ՊԱՅԹՈՒՄ ԻՐԱՆԵԱՆ ԴԵՍՊԱՆԱՏԱՆ ԱՌՋԵՒ՝ 23 ԶՈՀ ԵՒ 146 ՎԻՐԱՒՈՐ

0
111

Այսօր առաւօտեան, առաջ, երկու  յաջորդական  պայթումներ  պատահեցան  Պիր Հասանի  շրջանին միջեւ գտնուող,  այսպէս կոչուած «Դեսպանատուներու  Թաղամասին»  մէջ:   Պայթումները  ցնցեցին  շրջանը, լուրջ  վնասներ պատճառելով  իրանեան դեսպանատան եւ անոր կից գնուող  շէնքերուն:  Պայթումին հետեւանքով  մահացան  23 անձեր, որոնց մէջ     իրանեան դեսպանատան մշակութային հարցերու կցորդ  Շէյխ  Իպրահիմ Անսարին: Վիրաւորներուն թիւը  կը հաշուէ  146:  Պայթումը՝ ահաբեկչական  երրորդ գործողութիւնն էր  Հարաւային Արուարձաններուն  էմջ:

Ականատեսներ  յայտնեցին, թէ  երկու  պայթումներ լսած  են  յաջորդական եօթ  երկվայրկեաններու ընթացքին:  Նախնական  տուեալներու համաձայն,  պայթումները կատարուած են  ականուած  ինքնաշարժներու  միջոցաւ:   Պայթումին պայմաններուն մասին   սկսան շրջիլ հակասական լուրեր: « Ռոյթըրզ»  լրատուական  գործակալութիւնը  հաղորդեց, թէ առնուազն  երկու   հրթիռներ արձակուած են   Հարաւային Արուարձաններու ուղղութեամբ, որոնցմէ մէկը  ինկած է Լիբանանի մօտ իրանեան դեսպանատան  կից  վայրի մը  մէջ:  «Ռոյթըրզ» նշեց,թէ եօթ  քաղաքացիներ   զոհուած են   հրթիռներուն հետեւանքով:  «Օ.Թի.Վի»  հեռատեսիլի կայանը  եւ  Ազգային Լրատուական  գործակալութիւնը հաղորդեցին, թէ առաջին պայթումը անձասպանական գործողութիւն էր: Ապահովական  կառոյցներ  յայտնեցին, թէ  պայթումը կատարուած էր  «Ռենօ- Ռափիտ» տիպի ինքնաշարժի մը  միջոցաւ:  Աւելի ուշ,  նշուեցաւ, թէ  «Ռենօ» ինքնաշարժին կ’ընկերակցէր  «մոթորսիքլ» մը: Գործողութեան ամբողջական պատկերը կը մնայ անորոշ: Նախնական  ենթադրութիւնները կ’ըսեն, թէ   «մոթորսիքլ»ը փորձած է  մուտք գործել դեսպանատան շրջափակէն ներս: Ան  փորձած է անձնասպանական գործողութեան  ճանապարհով  բանալ  դեսպանատան   կեդրոնական դուռը, որուն պիտի  յաջորդէր ականուած ինքնաշարժի  մը մուտքը: Փաստօրէն, դեսպանատան  պահակները  ձախողութեան մատնած էին դեսպանատունը  օդը հանելու ծրագիր մը: Ապահովութեան  ուժեր անմիջապէս  շրջափակեցին  պայթումին վայրը եւ սկսան  հետաքննութեան:  

Իրանեան  դեսպանատունը   հաղորդեց, թէ  դեսպանատան  տեսախցիկները  ամբողջութեամբ նկարահանած են  ահաբեկչութեան  գործողութիւնը: Անոնք պիտի  փոխանցուին ապահովական կառոյցներուն:

Առաջնային  օգնութեան Լիբանանեան Կարմիր  Խաչի եւ    քաղաքացիական  պաշտպանութեան   ծառայողներ   անմիջապէս   հասան պայթումներուն  վայրը: Առողջապահութեան նախարարի  պաշտօնակատար Ալի  Հասան Խալիլ,  ժամանեց պայթումին  վայրը եւ  Պէյրութի բոլոր   հիւանդանոցներէն  պահանջեց  դուռերը բանալ  վիրաւորներուն առջեւ:  Զինուորական  ատեանի  դատախազ Սաքր Սաքր  նոյնպէս  ժամանեց  պայթումին վայրը:  Պայթումի վայրը  ժամանեցին   երեսփոխաններ,  քաղաքական դէմքեր,  կրօնականեր եւ   դատապարտեցին  ահաբեկչական  գործողութիւնը:

 Լիբանանի մօտ  Իրանի դեսպան Ղատանֆար Ռըքն Ապատի  ցաւակցութիւն յայտնեց   զոհերու  հարազատներուն: Հրաժարեալ  վարչապետ Նեժիպ  Միքաթի  հեռաձայնային  հաղորդակցութիւն մը  ունեցաւ  Լիբանանի մօտ Իրանի դեսպան Ղատանֆար Ռըքն Ապատիի հետ, անոր փոխանցելով   լիբանանեան կառավարութեան ցաւակցութիւնները: Միքաթի դատապարտեց  ահաբեկչական գործողութիւնը եւ ինքնազսպումի կոչ ուղղեց    լիբանանցիներուն: Վարչապետը արտակարգ  նիստի մը  հրաւիրեց ապահովական  կառոյցներու ներկայացուցիչները:Նորանշանակ  վարչապետ Թամամ Սալամ նոյնպէս  դատապարտեց ահաբեկչական գործողութիւնը  եւ  հեռաձայնային   հաղորդակցութիւն մը ունեցաւ Իրանի դեսպանին հետ:  Փաղանգաւոր Կուսակցութեան  պետ  Ամին  Ճեմայէլ  դատապարտեց  ահաբեկչական  գործողութիւնը:

 

LEAVE A REPLY

Please enter your comment!
Please enter your name here