ՏԱՍՆՀԻՆԳ ԶՈՀ ԵՒ ՏԱՍՆԵԱԿԱՒՈՐ ՎԻՐԱՒՈՐ՝ ՀԱՐԱՒԱՅԻՆ ԱՐՈՒԱՐՁԱՆՆԵՐՈՒ ՄԷՋ

0
97

 Քանի մը վայրկեան առաջ, երկու  յաջորդական  պայթումներ  պատահեցան Հարաւային Արուարձաններու՝ Ուզայիի  եւ   Ճինահի  շրջանին միջեւ գտնուող  այսպէս կոչուած «Դեսպանատուներու  Թաղամասին»  մէջ:   Պայթումները  ցնցեցին  շրջանը, լուրջ  վնասներ պատճառելով  իրանեան դեսպանատան եւ անոր կից գնուող  շէնքերուն:

Ականատեսներ  յայտնեցին, թէ  երկու  պայթումներ լսած  են  յաջորդական եօթ  երկվայրկեաններու ընթացքին:  Նախնական  տուեալներու համաձայն,  պայթումները կատարուած են  ականուած  ինքնաշարժներու  միջոցաւ:   Պայթումին հետեւանքով  զոհերուն թիւը բարձրացաւ   15-ի: Վիրաւորներուն թիւը  կը մնայ անորոշ:  Պայթումին պայմաններուն շուրջ  սկսան շրջիլ հակասական լուրեր: « Ռոյթըրզ»  լրատուական  գործակալութիւնը  հաղորդեց, թէ առնուազն  երկու   հրթիռներ արձակուած են   Հարաւային Արուարձաններու ուղղութեամբ, որոնցմէ մէկը  ինկած է Լիբանանի մօտ իրանեան դեսպանատան  կից  վայրի մը  մէջ:  «Ռոյթըրզ» նշեց,թէ եօթ  քաղաքացիներ   զոհուած են   հրթիռներուն հետեւանքով:  «Օ.Թի.Վի»  հեռատեսիլի կայանը հաղորդեց, թէ  պայթումը  հետեւանք էր անձնասպանական գործողութեան: Ազգային Լրատուական  գործակալութիւնը հաղորդեց, թէ առաջին պայթումը անձասպանական գործողութեան  հետեւանք էր: Ապահովական  կառոյցներ  յայտնեցին, թէ  պայթումը կատարուած էր  «Ռընօ» տիպի ինքնաշարժի մը  միջոցաւ:  Իրանեան դեսպանատունը   հրապարակեց  հաղորդագրութիւն  մը  նշելով, թէ   ոչ ոք վնասուած  էր  իր անձնակազմէն:

Առաջնային  օգնութեան Լիբանանեան Կարմիր  Խաչի եւ  Կարմիր  Մահիկի     ինքնաշարժներ եւ  հրշէջներ անմիջապէս   հասան պայթումին վայրը: Առողջապահութեան նախարարի  պաշտօնակատար Ալի  Հասան Խալիլ,  ժամանեց պայթումին  վայրը եւ  Պէյրութի բոլոր   հիւանդանոցներէն  պահանջեց  դուռերը բանալ  վիրաւորներուն առջեւ:  Զինուորական  ատեանի  դատախազ Սաքր Սաքր  նոյնպէս  ժամանեց  պայթումին վայրը:  Պայթումի վայրը  ժամանեցին   երեսփոխաններ,  քաղաքական դէմքեր,  կրօնականեր եւ   դատապարտեցին  ահաբեկչական  գործողութիւնը:

 

LEAVE A REPLY

Please enter your comment!
Please enter your name here