադրութեան արտօնած  չափով կը  վարէ  գործակատար կառավարութեան պարտականութիւնները: Միքաթի մաղթեց  անմիջապէս կազմել նոր եւ ամբողջական կառավարութիւն մը:

Նորանշանակ  վարչապետ Թամամ Սալամ  ընդունեց  Լիբանանի մօտ ՄԱԿ-ի ընդհանուր քարտուղարի  անձնական   ներկայացուցիչ  Տերէք  Փլամլին:  Վերջինս ցաւ յայտնեց, որ  քաջալերական լուրեր  չկան նոր կառավարութեան կազմութեան  ուղղութեամբ:

LEAVE A REPLY

Please enter your comment!
Please enter your name here