ԱՊԱՀՈՎԱԿԱՆ ԳԵՐԱԳՈՅՆ ԽՈՐՀՈՒՐԴԸ ՔՆՆԱՐԿԵՑ ԵՐԿՐԻՆ ԿԱՑՈՒԹԻՒՆԸ

0
102

Ապահովական  Գերագոյն Խորհուրդը  հանրապետութեան նախագահ  Միշէլ Սըլէյմանի գլխաւորութեամբ, Չորեքշաբթի   կէսօրէ  ետք  ժամը  4-ին,  Պաապտայի պալատին մէջ գումարեց արտակարգ  նիստ մը եւ քննարկեց  երկրին ապահովական իրավիճակը՝ իրանեան դեսպանատան մօտ պատահած պայթումներուն  լոյսին տակ, ինչպէս նաեւ Թրիփոլիի ապահովական ծրագիրին գործադրութեան վերաբերեալ հարցեր:Նիստին մասնակցեցան  հրաժարեալ  վարչապետ Նեժիպ Միքաթի,  հրաժարեալ նախարարներ Ֆայէզ Ղըսն, Մարուան Շարպէլ, Ուայէլ Ապու Ֆաուր, ապահովական  կառոյցներու  ներկայացուցիչներ, բանակի ընդհանուր հրամանատար զօրավար Ժան Քահուաճի եւ այլ անձնաւորութիւններ: Նիստի ընթացքին  նախագահ Սըլէյման  դատապարտեց  Ճընահի մէջ  պատահած   պայթումները եւ  շեշտեց   յանցագործները  բացայայտելու անհրաժեշտութիւնը:Նիստին  որոշումները ապահովական  պատճառներով չյայտարարուեցան: Նախքան նիստը, Սըլէյման  ընդունեց Իրանի արտաքին գործոց նախարարի  օգնական Հիւսէյն Ամիր  Ապըտ Ալիհանը:   Վերջինս այցելութիւններ տուաւ խորհրդարանի նախագահ Նեպիհ Պըրրիին,  նորանշանակ եւ  հրաժարեալ վարչապետներուն:

Եւրոպական եւ  միջազգային   շրջանակներ  զգուշութեամբ կը հետեւին   Լիբանանի ապահովական զարգացումներուն:  Եւրոպական Միութեան արտաքին քաղաքականութեան գլխաւոր բանագնաց  Քաթրին Աշթըն  երկրին խաղաղութիւնը եւ ապահովական կայունութիւնը պահպանելու կոչ ուղղեց  լիբանանցիներուն: Իրանի խորհրդարանի նախագահ  Ալի  Լարիճանի  դիտել տուաւ, թէ  շրջանային  կարգ մը երկիրներ տարիներէ ի վեր կը փորձեն խախտել  Լիբանանի ապահովական կայունութիւնը: Լիբանանեան բանակի ընդհանուր հրամանատար զօրավար Ժան Քահուաճի յայտնեց, թէ բանակը պիտի չարտօնէ  ապահովական կայունութիւնը խանգարելու  փորձերը:

Խորհրդարանի նախագահ Նեպիհ Պըրրի՝ Լիբանանը  ճիհատիսկան գործողութիւններու  հրապարակի վերածելու մտավախութիւն մը արտայայտեց իր այցելուներուն:   Պըրրի  նշեց, թէ  իրանեան դեսպանատան դէմ ահաբեկչութեան գործողութեան հեղինակներուն ինքնութիւնը ծանօթ է: Անոնք  ժամանակին սպառնալիքներ յղած  էին  գարտինալ Պշարա Ռաայիի եւ բանակի հրամանատար  զօրավար Ժան Քահուաճիին: Լրատուական  աղբիւրներ  կը հաղորդեն, թէ  Տաաշ  կազմակերպութիւնը որոշած է  անձնասպանական  գործողութիւններ իրականացնել,Լիբանանի մէջ  շիի  համայնքին պատկանող  կառոյցներու դէմ: Միւս կողմէ, Քալամունի մէջ դիրք բռնած Ճեպհէթ Ալ Նուսրայի  պատասխանատու մը սպառնաց՝ անհրաժեշտութեան պարագային, Լիբանանեան հողերու վրայ  պայքարիլ Հըզպալլայի դէմ:

Նորանշանակ  վարչապետ  Թամամ Սալամ իր  բնակարանին մէջ  ընդունեց  Լիբանանի մօտ Ռումանիոյ   նոր  դեսպանը, լիբ-ամերիկեան «Նահտա» ընկերութեան  պատուիրակութիւն մը եւ այլ  անձնաւորութիւններ:

LEAVE A REPLY

Please enter your comment!
Please enter your name here