ՆԱԽԱԳԱՀ ՍԸԼԷՅՄԱՆ ՊԻՏԻ ՎԵՐԱԴԱՌՆԱՅ ԼԻԲԱՆԱՆ

0
108

 Հանրապետութեան նախագահ  Միշէլ Սըլէյման   կիսատ պիտի  լքէ   Քուէյթի մէջ   տեղի ունեցող արաբափրիկեան  տնտեսական երրորդ խորհրդաժողովը   եւ այսօր երեկոյեան պիտի  վերադառնայ   Պէյրութ: Քույէթի մէջ իր կարճ  կեցութեան ընթացքին, հանրապետութեան նախագահը     արծարծեց   Լիբանան  ապաստանած  սուրիացի  գաղթականներուն մարդասիրական  օժանդակութիւն հայթայթելու  անհրաժեշտութիւնը,  յիշեցնելով՝  արաբական աշխարհին եւ   միջազգային  ընտանիքին  ստանձնած  յանձնառութիւնները: Սըլէյման՝ խորհրդաժողովի ընթացքին,  Լիբանանի  խօսքին  մէջ  շեշտեց  Լիբանանին  օգնութեան ձեռք  մեկնելու անհրաժեշտութիւնը, որպէսզի  շարունակէ  մարդասիրական իր պարտականութիւնները սուրիացի  գաղթականներուն հանդէպ:

Հրաժարեալ  վարչապետ  Նեժիպ  Միքաթի՝ շրջանային եւ միջազգային գետիններու վրայ  խորհրդակցութիւններ կը կատարէ, սուրիայէն ապաստանած  գաղթականներուն օժանդակութիւններ  հայթայթելու  ուղղութեամբ:  Միքաթի ընդունեց հրաժարեալ կառավարութեան   ընկերային  հարցերու նախարար Ուայէլ Ապու Ֆաուրը:   Հանդիպումէն ետք,  վերջինս   ահազանգ  հնչեցուց, թէ՝   սուրիացիներու արտահոսքը Լիբանան  մտահոգիչ  դարձած է, իսկ Լիբանան  միջոցներ չունի  կրելու անոնց  բեռը: Եւրոպական Միութիւնը   դրուատեց  սուրիացի գաղթականներուն մարդասիրական  օժանդակութիւն հայթայթելու   Լիբանանի եւ Յորդանանի վերաբերմունքը եւ խոստացաւ  կրկնապատկել  գաղթականներուն  օժանդակելու   իր յանձնառութիւնները:

Նորանշանակ  վարչապետ   Թամամ Սալամ, Մըսայթպէի  իր  բնակարանին մէջ ընդունեց Միացեալ Նահանգներու  պետական  գանձի  օգնականը, ինչպէս նաեւ պետական քարտուղարութեան ուժանիւթի հարցերու օգնական Ամոս Հոշթայնը,  Լիբանանի մօտ Միացեալ Նահանգներու  դեսպան Տէյվիտ Հէյլի  ընկերակցութեամբ:

LEAVE A REPLY

Please enter your comment!
Please enter your name here